Lasaro Ia Toreisi lou

Betania badinai, Iesu ese Mareta bona Maria ia hedavari henia murinai, Lasaro ena guria gabuna dekenai idia lao. Unai be nadi kohua ta bona nadi ta amo ena iduara idia koua. Iesu ia gwau: “Nadi umui kokia.” Mareta ia laloa momo, ia diba lasi Iesu be dahaka do ia karaia. Ia gwau: “Lohiabada e, ena tauanina be ia bonana vadaeni, badina hari be dina namba 4 vadaeni.” To Iesu ese ia hamaoroa: “Oi lau hamaoroa vadaeni, bema oi abidadama, Dirava ena hairai do oi itaia, ani?”​—Ioane 11:39, 40.

Vadaeni nadi idia kokia. Bena Iesu be guba ia itaia bona ia guriguri: “Tamagu e, oi lau tanikiu henia badina lau oi kamonai henia. Lau diba oi be hanaihanai lau oi kamonai henia, to lau idia hagegea hutuma dainai lau hereva, unai amo do idia abia dae oi ese lau oi siaia.” Iesu be taunimanima vairanai ia gwauraia guriguri amo ia hahedinaraia do ia karaia gauna be Dirava ena siahu amo do ia karaia. Bena Iesu be mai gado bada ida ia boiboi: “Lasaro e, oi raka-lasi!” Bona Lasaro ia raka-lasi, iena imana bona aena idia kumia dabua idia do noho bona ena vairana be dabua ese ia koua. Iesu ia gwau: “Dabua umui ruhaia bona do ia raka.”​—Ioane 11:41-44.

Maria bona Mareta edia lalona hagoadaia totona idia mai Iuda taudia momo be unai hoa karana idia itaia dainai, Iesu idia abidadama henia. To haida be idia lao bona Iesu ia karaia gauna be Farisea taudia dekenai idia gwauraia. Vadaeni Farisea taudia bona hahelaga tau badadia be Iuda taudia edia kota badana, Sanhedrin, lalonai idia hebou. Unai orea lalonai hahelaga tauna badana, Kaiapa, ia noho. Idia haida idia gwau: “Dahaka do ita karaia, badina inai tauna ese toa karadia momo ia karaia? Bema gau ta ita karaia lasi, idia ibounai be ia do idia abidadama henia, bona Roma taudia do idia mai bona iseda gabu bona iseda bese do idia abia.” (Ioane 11:47, 48) Ena be Dirava be Iesu amo “toa karadia momo” ia karaia bona unai idia itaia taudia amo unai sivarai idia kamonai, to idia moale lasi. Idia be edia dagi bona siahu sibona idia laloa bada.

Iesu ese Lasaro ia hatorea isi lou neganai, Sadukea taudia idia moale lasi, badina toreisi lou idia abia dae lasi. Sadukea tauna, Kaiapa, ia gwau: “Umui be gau ta umui diba lasi, bona umui laloparara lasi, emui namo totona tau tamona be taunimanima ibounai totona ia mase be namo, unai amo bese ibounai be dika do idia davaria lasi.”​—Ioane 11:49, 50; Kara 5:17; 23:8.

Kaiapa be hahelaga tauna badana dainai, Dirava ese ena lalona ai unai hereva ia atoa, ia be “sibona ena lalohadai ia gwauraia lasi.” Kaiapa ia ura Iesu do ia mase, badina ia gari dika taunimanima ese Iuda tomadiho gunalaia taudia badinaia karana do idia hadokoa. To Kaiapa ena peroveta herevana amo ia hahedinaraia Iesu ia mase neganai, ia be Iuda taudia sibona totona lasi, to “Dirava ena natudia gabu idauidau dekenai idia noho taudia” totona danu mauri davana do ia henia.​—Ioane 11:51, 52.

Vadaeni Sanhedrin ese Kaiapa ena lalohadai idia abia dae bona Iesu hamasea dalana idia palanilaia. To Nikodemo, Sanhedrin ena memba ta bona Iesu ena turana, be Iesu dekenai edia palani do ia gwauraia, a? Herevana dahaka, Iesu be karaharaga Ierusalema ia rakatania, badina ia ura lasi Dirava ese ia abia hidi lasi dinana ai do idia hamasea.