Hisiu Stadilaia Taudia Be Iesu Idia Vadivadi Henia

Tatau haida be Ist kahana amo idia mai. Idia be hisiu stadilaia taudia—idia gwau unai idia karaia, unai amo taunimanima edia mauri ai idia vara gaudia edia anina idia gwauraia diba. (Isaia 47:13) Ist kahanai idia noho neganai, “hisiu” ta idia itaia bena kilomita handred bamona unai hisiu idia badinaia ela bona Ierusalema, to Betelehema dekenai idia lao lasi.

Hisiu stadilaia taudia be Ierusalema dekenai idia ginidae neganai, idia henanadai: “Iuda taudia edia king ai do ia lao natuna be edeseni? Badina Ist kahanai ai noho neganai iena hisiu ai itaia, bona ai mai ia dekenai hemataurai ai hahedinaraia totona.”​—Mataio 2:1, 2.

Ierusalema ena king, Heroda, be unai ia kamonai neganai ia badu dikadika. Bena Iuda taudia edia dubu biagudia ibounai ia haboua bona Keriso do ia vara gabuna totona ia henanadai. Toretore Helagadia ena hereva hegeregerena, idia haere: “Betelehema.” (Mataio 2:5; Mika 5:2) Vadaeni Heroda be hunia dalanai hisiu stadilaia taudia ia boiria bona ia hamaorodia: “Umui lao bona unai natuna maragina umui tahua namonamo. Ia umui davaria neganai, lau do umui hadibaia, unai amo lau danu do lau lao ia dekenai hemataurai lau hahedinaraia.” (Mataio 2:8) To, Heroda ia ura natuna maragina do ia davaria bona hamasea!

Hisiu stadilaia taudia idia lao murinai, hoa gauna ta ia vara. Guna Ist kahanai idia itaia “hisiu” be idia vairanai ia lao. Unai ese ia hahedinaraia, ta be unai hisiu amo idia ia hakaua noho. Hisiu stadilaia taudia be unai hisiu idia badinaia ela bona Iosepa, Maria bona edia natuna maragi idia noho rumana ataiai ia doko.

Hisiu stadilaia taudia be ruma dekenai idia vareai neganai, Maria be natuna maragina ida idia itaia, unai be Iesu. Bena Iesu dekenai idia tui diho. Bona harihari gaudia hegeregere golo, frenkinsens, bona muro idia henia. Gabeai, Dirava ese nihi amo idia ia hadibaia Heroda dekenai do idia giroa lou lasi. Unai dainai, idia be dala idauna amo edia tano dekenai idia giroa lou.

Oi laloa daika be “hisiu” amo hisiu stadilaia taudia ia hakaua? Laloatao, hisiu ese unai tatau be Betelehema, Iesu ia noho gabuna dekenai ia hakaudia lao lasi. To, Ierusalema dekenai ia hakaudia lao, unai amo King Heroda, Iesu ia ura hamasea tauna idia hereva henia. Momokani, bema hisiu stadilaia taudia be Dirava ese nihi amo ia hereva henidia lasi, reana idia be Heroda dekenai Iesu ena noho gabuna do idia gwauraia, bena Iesu do ia hamasea. Ia hedinarai goevagoeva, Dirava ena inai tauna, Satani, be unai “hisiu” ia gaukaralaia, badina ia ura Iesu ia hamasea.