Ita Gwauatao Heheni Ena Badina

TA BE oi dekenai kara kererena ta ia karaia, a?— Oi ia haberoa eiava hebogahisi lasi herevana ta ia gwauraia, a?— Hebogahisi lasi dalanai oi ia kara henia hegeregerena ia oi kara henia lou be namo, a?—

Bema ta ese idia ia hahisia, taunimanima momo ese unai tauna do idia hahisia ena kerere davana idia henia lou totona. To Iesu be ita ia hadibaia ita dekenai idia kerere taudia edia dika ita gwauatao be namo. (Mataio 6:​12) To bema ta be nega momo hebogahisi lasi dalanai ita ia kara henia, be edena bamona? Nega hida ia do ita gwauatao be namo?—

Petero be ia ura unai ia diba. Unai dainai dina ta Iesu ia nanadaia: ‘Iena dika be nega 7 do lau gwauatao, a?’ To nega 7 be hegeregere lasi. Iesu ia gwau: ‘Nega 70 x 7 iena dika do oi gwauatao,’ bema nega momo oi dekenai ia kara dika.

Unai be nega momo herea! Ta ese ita ia habadua eiava ita dekenai ia gwauraia hereva kererena eiava ia karaia kara kererena ibounai ita laloatao diba lasi, ani? Unai hereva amo Iesu be ita dekenai ia hadibaia gauna be inai: Namo lasi ma haida ese ita dekenai idia karaia kerere ibounai ita laloatao. Bema ita idia noia edia dika ita gwauatao totona, namona be ita gwauatao.

Iesu ia ura ena hahediba taudia dekenai ia hahedinaraia ma haida edia dika gwauatao karana be mai anina bada. Unai dainai, Petero ena henanadai ia haerelaia murinai, ena hahediba taudia dekenai sivarai ta ia gwauraia. Oi ura oi kamonai, a?—

Guna negana ai, king namona ta ia noho. Ia be hebogahisi tauna. Iena hesiai taudia ese heduru idia abia be namo neganai, moni ia henidia. To dina ta king ia ura ena hesiai taudia be ia amo idia abia monina idia haloua. Hesiai tauna ta idia hakaua vareai king ena vairana dekenai, ia be king amo 1,000,000 kina ia abiatorehai. Unai be moni bada herea!

To hesiai tauna ese king ena moni ibounai ia haorea dainai, ia hegeregere lasi ia haloua totona. Unai dainai king ese oda ia henia unai hesiai tauna do idia hoihoilaia. Danu, king ia gwau unai hesiai tauna ena adavana bona ena natudia bona ena gau ibounai do idia hoihoilaia. Bena, idia abia monina amo king ena moni idia haloua diba. Oi laloa unai hereva dainai hesiai tauna ena hemami be edena bamona?—

King vairanai ia tui diho bona ia noinoi: ‘Mani emu kara, nega sisina do oi henia lau dekenai, vadaeni abiatorehai ena davana ibounai do lau henia lou oi dekenai.’ Bema oi be unai king, unai hesiai tauna dekenai dahaka do oi karaia?— King ese ena hesiai tauna ia hebogahisi henia. Unai dainai king ese ena dika ia gwauatao. Hesiai tauna ia hamaoroa moni ta do ia haloua lasi, ia abiatorehai 1,000,000 kina danu. Unai ese hesiai tauna ia hamoalea momokani!

Gabeai, unai hesiai tauna be dahaka ia karaia? Ia raka murimuri dekenai bona hesiai tauna ma ta ia davaria, ia amo guna 5 kina ia abiatorehai. Vadaeni iena aiona ia dogoatao bona ia gigia, ia gwau: ‘Lau dekenai oi abiatorehai 5 kina oi henia lou lau dekenai!’ King ese ena abiatorehai ia laloaboio murinai, unai bamona ia karaia tauna ta oi laloa diba, a?—

