Taunimanima Ena Natuna Be Daika?

Iesu bona ena hahediba taudia be Betesaida dekenai idia ginidae. Bena taunimanima ese Iesu dekenai matakepulu tauna ta idia mailaia bona idia noia unai tau do ia dogoatao bona hanamoa.

Iesu ese unai tau ena imana ia dogoatao bena hanua murimuri dekenai ia hakaua lao. Iesu be unai tau ena matana dekenai ia kanudi murinai, ia nanadaia: “Gau ta oi itaia diba, a?” Tau ia haere: “Lau itaia taunimanima idia raka loaloa, to edia toana be au bamona.” (Mareko 8:23, 24) Iesu ese ena imana be unai tau ena matana dekenai ia atoa, bona ena matana ia namo. Bena Iesu ese ena ruma dekenai ia siaia lao, bona ia hamaoroa hanua dekenai do ia lao lasi.

Gabeai, Iesu bona ena hahediba taudia be Kaisarea Filipi tanona dekenai idia lao, unai be notist kahanai. Idia be kilomita 40 bamona idia raka daekau. Unai hanua be ororo ena ataiai, davara amo ia be mita 350 bamona, bona ena notist kahanai be sinou ese ia koua Heremona Ororona ia noho. Idia be dina haida bamona idia laolao.

Idia raka noho lalonai, Iesu be guriguri totona ia raka siri. Hua 9 eiava 10 sibona idia do noho bona do ia mase bona Iesu be ena hahediba taudia ia laloa. Iesu murinai idia raka taudia momo be ia idia rakatania, bona ma haida be idia daradara eiava moale lasi. Reana idia daradara, dahaka dainai taunimanima idia ura king ai ia idia halaoa neganai ia ura lasi, eiava dahaka dainai toa ta ia hahedinaraia lasi unai amo do ia hamomokania ia be daika.

Aposetolo taudia be ia guriguri noho gabuna dekenai idia lao neganai, Iesu ese nanadaidia: “Taunimanima idia gwau taunimanima ena Natuna be daika?” Idia haere: “Haida idia gwau Ioane Bapatiso, haida idia gwau Elia, to ma haida idia gwau Ieremia eiava peroveta tauna ta.” Oibe, taunimanima idia laloa Iesu be mase amo ia toreisi lou tauna ta. Ena hahediba taudia edia lalohadai ia diba totona, ia nanadaidia: “To umui, umui gwau lau be daika?” Petero ia haere: “Oi be Keriso, mauri Diravana ena Natuna.”​—Mataio 16:13-16.

Iesu ia gwau Petero ia moale be namo, badina Dirava ese ia dekenai unai ia hahedinaraia, ma ia gwau: “Oi be Petero, bona lau ese egu kongrigeisen be inai nadi badana latanai do lau haginia, bona Mase Gurina ena iduara ese do ia halusia lasi.” Iesu ena hereva anina be, ia sibona ese kongrigeisen ta do ia haginia bona Mase Gurina ese unai kongrigeisen taudia do ia guia lasi, bema tanobada ai Dirava idia badinaia noho. Petero dekenai ia gwauhamata: “Lau ese oi dekenai guba Basileia ena ki do lau henia.”​—Mataio 16:18, 19.

Iesu ia gwau lasi Petero ese aposetolo taudia ma haida ia hereaia, eiava ia gwau lasi ia be kongrigeisen ena badina nadina ai do ia lao. Iesu sibona be unai Nadi bona ia latanai unai kongrigeisen do ia gini. (1 Korinto 3:11; Efeso 2:20) To Petero be ki toi do ia abia. Ia abia hahenamo be orea idauidau taudia edia iduara do ia kehoa, unai amo guba Basileia lalonai idia vareai diba.

Pentekoste 33 C.E. ai, Petero ese ki ginigunana ia gaukaralaia, unai amo idia helalo-kerehai Iuda bona Iuda tomadiho idia badinaia taudia ia durua hahemauri idia abia totona. Ia ese ki iharuana ia gaukaralaia, abidadama Samaria taudia dekenai dala ia kehoa Dirava ena Basileia lalonai idia vareai totona. Bena lagani 36 C.E. ai, Petero ese ki ihatoina ia gaukaralaia, unai amo dala ia kehoa kopina utua lasi Idau Bese taudia, hegeregere Korenelio bona ma haida ia durua totona.​—Kara 2:37, 38; 8:14-17; 10:44-48.

Iesu be ena aposetolo taudia ia hamaoroa ia be kahirakahira Ierusalema ai hisihisi do ia mamia bona do ia mase neganai, idia lalohisihisi. Petero ia laloparara lasi Iesu be mase amo do ia toreisi lou bona guba dekenai do ia daekau, unai dainai Iesu ia hakaua siri bona ia gwau henia: “Lohiabada e, oi sibona oi hebogahisi henia. Oi dekenai unai do ia vara lasi.” To Iesu be Petero dekenai ena doruna ia henia, ia gwau: “Satani e, egu murinai oi lao! Oi be hahekwakwanaia gauna lau dekenai, badina emu lalohadai be Dirava ena lalohadai lasi, to taunimanima edia.”​—Mataio 16:22, 23.

Iesu ese ena aposetolo taudia bona ma haida ia boiria bona ia hadibadia, iena murinai idia raka be mai ena hekwarahi. Ia gwau: “Bema ta ia ura egu murinai ia raka, sibona ena ura ia dadaraia be namo, bona ena hisihisi auna do ia huaia bona egu murinai do ia raka noho. Badina ena mauri ia ura gimaia tauna be do ia mase, to lau bona sivarai namona dainai ia mase tauna be do ia mauri lou.”​—Mareko 8:34, 35.

Oibe, Iesu ena lalonamo idia abia totona, namona be idia gini goada bona sibona edia ura idia dadaraia. Iesu ia gwau: “Dirava badinaia lasi bona kara dika uru lalonai, bema tau ta be lau bona egu hereva dekenai ia hemarai, taunimanima ena Natuna be aneru helagadia ida ena Tamana ena hairai lalonai ia mai neganai, unai tauna dekenai do ia hemarai danu.” (Mareko 8:38) Oibe, Iesu ia mai neganai, “ta ta ena kara hegeregerena davana do ia henia.”​—Mataio 16:27.