Nasareta Ena Sinagoga ai

Reana Nasareta taudia idia ura dikadika Iesu idia itaia. Lagani ta bamona gunanai, ia be Nasareta ia rakatania bona Ioane dekenai ia lao, ia bapatisoa totona. Unai nega ai ia be kapenta tauna. To hari idia kamonai ia be hoa karadia ia karaia. Bona idia ura bada Iesu ese ia karaia hoa karadia idia itaia.

Iesu be vaia ia karaia hegeregerena, hanua ena sinagoga dekenai ia lao neganai, taunimanima idia ura dikadika ia idia kamonai henia. Sinagoga ai vaia idia guriguri bona Mose ese ia torea bukadia idia duahia, “Sabati ibounai sinagoga lalodiai” idia karaia bamona. (Kara 15:21) Peroveta taudia ese idia torea bukadia edia kahana haida danu idia duahia. Iesu be duahiduahi totona ia toreisi neganai, reana helai taudia momo ia diba, badina guna inai sinagoga ai idia ia hedavari henia. Vadaeni ia dekenai peroveta tauna Isaia ena lokua toretore idia henia. Bena Iehova ena lauma ese ia horoa Tauna ena sivarai ia duahia, hari unai sivarai be Isaia 61:1, 2 dekenai ia noho.

Iesu ese ia duahia kahana ese ia hahedinaraia, idia perovetalaia Tauna ese idia guia taudia ruhaia karana, matakepulu taudia edia matana do ia kehoa, bona Iehova ena lalonamo negana do ia harorolaia. Bena lokua toretore be hesiai tauna dekenai ia henia bona ia helai. Helai taudia ibounai be ia sibona idia itaia. Bena nega sisina daudau lalonai ia hereva, iena hereva lalonai inai mai anina bada herevana ia gwauraia: “Umui kamonai sirina be hari dina ia guguru.”​—Luka 4:21.

Taunimanima be “ena uduna amo idia mai hereva namodia dainai idia hoa,” bona ta ta dekenai idia gwau: “Inai be Iosepa ena natuna, a?” To Iesu ia laloparara, idia ura ia ese gabu ma haida dekenai ia karaia hoa karadia idia itaia, unai dainai ia gwau: “Lau diba inai hereva be lau dekenai do umui gwauraia, ‘Doketa e, oi sibona oi hanamoa. Kaperanauma dekenai oi karaia gaudia edia sivarai ai kamonai vadaeni, unai dainai unai gaudia be iniseni emu hanua dekenai oi karaia danu.’” (Luka 4:22, 23) Toana be Iesu ena hanua taudia idia laloa, ena hanua ai gorere taudia ia hanamoa guna be namo. Unai dainai reana idia laloa Iesu ese idia ia laloa bada lasi.

Iesu be edia lalohadai ia diba dainai, guna Israela ai idia vara gaudia haida ia herevalaia. Ia gwau, Elia ena negai, Israela dekenai vabu momo idia noho, to Dirava ese idia ta dekenai Elia ia siaia lasi. To, Sidono kahirakahira ia noho taoni, Sarepata, dekenai ia noho idau bese vabu ta dekenai ia lao, bona unuseniai hoa karana ia karaia. (1 King Taudia 17:8-16) Bona peroveta tauna Elisaia ena negai, Israela ai lepera taudia be momo, to ia ese Suria tauna, Namana, sibona ia hanamoa.​—2 King Taudia 5:1, 8-14.

Iesu ese unai sivarai amo ia hahedinaraia, iena hanua taudia be sibona edia namo idia laloa bona edia abidadama be ia manoka. Unai idia kamonai neganai, dahaka idia karaia? Sinagoga lalonai idia noho taudia be idia badu dainai idia toreisi, bona hanua murimuri dekenai Iesu idia doria raka-lasi. Nasareta hanua ia gini ororona ena atai momokani dekenai ia idia abia lao, bona idia ura idia negea diho. To Iesu be idia amo ia heau mauri. Vadaeni Kaperanauma dekenai ia lao, unai be Galilea Gohuna ena not west kahanai.