Iesu Ia Gimaia Dalana

IEHOVA be nega haida dala namo hereana ai ia kara, matamata taudia bona sibona idia naria diba lasi taudia ia gimaia totona. Bema hanua ta dekenai oi raka loaloa, Iehova ese unai ia karaia dalana ta do oi itaia. To matamanai, ia vara gauna do oi lalo-pararalaia lasi.

Oi itaia manu ta be emu badinai ia roho diho. Ena toana be hegeregere bero ia davaria. Iena apena ta ia veria bona ia kahirakahira oi lao toho neganai, ia raka oho. Manu oi badinaia noho lalonai, ia be ia raka oho haraga. Bena karaharaga, ia roho lao. Iena apena dekenai bero ia davaria lasi! Unai manu ia karaia gauna oi diba, a?—

Manu ia roho diho gabuna kahirakahira, ena natudia be uda dekenai ia hunia. Manu ia gari, dika ena natudia oi davaria bona oi haberoa. Unai dainai ia bero manu ta bamona ia kara bona oi ia hakaua siri. Oi diba daika ese ita ia gimaia diba manu ese ena natudia ia gimaia hegeregerena?— Baibel lalonai, Iehova be iena natudia ia durua ugava manu ida ia hahegeregerea.​—Deuteronomi 32:​11, 12.

Iehova be iena lalokau Natuna, Iesu ia laloa bada. Iesu be guba dekenai ia noho neganai, ia be siahu bada lauma tauna, iena Tamana bamona. Ia sibona ia naria diba. To Iesu be tanobada dekenai beibi ta bamona ia vara neganai, ia sibona ia naria diba lasi. Ta ese ia gimaia be namo.

Tanobada ai Dirava ena ura ia hagugurua totona, namona be ia tubu daekau bona goevadae tau badana ai ia lao. To, unai ia do vara lasi neganai, Satani ia ura Iesu ia hamasea. Iesu ia maragi neganai, ia idia ura hamasea totona idia karaia gaudia bona Iehova ese ia gimaia dalana ena sivarai mani ita laloa. Oi ura oi kamonai, a?—

Iesu ia vara bena nega sisina murinai, Satani ese hisiu ta be ist kahana dekenai ia hahedinaraia. Hisiu stadilaia babalau taudia be kilomita handred momo ai unai hisiu idia badinaia ela bona Ierusalema dekenai idia ginidae. Unuseniai idia ura Iuda taudia edia king ai do ia lao tauna ena vara gabuna idia diba. Baibel ena hereva idia diba taudia idia nanadaia neganai, idia gwau: “Betelehema” dekenai.​—Mataio 2:​1-6.

Gabeai, Ierusalema dekenai ia noho king dikana, Heroda, ese Betelehema ai ia vara king matamatana ena sivarai ia kamonai, vadaeni hisiu stadilaia babalau taudia ia hamaorodia: ‘Mero maragina umui tahua bona umui davaria neganai, umui mai bona lau umui hadibaia.’ Heroda ia ura Iesu ena vara gabuna ia diba ena badina oi diba, a?— Badina Heroda ia mama bona ia ura Iesu ia hamasea!

Edena dala ai Dirava ese iena Natuna do ia gimaia?— Hisiu stadilaia babalau taudia ese Iesu idia davaria neganai, ia dekenai harihari gaudia idia henia. Gabeai Dirava ese nihi ta amo hisiu stadilaia babalau taudia ia hamaorodia Heroda dekenai do idia giroa lou lasi. Unai dainai dala idauna amo edia hanua dekenai idia lao, to Ierusalema dekenai idia giroa lou lasi. Heroda ia kamonai unai hisiu stadilaia babalau taudia ese unai tano idia rakatania vadaeni neganai, ia badu dikadika. Iesu hamasea totona, Heroda ese hahegani ia henia Betelehema ai idia noho natudia memero ibounai, lagani rua henunai do idia hamasea! To unai neganai, Iesu be unai gabu ia rakatania vadaeni.

Iesu ia heau mauri dalana oi diba, a?— Hisiu stadilaia babalau taudia be unai gabu idia rakatania bona edia hanua dekenai idia lao murinai, Iehova ese Maria ena adavana, Iosepa ia hadibaia do idia toreisi bona Aigupito dekenai do idia heau lao. Unuseniai tau dikana Heroda ese Iesu do ia davaria lasi. Lagani haida murinai, Maria bona Iosepa be Iesu ida Aigupito amo idia lou mai neganai, Dirava ese Iosepa dekenai hadibaia hereva ta ia henia lou. Nihi ta dekenai ia hamaoroa Nasareta do ia lao henia, unuseniai Iesu be dika do ia davaria lasi.​—Mataio 2:​7-​23.

