Iesu Be Kaperanauma Ai Hoa Kara Badadia Ia Karaia

Iesu ese hahediba taudia 4—Petero, Andrea, Iamesi, bona Ioane—ia boiria taunimanima haoda henia taudia ai idia lao totona. Sabati dinana ai, idia ibounai be Kaperanauma ena sinagoga ta dekenai idia lao. Unuseniai Iesu ia haroro, bona taunimanima be ena hadibaia dalana dekenai idia hoa. Ia be mai siahu danu ia hereva, taravatu hadibaia taudia bamona lasi.

Unai Sabati dinana ai, demoni ese ia biagua tauna ta ia noho. Sinagoga lalonai ia boiboi badabada, ia gwau: “Iesu, Nasareta tauna, dahaka dainai iniseni oi mai? Ai hadikaia ore totona oi mai, a? Lau diba oi be daika, oi be Dirava ena Helaga Tauna.” Iesu ese unai tauna ia biagua demoni ia gwau henia, ia gwau: “Uduna oi koua, ia amo oi raka-lasi!”​—Mareko 1:24, 25.

Vadaeni, demoni ese unai tauna be tano dekenai ia negea diho, ia hamarerea bada bona ia boiboi badabada. Bena demoni be unai tauna amo ia raka-lasi, to “unai tau ia hahisia lasi.” (Luka 4:35) Sinagoga lalonai idia noho taudia idia hoa bada! Idia henanadai: “Inai be dahaka? . . . Ia be mai siahu ida lauma dikadia ia oda henidia bona ena hereva idia kamonai.” (Mareko 1:27) Unai hoa karana ena sivarai be Galilea ena kahana ibounai dekenai ia lao.

Iesu bona ena hahediba taudia be Sinagoga idia rakatania murinai, Simona, o Petero, ena ruma dekenai idia lao. Unuseniai Petero ena ravana hahine ena fiva be ia bada. Bona Iesu idia noia ia do ia durua. Vadaeni Iesu ia lao, iena imana ia dogoatao, bona ia hatorea isi. Maoromaoro ena gorere ia ore, bona Iesu bona ena hahediba taudia ia hesiai henia, reana edia aniani ia hegaegaelaia.

Dina ia diho neganai, gabu idauidau amo taunimanima be Petero ena ruma dekenai gorere taudia idia hakaua lao. Toana be Kaperanauma taudia ibounai be iduara badinai idia haboua. Dahaka dainai? Idia be gorere hanamoa tauna ta idia tahua. Oibe, “taunimanima ese edia ruma ai idia noho gorere idauidau taudia be ia dekenai idia mailaia. Ena imana be idia ta ta latanai ia atoa bona ia hanamodia.” (Luka 4:40) Oibe, herevana edia gorere be dahaka, Iesu ese ia durudia, idia perovetalaia hegeregerena. (Isaia 53:4) Demoni ese ia biagua taudia amo demoni ia luludia danu. Unai lauma dikadia idia raka-lasi neganai, idia boiboi: “Oi be Dirava ena Natuna.” (Luka 4:41) To Iesu ese ia gwau henidia, do idia hereva lasi totona. Idia diba Iesu be Keriso, bona ia ura lasi koikoi dalana amo idia hahedinaraia idia ese Dirava momokanina idia hesiai henia.