Iesu ena Mauri bona Gaukara

Momokani, Iesu be Daika?

IESU bona ena hahediba taudia be bouti ta idia guia, bena, Betesaida dekenai idia ginidae neganai, taunimanima ese matakepulu tauna ta Iesu dekenai idia mailaia, bona idia noia, iena imana ia atoa unai tau dekenai bona ia hamauria. Iesu ese unai tau ena imana ia dogoatao bona ia hakaua lao hanua murimurinai bona, tau ena matana ai ia kanudi murinai, ia nanadaia ia gwau: “Oi itaia dahaka?”

Matakepulu tauna ia haere, ia gwau: “Lau itaia taunimanima, idia be au bamona, idia loaloa.” Iesu ese ena imana ia atoa unai tau ena matana dekenai, bena tau ena matana ia kehoa, ia itaia namonamo totona. Iesu ese unai tau ia siaia lao iena ruma dekenai bona ia oda henia, hanua lalonai ia vareai lasi.

Iesu mai ena hahediba taudia ese unai gabu idia rakatania bona Kaisarea Filipi hanuana dekenai idia lao. Unai hanua dekenai ia lao dalana ena lata be kilomita 48 bamona, bona davara gabuna amo ia be mita 355 bamona ia daekau. Reana dina rua lalonai idia raka.

Idia loaloa lalonai, Iesu be ena hahediba taudia amo ia raka siri bona ma gabu ta dekenai ia lao ia guriguri totona. Unai negai, hua 9 o 10 sibona idia do noho ema bona idia hamasea, unai dainai Iesu ese ena hahediba taudia ia laloa momo. Taunimanima momo ese Iesu idia rakatania vadaeni. Ma taunimanima haida idia daradara bona idia lalohisihisi, badina haida ese dala idia tahua Iesu be king ai idia halaoa totona, to Iesu ia ura lasi. Danu, Iesu ena inai taudia idia gwau-edeede bona Iesu idia hamaoroa, toa ta amo ia hamomokania ia be king, to Iesu ese toa ta ia karaia lasi. Iena aposetolo taudia edia lalohadai Iesu dekenai be dahaka? Idia be Iesu ia guriguri gabuna dekenai idia raka mai neganai, Iesu ia henanadai, ia gwau: “Taunimanima idia gwau lau be daika?”

Idia haere idia gwau: “Haida be Ioane Bapatiso idia gwau, haida be Elia, haida be Ieremia, ma haida idia gwau oi be peroveta tauna ta.” Oibe, idia laloa Iesu be unai taudia ta bona ia toreisi lou!

Iesu ia nanadaia ia gwau, “To umui be dahaka umui gwau, lau be daika?”

Petro ia haere haraga ia gwau: “Oi be Keriso, Mauri Diravana ena Natuna.”

Iesu ese Petro ia hanamoa unai bamona ia haere dainai. Bena ia gwau: “Lau hamaoroa oi, oi be Petero, bona inai nadi badana latanai lauegu ekalesia do lau haginia, bona Hade ena iduara danu ese ekalesia do ia hadarerea diba lasi.” Unai hereva amo, Iesu ia hahedinaraia, kongregesen ta do ia haginia bona ena memba taudia be mai edia kamonai danu tanobada dekenai idia raka maoromaoro murinai, mase ese do ia guia lasi. Bena Petro ia hamaoroa ia gwau: “Guba Basileia ena ki do lau henia oi.”

Unai hereva amo Iesu ia hahedinaraia Petro ese hahenamo idaudia haida do ia abia. To, ita gwau lasi Petro ese dagi badana ia abia, hegeregere ia be aposetolo ginigunana, bona danu ia be kongregesen ena badina ia halaoa lasi. Iesu be nadi badana ta bamona, iena kongregesen be ia latanai do idia haginia. To Petro ese ki toi do ia abia, bona unai ki amo dala do ia kehoa taunimanima besedia idauidau be guba Basileiana lalonai do idia vareai totona.

Petro ese unai ki ginigunana ia gaukaralaia Pentekoste 33 C.E. ai. Unai negai, helalo-kerehai Iuda taudia ia hamaorodia dahaka do idia karaia hahemauri do idia abia totona. Nega sisina murinai, ki iharuana ia gaukaralaia bona abidadama Samaria taudia edia dala ia kehoa guba Basileiana lalonai do idia vareai totona. Bena lagani 36 C.E.ai, ki ihatoina ia gaukaralaia bona unai dala be kopina utua lasi Idau Bese taudia, Korenelio bona ena turadia, dekenai ia kehoa.

Iesu ese ena hahediba taudia ia hereva henidia noho. Idia lalohisihisi, badina idia ia hamaoroa nega sisina murinai, Ierusalem dekenai hisihisi do ia ania bena do ia mase. Idia lalo-parara lasi Iesu be lauma tauna bamona do ia toreisi lou bona guba dekenai do ia lao. Unai dainai, Petro ese Iesu ia hakaua siri, bona ia gwau: “Lohiabada e, unai bamona lasi. Unai bamona do idia karaia lasi oi dekenai.” Iesu ese ena vairana ia giroa, ia haere ia gwau: “Satani e, lauegu murina kahana oi lao. Lau hamorua totona oi hereva, badina oiemu laloa be Dirava ena lasi, to taunimanima edia.”

Hahediba taudia sibona lasi, to ma taunimanima haida danu be Iesu ida idia loaloa, unai dainai Iesu ese idia iboudiai ia boiria bona ia hamaorodia do idia hekwarahi ia murinai idia raka totona. Ia gwau: “Tau ta bema ia ura lauegu murina dekenai do ia raka, ia sibona ena ura do ia laloa lasi, iena satauro do ia huaia, lauegu murina dekenai do ia raka. Badina be sibona ena mauri do ia dogoatao noho tauna be ena mauri do ia halusia, to sibona ena mauri do ia halusia lau totona tauna be ena mauri do ia davaria.”

Oibe, Iesu ena murinai idia raka taudia idia gari lasi bona sibona edia ura idia dadaraia be gau badana, bena do idia hegeregere Iesu ese ia lalo-namo henidia totona. Ia gwau: “Bema tau ta lau dainai ia hemarai, o lauegu hereva dainai ia hemarai, inai Dirava ura lasi bona kara dika taunimanima vairanai, Taunimanima ena Natuna danu unai tau dekenai do ia hemarai, iena giroa mai neganai, Tamana ena siahu mai aneru helagadia danu.” Mareko 8:​22-38; Mataio 16:​13-28, NW; Luka 9:​18-27.

◆ Dahaka dainai Iesu ese iena hahediba taudia ia laloa momo?

◆ Taunimanima edia lalohadai idauidau Iesu dekenai be dahaka?

◆ Iesu ese dahaka ki haida be Petro ia henia, bona Petro ese unai ki edena bamona ia gaukaralaidia?

◆ Petro ese dahaka sisiba ia abia, bona dahaka dainai?