Iesu be Ororo ta Dekenai Ia Hadibaia

INISENIAI Iesu mani oi itaia. Galilea ena ororo ta dekenai inai taunimanima ibounai ia hadibaia noho. Ia kahirakahira idia helai taudia be ena hahediba taudia. Idia 12 ia abia hidi ena aposetolo taudia ai idia lao totona. Aposetolo taudia be Iesu ena hahediba taudia namodia. Edia ladadia oi diba, a?

Idia be Simona Petero bona ena tadina Andrea. Bena Iamesi bona Ioane, idia rua be tadikaka danu. Aposetolo tauna ma ta ena ladana danu be Iamesi, bona ma ta idia gwauraia Simona. Aposetolo taudia rua edia ladana be Iuda. Ta be Iuda Iskariote, bona Iuda ma ta ena ladana idia gwauraia Tadeo danu. Bena Filipo, Natanaela (eiava Batolomeo), Mataio bona Toma.

Iesu be Samaria amo ia giroa mai neganai, ena nega ginigunana ia haroro matamaia: ‘Guba basileia ia kahirakahira vadaeni.’ Unai basileia oi diba, a? Ia be Dirava ena gavamani korikorina. Bona ena king be Iesu. Guba amo do ia lohia bona tanobada dekenai maino do ia havaraia. Dirava ena Basileia ese inai tanobada ibounai be paradaiso hairaina ai do ia halaoa.

Iniseniai Iesu be taunimanima dekenai basileia ia hadibaia noho. Ia gwau: ‘Inai bamona do umui guriguri. Aiemai tamana e, guba dekenai oi noho, oiemu ladana do ai hanamoa. Oiemu basileia do ia mai. Oiemu ura tanobada dekenai do ia vara, guba dekenai ia vara bamona.’ Taunimanima momo ese unai guriguri idia gwauraia ‘Lohiabada Ena Guriguri.’ Ma haida ese idia gwauraia ‘Aiemai Tamana’ gurigurina. Unai guriguri ibounai oi gwauraia diba, a?

Iesu ese taunimanima ia hadibaia danu edena bamona ta ta do idia kara henia. Ia gwau: ‘Oi ura oi dekenai idia karaia karadia be haida dekenai oi karaia danu.’ Ma haida ese hebogahisi dalanai oi idia kara henia neganai, oi moale ani? Unai dainai, Iesu ena hereva ena anina be hebogahisi dalanai taunimanima ma haida ita kara henia be namo. Tanobada paradaisona dekenai taunimanima ibounai be unai bamona idia kara heheni neganai, be namo herea, ani?