Hebogahisi Dainai Lepera Tauna Ia Hanamoa

Iesu be ena hahediba taudia 4 ida “Galilea ena gabu ibounai dekenai ia lao, edia sinagoga lalonai ia haroro,” bona ia karaia gau namodia edia sivarai be momo idia kamonai. (Mareko 1:39) Siti ta dekenai unai sivarai idia kamonai, bona unuseniai lepera tauna ta ia noho. Doketa tauna Luka ia gwau, “lepera gorere ese [unai tauna] ena tauanina ibounai ia hadikaia.” (Luka 5:12) Lepera gorere ia bada neganai, metairametaira tau ta ena tauanina ena toana ia hadikaia diba.

Lepera gorerena ese unai tauna ena tauanina ia hadikaia dainai, taunimanima amo ia noho daudau. Danu, taunimanima be ia kahirakahira idia mai neganai, do ia boiboi, “Miro, miro!” unai amo do idia noho daudau bona ma ta dekenai gorere do ia hanaia lasi. (Levitiko 13:45, 46) To hari unai lepera tauna be dahaka ia karaia? Iesu dekenai ia lao bona ia tui diho bona ia noinoi: “Lohiabada e, bema oi ura, lau do oi hanamoa.”​—Mataio 8:2.

Unai tau ese Iesu ia abidadama henia! Madi, iena gorere dainai ia lalometau bada! Iesu be dahaka do ia karaia? Bema oi be unuseniai, dahaka do oi karaia? Iesu ese ia hebogahisi henia dainai, unai tauna ia dogoatao, bona ia gwau: “Oibe lau ura! Harihari oi namo.” (Mataio 8:3) Bona maoromaoro ena lepera gorerena ia ore, to haida be unai idia abia dae be auka.

Do oi moale bema ia hebogahisi bona gaukara namodia ia karaia tauna, Iesu hegeregerena, be king ai ia lao, ani? Iesu ese lepera tauna ia kara henia dalana amo ita diba momokani, Iesu be tanobada ibounai ena King ai ia lao neganai, inai peroveta herevana do ia hagugurua: “Ia ese ladana maragi taudia bona ogogami taudia do ia hebogahisi henia, bona ogogami taudia do ia hamauria.” (Salamo 72:13) Oibe, Iesu ese ena ura do ia hagugurua, ia ese hisihisi idia davaria taudia ibounai do ia durua.

Mani oi laloa, Iesu be unai lepera tauna ia do hanamoa lasi neganai, taunimanima be iena gaukara namodia idia herevalaia. Bona hari momo ese ia karaia hoa karana ena sivarai do idia kamonai. To, Iesu ia ura lasi ma haida ese idia sivarailaia gaudia dainai taunimanima ese ia idia abidadama henia. Iesu be inai peroveta herevana ia diba, “dala ai ena gadona do idia kamonai lasi,” anina be sibona ena ladana do ia abia isi lasi. (Isaia 42:1, 2) Unai hegeregerena, Iesu be ia hanamoa lepera tauna ia oda henia: “Tau ta oi hadibaia lasi, to oi lao, hahelaga tauna vairanai oi hedinarai, bona Mose ena taravatu hegeregerena harihari gauna oi henia.”​—Mataio 8:4.

To inai tauna ia moale bada badina ena gorere ia namo, bona ia ura lasi ia dekenai ia vara gauna ia hunia. Ia lao bona gabu ibounai dekenai unai sivarai ia gwauraia. Bona momo idia ura Iesu idia itaia. Unai dainai Iesu be hanua ta dekenai ia vareai diba lasi, bona nega sisina lalonai taunimanima lasi gabudiai ia noho. To gabu idauidau amo taunimanima idia mai, iena hereva idia kamonai bona edia gorere ia hanamoa totona.