Dika Gwauatao Ena Namo

Iesu ese tadikaka rua huanai hekwakwanai hamaoromaoroa dalana ia herevalaia neganai, Petero ia kamonai. To Petero ia ura diba nega hida ta be unai bamona do ia karaia.

Petero ia henanadai: “Lohiabada e, egu tadikaka be lau dekenai ia kara dika neganai, nega hida ena dika do lau gwauatao? Nega 7, a?” Tomadiho gunalaia taudia haida idia gwau ta ena kara dika be nega toi ita gwauatao be maoro. Unai dainai reana Petero ia laloa bema ena tadikaka ena dika be “nega 7” ia gwauatao, unai be hebogahisi karana.​—Mataio 18:21.

To, ta ia kerere negadia ta ta ita duahia karana be Iesu ena hahediba herevana hegeregerena lasi. Unai dainai Petero ia hamaoromaoroa, ia gwau: “Oi lau hamaoroa, nega 7 lasi to nega 77.” (Mataio 18:22) Anina be nega ibounai dika ita gwauatao be namo. Unai dainai Petero ese ena tadikaka ena dika be hanaihanai do ia gwauatao.

Bena Iesu ese Petero bona ma haida dekenai parabole ta ia gwauraia, dika gwauatao karana ena namo hahedinaraia totona. Ia ese iena biaguna ena hebogahisi karaia ia tohotohoa lasi hesiai tauna ia gwauraia. King ia ura ena hesiai taudia ida edia abitorehai ia hamaoromaoroa. Ia dekenai hesiai tauna ta idia mailaia, ia be 10,000 talent [60 milioni denario] ia abitorehai. To ia be dala lasi unai moni ia haloua totona. Unai dainai king ese oda ia henia, unai hesiai tauna, ena adavana, bona ena natudia do idia hoihoilaia, bona abitorehai davana do idia abia. Vadaeni hesiai tauna be ena biaguna ena aena badinai ia tui diho bona ia noinoi: “Mani nega oi henia lau dekenai bona emu abitorehai ena davana ibounai do lau karaia.”​—Mataio 18:26.

King ese hesiai tauna ia hebogahisi henia dainai, ena abitorehai badana ia laloaboio. King be unai ia karaia murinai, inai hesiai tauna ia lao bona ia amo denario 100 ia abitorehai hesiai tauna ta ia davaria. Ia dogoatao bena ena aiona ia gigia, ia gwau: “Emu abitorehai davana oi karaia.” To ia abitorehai hesiai tauna be ena bamona ena aena badina ia tui diho bona ia noinoi: “Mani nega oi henia lau dekenai bona emu abitorehai davana do lau karaia.” (Mataio 18:28, 29) To king ese ena abitorehai ia gwauatao hesiai tauna be ena biaguna ia tohotohoa lasi. Herevana ena bamona ese ia amo ia abitorehai monina be maragi, to dibura ruma ai ia atoa ela bona ena abitorehai ia haloua.

Iesu ia gwau hesiai taudia ma haida ese unai hebogahisi lasi karana idia itaia bena idia lao bona king idia hadibaia. King ia badu bona unai hesiai tauna ia boiria, ia gwau: “Hesiai tauna dikana e, lau oi noia neganai, emu abitorehai ibounai lau gwauatao. Oi lau hebogahisi henia hegeregerena, oiemu bamona oi hebogahisi henia danu be namo, ani?” King ia badu dikadika bona unai hebogahisi lasi hesiai tauna be dibura ruma ai ia atoa, unuseni do ia noho ela bona ena abitorehai ia haloua. Dokonai Iesu ia gwau: “Lauegu guba Tamana be umui dekenai unai bamona do ia karaia danu, bema umui ta ta emui kudouna amo emui tadikaka edia kerere umui gwauatao lasi.”​—Mataio 18:32-35.

Dika gwauatao karana dekenai unai be sisiba namona! Dirava be iseda kara dika badana ia gwauatao vadaeni. Bema iseda Keristani tadikaka ese ita dekenai ia karaia kererena ida ita hahegeregerea, unai be maragi sibona. Bona Iehova be nega tamona sibona lasi, to nega tausen momo ita ia gwauatao. Iseda tadikaka ena dika ita gwauatao loulou be namo, ena be badina maorona dainai ita maumau. Iesu ena Ororo Harorona ai ia hadibaia bamona, Dirava ese ‘iseda kara dika do ia gwauatao, ita dekenai idia kara dika taudia edia dika ita gwauatao hegeregerena.’​—Mataio 6:12.