Kana Ai Hoa Karana Iharuana

Iesu be Samaria ai dina rua ia noho murinai, ena hanua dekenai ia giroa. Iudea ai haroro gaukara badana ia karaia, to hari Galilea dekenai ia lao be laga-ani totona lasi. To ia tubu daekau gabuna ai ena haroro gaukara do ia habadaia. Ia diba unuseniai taunimanima ese ia do idia abia dae lasi, badina ia sibona ia gwau, “peroveta tauna be ena hanua korikorina ai idia matauraia lasi.” (Ioane 4:44) Iena hahediba taudia be ia idia bamoa lasi, to edia ruma bese bona gaukara gunadia dekenai idia giroa lou.

Iesu ese dahaka sivarai ia harorolaia matamaia? Gauna be inai: “Dirava ena Basileia be ia kahirakahira. Umui helalo-kerehai, bona sivarai namona umui abidadama henia.” (Mareko 1:15) Vadaeni dahaka ia vara? Galilea taudia momo ese Iesu idia abia dae bona idia matauraia. Unai be ena haroro herevana sibona dainai lasi. Hua haida gunanai, Galilea taudia haida be Pasova totona Ierusalema dekenai idia lao, bona Iesu ese ia karaia hoa karadia idia itaia.​—Ioane 2:23.

Galilea ai Iesu ese ena haroro gaukara badana be edeseni ia matamaia? Kana ai. Unuseniai, ia ese headava aria ai ranu be wain ai ia halaoa. Ena nega iharuana unuseniai ia noho neganai, ia taga Kaperanauma tauna ia kamonai Iesu be Iudea amo ia lou mai. Unai tauna be King Heroda Antipaa ena ofesa ta, bona iena natuna mero be ia gorere bada bona kahirakahira do ia mase. Ia be ena natuna totona ia lalohisihisi bada dainai, ia lao Iesu ia tahua. Ia davaria neganai, ia gwau: “Lohiabada e, egu natuna ia do mase lasi lalonai, mani lau ida oi mai.”​—Ioane 4:49.

Unai ofesa ia hoa, badina Iesu ia gwau: “Emu hanua dekenai oi giroa lao, emu natuna ia namo vadaeni.” (Ioane 4:50) Heroda ena ofesa be Iesu ena hereva ia abidadama henia bona ena hanua dekenai ia giroa. Ia lao noho lalonai, ena hesiai taudia ese idia hedavari henia bona sivarai namona idia hamaoroa. Oibe, iena natuna mero be ia namo vadaeni! Ia ura diba dainai ia henanadai: ‘Mero be edena hora ai ia namo lou?’

Idia gwau: “Varani 1 oklok ai ena fiva ia ore.”​—Ioane 4:52.

Unai ofesa ia laloparara unai hora ai Iesu ese ia hamaoroa: “Emu natuna ia namo vadaeni.” Unai murinai, inai tau bona ena ruma taudia ibounai be Keriso ena hahediba taudia ai idia lao.

Kana ai Iesu ese hoa karadia rua ia karaia: Ranu be wain ai ia halaoa bona ofesa ena natuna mero ia hanamoa ena be ia itaia lasi. Ia be unai hoa karadia rua sibona ia karaia lasi. To inai hoa kara iharuana be mai anina bada, badina ia hahedinaraia ia be Dirava ena peroveta tauna bona Galilea dekenai ia giroa noho. To edena dala ai inai ‘peroveta tauna be ena gabu korikorina ai do idia matauraia?’

Iesu be Nasareta dekenai ia lao neganai, unai do ia hedinarai. Unuseniai dahaka do ia vara?