Duahia Taudia Edia Henanadai
Mataio 17:20 ena hereva hegeregerena, aposetolo taudia be mero ta idia hanamoa diba lasi badina ‘edia abidadama be maragimaragi dainai.’ To, Mareko 9:29 ese idia hanamoa diba lasi ena badina ia hahedinaraia neganai, guriguri ia gwauraia. Dahaka dainai unai Evanelia sivarai ruaosi ese gau idauidau idia gwauraia?
Unai sivarai ruaosi edia hereva be idia heduru heheni, ta ta idia hakoikoia lasi. Mani Mataio 17:14-20 ita itaia guna. Tau ta ia gwau ena natuna mero be epileptic gorere tauna to Iesu ena hahediba taudia ese idia hanamoa diba lasi. Bena Iesu ese unai mero ia hadikaia demoni ia lulua bona unai mero ia hanamoa. Hahediba taudia idia nanadaia dahaka dainai idia ese unai demoni idia lulua diba lasi. Mataio ena sivarai hegeregerena, Iesu ia haere: “Umui emui abidadama be maragimaragi dainai. Umui lau hamaoroa momokani, bema umui emui abidadama ena bada be mastadi uhena sibona bamona, inai ororo bema umui hereva henia, bema umui gwau, ‘Iniseni dekena amo oi lao unuseni,’ be do ia lao. Kara ibounai danu do umui karaia diba.”
Hari Mareko 9:14-29 oi kehoa, unuseniai hereva ma haida ita davaria. Hegeregere, Mareko 9:17 ena hereva ia hahedinaraia unai mero dekenai ia vara epileptic bamona gorerena be lauma dikana ta ese ia havaraia. Namona be ita laloa siri ma haida dekenai Baibel ia gwau Iesu ese epileptic gorere taudia bona demoni ese idia hadikaia taudia ia hanamoa. (Mataio 4:24) Inai mero dekenai ia vara gauna be idau, badina ena gorere be “hereva diba lasi bona taia koua lauma” ta ese ia havaraia, unai be lauma dikana, doketa tauna Luka ese ia hamomokania hegeregerena. (Luka 9:39; Kolose 4:14) Hari Mareko 9:18 ena hereva, “ia [demoni] dogoatao gabuna dekenai,” itaia. Demoni ese unai mero be nega ibounai ia hadikaia lasi, nega haida sibona. To, hahediba taudia be unai demoni idia lulua diba lasi bona mero idia hanamoa diba lasi. Iesu idia nanadaia dahaka dainai ia vara neganai, Iesu ia haere: “Inai bamona gauna lulua dala ta be lasi, guriguri sibona mo be hegeregere.”
To, Mareko ese ia torea sivaraina ita duahia namonamo neganai, ita itaia ia be Mataio ena hereva ia hakoikoia lasi. Mareko 9:19 ai, ita itaia Iesu ese unai nega ena uru taudia edia abidadama lasi karana ia lalohisihisilaia. Bena, siri 23 ai ia ese mero ena tamana dekenai ia gwau: “Abidadama tauna ese gau ibounai ia karaia diba.” Unai dainai Mareko danu ese abidadama ena namo ia herevalaia. To siri 29 ai, Mareko ese Iesu ia gwauraia guriguri herevana ia torea danu, Mataio bona Luka ese idia torea lasi gauna.
Unai dainai, dahaka ita gwau diba? Nega idauidau ai aposetolo taudia 12 bona hahediba taudia 70 ese lauma dikadia idia luludia. (Mareko 3:15; 6:13; Luka 10:17) To unai negai hahediba taudia ese inai lauma idia lulua diba lasi. Badina be dahaka? Bema unai sivarai ibounai ita laloa, toana be idia hegaegae namonamo lasi unai idia karaia totona. Reana ia be demoni idauna dainai, badina toana be demoni edia kara, edia ura gaudia, bona edia diba be idauidau. Unai lauma dekenai abidadama goadana bona Dirava ena heduru totona do idia guriguri goadagoada be mai anina bada. Oibe, Iesu ena abidadama be unai bamona. Bona guriguri ia Kamonai Tauna, ena Tamana ena heduru ia abia danu. (Salamo 65:2) Iesu ese unai demoni ia lulua bona mero ia hanamoa diba sibona lasi, to ia ese unai ia karaia danu.