Kina 5 ia abiatorehai hesiai tauna be ogogami tauna. Ia abiatorehai monina be ia haloua haraga diba lasi. Unai dainai ena bamona ena aena badinai ena kwarana ia atoa diho bona ia noinoi: ‘Mani emu kara, nega sisina do oi henia lau dekenai, vadaeni abiatorehai ena davana do lau henia lou oi dekenai.’ Unai tauna be ena bamona dekenai nega sisina do ia henia be namo, a?— Bema unai be oi, dahaka do oi karaia?—

Unai tauna ese hebogahisi ia hahedinaraia lasi, king ia karaia bamona. Ia ura ena moni do ia abia haraga. Bona ena bamona ese ena abiatorehai ia haloua diba lasi dainai, dibura rumana dekenai ia atoa. Hesiai taudia ma haida ese idia vara gaudia ibounai idia itaia, bona idia ura henia lasi. Dibura dekenai ia noho hesiai tauna idia hebogahisi henia. Unai dainai idia lao bona king dekenai ia vara gauna idia gwauraia.

King ese ia vara gauna ia ura henia lasi danu. Dika ia gwauatao lasi hesiai tauna ena kara dainai ia badu dikadika. Unai dainai ia boiria bona ia hamaoroa: ‘Oi be hesiai tauna dikana, oiemu abiatorehai ena davana ibounai lau gwauatao, ani? Unai dainai oiemu bamona ena davana oi gwauatao be namo, ani?’

Unai hebogahisi lasi hesiai tauna be unai king namona ena kara amo gau ta ia dibaia be namo. To gau ta ia dibaia lasi. Unai dainai king ese unai hesiai tauna be dibura ruma dekenai ia atoa, bona unuseniai do ia noho ela bona king ena 1,000,000 kina ia haloua. Bona momokani, dibura ruma dekenai ia noho dainai moni ia haboua diba lasi king dekenai ia henia lou totona. Unai dainai unuseniai do ia noho ela bona ia mase.

Iesu be unai sivarai ia gwauraia murinai, iena murinai idia raka taudia dekenai ia gwau: “Egu Tamana guba dekenai ia noho be unai bamona do ia karaia umui dekenai, bema umui ta ta emui kudouna dekenai emui tadikakana edia dika do umui gwauatao lasi neganai.”​—Mataio 18:​21-​35.

Iseda abiatorehai Dirava dekenai be bada herea. Momokani, iseda mauri be Dirava amo! Unai dainai iseda abiatorehai Dirava dekenai ita laloa neganai, taunimanima ese ita amo idia abiatorehai gaudia be maragi. Ia be hegeregere hesiai tauna ese ena bamona amo ia abiatorehai 5 kina bamona. To iseda abiatorehai Dirava dekenai, ita karaia kerere dainai, be hesiai tauna ese king dekenai do ia haloua 1,000,000 kina bamona.

Dirava be hebogahisi tauna. Ena be kara kerere ita karaia, to iseda dika ia gwauatao. Ita amo iseda abiatorehai ena davana ia abia totona, iseda mauri ia kokia lasi. To ita dibaia gauna be inai: Dirava ese iseda dika ia gwauatao bema ita dekenai idia kara kerere taudia edia dika ita gwauatao. Unai ita laloa be namo, ani?—

Unai dainai bema ta be oi dekenai hebogahisi lasi karana ta ia karaia, to gabeai sori herevana ia gwauraia, dahaka do oi karaia? Iena kerere do oi gwauatao, a?— Bema nega momo unai bamona ia karaia be edena bamona? Iena dika do oi gwauatao noho, a?—

Bema ita ese ma ta ita noia iseda dika ia gwauatao totona, do ita ura unai tauna ese eda dika ia gwauatao, ani?— Unai dainai ia dekenai unai bamona ita karaia danu be namo. Namo lasi iseda uduna dekena amo ita gwau sibona iena dika ita gwauatao, to iseda kudouna amo ia ita gwauatao be namo. Unai bamona ita karaia neganai, ita hahedinaraia ita ura Hadibaia Tauna Badana ena murinai ita raka.