Iesu Ese Moale Ena Badina Ia Hahedinaraia

Iesu be guriguri dalana ia hadibaia lou, to iena haroro gaukara lalonai ia be gau ma haida ia hadibaia danu. Galilea ai hoa karadia ia karaia neganai, taunimanima idia gwau ia be demoni edia lohia tauna ena siahu amo unai ia karaia. Hari Iudea ai unai ia vara lou.

Demoni ese tau ta ia biagua dainai, ia hereva diba lasi. Iesu ese unai demoni ia lulua neganai, hutuma idia hoa. To iena inai taudia idia hoa lasi. Idia ese unai samania hereva koikoina idia gwauraia lou: “Ia be demoni edia lohia, Belesebulo, ena siahu amo demoni ia luludia.” (Luka 11:15) Ma haida be idia ura hamomokania Iesu be daika, unai dainai idia noia guba amo toa ta do ia karaia.

Iesu ia diba idia ura ia idia tohoa dainai, Galilea ai ia henia haere be iniseniai ia henia danu. Ia gwau, basileia ta be sibona ia parara neganai, do ia moru, bena ia nanadaidia: “Bema Satani be sibona ia heatu henia, ena basileia be edena bamona do ia gini?” Bena maoromaoro ia hamaorodia: “Bema lau be Dirava ena siahu amo demoni lau luludia, anina be Dirava ena Basileia be ia mai vadaeni, to umui itaia lasi.”​—Luka 11:18-20.

Iesu ese “Dirava ena siahu” ia herevalaia neganai, iena kamonai taudia ese guna Israela dekenai idia vara gaudia idia laloa lou. Farao ena ariara ai Mose ese ia karaia hoa karana idia itaia taudia idia gwau: “Inai be Dirava ena siahu dainai ia vara!” Danu, “Dirava ena ima kwakikwaki” ese nadi palaka rua latanai Taravatu Ten ia torea. (Esodo 8:19; 31:18) Unai hegeregerena, Iesu be“Dirava ena siahu”—lauma helaga, o gaukara siahuna—amo demoni ia luludia bona gorere taudia ia hanamoa. Unai ese ia hamomokania, Dirava ena Basileia be unai inai taudia dekenai ia mai vadaeni, badina Basileia ena King, Iesu, be idia huanai unai hoa karadia ia karaia.

Iesu be lauma dikadia ia lulua diba, unai ese ia hamomokania iena siahu ese Satani ena siahu ia hereaia. Iesu ese tau ta amo ia raka-lasi lauma dikana ena haheitalai ia gwauraia lou. Bema unai tauna be ena lalona ai lalohadai namodia ia atoa lasi, vadaeni unai lauma dikana be lauma dikadia 7 ida do ia lou mai bona unai tauna ena mauri do idia hadikaia momokani, guna bamona lasi. (Mataio 12:22, 25-29, 43-45) Israela besena dekenai unai bamona ia vara noho.

Iesu ena hereva ia kamonai noho hahine ia gwau: “Oi ia havaraia bona oi dekenai rata ia henia hahinena be ia moale!” Iuda hahine idia ura bada peroveta tauna ena sinana ai idia lao, hegeregere Mesia. Unai dainai inai hahine ia laloa Maria ia moale diba, badina ia be inai hadibaia tauna namona ena sinana. To Iesu ese unai hahine ena lalohadai ia hamaoromaoroa bona moale korikori ena badina ia hahedinaraia, ia gwau: “Lasi, Dirava ena hereva idia kamonai bona badinaia taudia be idia moale!” (Luka 11:27, 28) Iesu be nega ta ia gwau lasi taunimanima ese Maria do idia hanamoa. Ta be moale korikorina ia davaria diba bema Dirava ia abidadama henia, to iena ruma bese o ia hagugurua gaudia amo lasi.

Galilea ai ia karaia bamona, Iesu ese Iuda taudia ia gwau henia, badina idia ura guba amo toa ta ia karaia. Ia hamaorodia toa ta do ia hahedinaraia lasi, to “Iona ena toa sibona.” Iona be toa, badina dina toi gwarume ena bogana lalonai ia noho, bona gabeai mai gari lasi ida Nineva taudia ia haroro henidia bona idia helalo-kerehai. Iesu ia gwau: “To kamonai! Iona ia hereaia tauna be iniseniai.” (Luka 11:29-32) Iesu ese Solomona ia hereaia danu, Solomona ena aonega bada dainai Sieba ena kwini ese ia vadivadi henia.

Iesu ma ia gwau: “Ta be lamepa ia gabua murinai, hehuni gabuna ta eiava bosea ta amo ia koua lasi, to lamepa atoa gauna dekenai ia atoa.” (Luka 11:33) Reana Iesu ena hereva ena anina be, idia ia hadibaia bona edia vairanai hoa karadia ia karaia be hegeregere ta ese lamepa ena diari ia hunia. Edia matana be gau tamona sibona ia itaia lasi dainai, hoa karadia edia anina korikori idia lalopararalaia lasi.​—Luka 11:34.

Iesu ese tau ta amo demoni ia lulua bona ia herevahereva diba. Namona be unai ese taunimanima ia hagoadaia Dirava idia hanamoa bona ma haida dekenai Iehova ese ia hagugurua gaudia idia harorolaia totona. Unai dainai Iesu be ia idia gwauraia dika taudia dekenai ia gwau: “Unai dainai do oi naria namonamo, unai amo oi lalonai ia noho diari be ia dibura lasi. Bema emu tauanina ibounai ia diari bona ena kahana ta ia dibura lasi, ibounai be do ia diari, lamepa ese oi dekenai diari ia henia bamona.”​—Luka 11:35, 36.