Iesu Ese Aposetolo 12 Ia Abia Hidi

Lagani ta mai kahana gunanai, Ioane Bapatiso ese ia hahedinaraia Iesu be Dirava ena Mamoe Natuna. Iesu be ena haroro gaukara ia hamatamaia neganai, kudou-maoro tatau haida be iena hahediba taudia ai idia lao, hegeregere Andrea, Simona Petero, Ioane, reana Iamesi (Ioane ena tadikaka), Filipo, bona Batolomeo (ena ladana ma ta be Natanaela). Gabeai, momo danu be Keriso murinai idia raka.​—Ioane 1:45-47.

Vadaeni Iesu be ia hegaegae ena aposetolo taudia ia abia hidi totona. Idia be ia do idia bamoa bona ia ese idia do ia treinia. To idia ia do abia hidi lasi neganai, Iesu be reana Galilea Gohuna kahirakahira ia noho ororo dekenai ia lao, unai be Kaperanauma kahirakahira. Bona hanuaboi ibounai ia guriguri, Dirava ia noia ia dekenai aonega do ia henia bona ia do ia hanamoa. Murina dinana ai, ena hahediba taudia ia boiria bona idia amo aposetolo 12 ia abia hidi.

Iesu ese matamanai ita gwauraia taudia 6 ia abia hidi, Mataio danu, ia be takisi ofesi amo ia boiria. Ia abia hidi taudia ma 5 be Iuda (ena ladana ma ta be Tadeo bona “Iamesi ena natuna”), Kananaia tauna Simona, Toma, Alepeo ena natuna Iamesi, bona Iuda Iskariote.​—Mataio 10:2-4; Luka 6:16.

Unai aposetolo 12 be nega daudau Iesu idia bamoa, bona idia ia diba namonamo. Idia haida be iena varavara. Iamesi bona ena tadikaka Ioane be Iesu ena kasin. Bona haida idia laloa, Alepeo be Iesu ena ubua tamana Iosepa ena tadina. Bema unai be momokani, Alepeo ena natuna, aposetolo Iamesi be Iesu ena kasin.

Iesu be ena aposetolo edia ladadia ia laloatao. To oi be edia ladadia oi laloatao, a? Inai ese oi do ia durua: Rua edia ladana be Simona, rua edia ladana be Iamesi, bona rua edia ladana be Iuda. Simona (Petero) ena tadikaka be Andrea, bona Iamesi (Sebedeo ena natuna) ena tadikaka be Ioane. Unai dala amo aposetolo 8 edia ladadia oi laloatao diba. Oredia 4 be takisi gogoa tauna (Mataio), gabeai ia daradara tauna (Toma), au ta henuna amo ia boiria tauna (Natanaela), bona Natanaela ena turana (Filipo).

Aposetolo 11 be Galilea amo, Iesu ena hanua unai. Natanaela be Kana amo. Filipo, Petero, bona Andrea edia hanua korikori be Betesaida. Gabeai Petero bona Andrea be Kaperanauma dekenai idia lao, Mataio be unuseniai ia noho. Iamesi bona Ioane danu be Kaperanauma kahirakahira idia noho, bona mai edia haoda bisinesi. Iuda Iskariote sibona be Iudea amo, gabeai ia ese Iesu ena mase dalana ia karaia.