Iehova ese ena Natuna ia gimaia dalana oi itaia, a?— Daika be ena sinana ese ia hunia manu maragidia bamona eiava Iesu bamona ia maragi neganai? Oi be idia bamona, a?— Haida idia ura oi idia hahisia. Unai taudia oi diba, a?—

Baibel ia gwau Satani be ia boiboi bada laiona bamona, ia ura ita ia ania. Laiona ese animal maragidia ia hadikaia hegeregerena, nega momo Satani bona ena demoni ese natudia maragidia idia hadikaia. (1 Petero 5:8) To Iehova ena goada ese Satani ena goada ia hereaia. Iehova ese ena natudia ia gimaia diba eiava Satani ese idia dekenai ia karaia dika gauna ia kokia diba.

Inai buka ena Karoa 10 dekenai ita itaia bamona, Diabolo bona ena demoni idia ura dahaka ita karaia?— Oibe, idia ura Dirava ia gwau idia kerere mahuta hebou karadia ita karaia. To daidia sibona idia mahuta hebou be maoro?— Oibe, idia headava vadaeni tau bona hahine sibodia.

To madi, taunimanima badadia haida idia ura natudia idia sihari henidia. Unai bamona idia karaia neganai, memero bona kekeni be unai taunimanima badadia amo idia dibaia matabodaga karadia idia karaia matamaia. Danu, idia ese edia tauanina ena hehuni kopina kahadia be dala kererena ai idia gaukaralaia matamaia. Idaunegai Sodoma hanuana dekenai unai bamona ia vara. Baibel ia gwau unuseniai idia noho taunimanima, “uhau bona buruka” idia ura Lota idia vadivadi henia tatau idia sihari henidia.​—Genese 19:​4, 5.

Unai dainai Iesu be Iehova ese ia gimaia hegerererena, idia ura oi idia sihari henia taunimanima badadia​—bona natudia ma haida amo—​ta ese oi ia gimaia danu be namo. Nega momo unai taudia idia koikoi idia gwau idia be oiemu turadia. Reana oi dekenai gau ta do idia henia bema oi gwauhamata oi ida idia ura karaia gauna be ma ta oi hadibaia lasi. To unai taudia be Satani bona ena demoni bamona, sibodia edia namo idia tahua bona idia ura sibodia idia hamoalea. Bona unai moale abia toho totona natudia idia sihari henia. Unai be kerere momokani!

Sibodia idia hamoalea totona do idia karaia gauna oi diba, a?— Reana emu tauanina ena hehuni kahadia do idia dahua toho. Eiava edia tauanina ena hehuni kahadia be emu tauanina ena hehuni kahadia ida do idia dahua. To namo lasi ma ta be emu tauanina ena hehuni kahadia ia gadaralaia. Oiemu tadikakana eiava taihuna eiava sinana eiava tamana korikorina danu, lasi.

Edena bamona emu tauanina be unai bamona kara dikadia idia karaia taudia amo oi gimaia diba?— Gau ginigunana be, namo lasi ma ta ese emu tauanina ena hehuni kahadia ia gadaralaia. Bema ta ia ura unai bamona ia karaia, mai gado bada ida oi hereva auka: “Unai oi hadokoa! Oi do lau samania!” Bona bema unai tauna ia gwau ia vara gauna be emu kerere, unai oi abia dae lasi. Unai be momokani lasi. Herevana ia be daika, tama o sina dekenai ia oi samania be namo! Unai bamona oi karaia be namo, herevana ia gwau umui karaia hebou gauna be oi bona ia huanai sibona ia noho. Ena be ia gwau harihari gau namodia do ia henia eiava oi ia hagaria, ia amo oi heau siri bona oi samania be namo.

Namo lasi oi gari, to oi naria namonamo be namo. Emu tama sina ese oi dekenai taunimanima eiava gabu dikadia idia hadibaia neganai, idia oi kamonai henia be gau badana. Bema unai bamona oi karaia, taunimanima dikadia ese oi do idia hadikaia lasi.