Nasareta Dekenai Ia Tubu Daekau

Iesu be Nasareta dekenai ia tubu daekau, unai be ladana bada lasi siti. Nasareta be Iudea ena not kahanai, unai be Galilea ena ororo gabudia ai, bona gohu badana ladana Galilea Gohuna ena west kahanai.

Iesu ena mauri lagani be reana rua neganai, Iosepa bona Maria ese ia be Aigupito amo Nasareta dekenai idia abia mai. Reana unai negai edia natuna be tamona sibona. To gabeai, Iesu ena tadikaka haida—Iamesi, Iosepa, Simona, bona Iuda—idia vara. Iosepa bona Maria ese Iesu ena taihudia ma haida idia havaraia danu. Oibe, Iesu ena tadina ibounai be 6 bamona.

To, Iesu be mai ena varavara danu. Idia be Elisabeta bona ena natuna Ioane, idia ita diba. Ioane be Iudea dekenai ia noho, unai be saut kahanai bona ia be daudau. To Salome, Maria ena sista bona Iesu ena lalana, be Galilea dekenai ia noho, unai be kahirakahira. Salome ena adavana be Sebedeo. Edia natudia rua, Iamesi bona Ioane, be Iesu ena kasin. Ita diba lasi idia tubu daekau lalonai idia be Iesu idia bamoa momo eiava, to gabeai, idia be Iesu ena tura namodia bona aposetolo taudia ai idia lao.

Famili ia bada noho dainai, Iosepa ia gaukara goada idia ia naria totona. Ia be kapenta tauna. Iosepa ese Iesu be ena natuna korikori bamona ia naria dainai, Iesu idia gwauraia “kapenta tauna ena natuna.” (Mataio 13:55) Iosepa ese Iesu dekenai kapenta gaukara ia hadibaia danu, bona Iesu be unai gaukara ia diba namonamo. Gabeai, taunimanima ese Iesu idia gwauraia: “Ia be kapenta tauna.”​—Mareko 6:3.

Iosepa ena famili be Iehova tomadiho henia karana idia laloa bada. Iosepa bona Maria be Dirava ena Taravatu idia badinaia dainai, ‘edia ruma ai idia helai, dala dekenai idia raka, idia hekure, bona idia toreisi neganai,’ Dirava ena hereva be edia natudia dekenai idia hadibaia. (Deuteronomi 6:6-9) Nasareta ai sinagoga ta ia noho. Bona ita gwau diba, nega ibounai Iosepa ese ena famili be tomadiho totona unuseniai ia hakaua lao. Unai dainai gabeai idia gwau, “vaia Sabati dinana ai ia karaia bamona,” Iesu be sinagoga dekenai ia lao. (Luka 4:16) Danu, unai famili be nega ibounai Iehova ena dubu, Ierusalema, dekenai idia lao karana idia moalelaia bada.