Iesu ese Lasaro Ia Hatorea Isi Lou

Iesu ena tura namodia toi be Betania dekenai idia noho. Idia be Lasaro, ena taihudia rua Maria bona Mareta. Dina ta, Iesu be Ioridane ena kahana ma ta ai ia noho neganai, Maria bona Mareta ese Iesu dekenai hereva idia siaia, idia gwau: ‘Lasaro be ia gorere bada. Mani oi mai haraga!’ To Iesu ia lao haraga lasi. Dina rua ia naria bena ena hahediba taudia ia hamaoroa: ‘Betania dekenai ita lao. Lasaro ia mahuta noho, lau lao bona ia do lau hanogaia.’ Aposetolo taudia idia gwau: ‘Bema ia mahuta, ia be do ia namo.’ Unai dainai Iesu be idia dekenai ia hereva hedinarai, ia gwau: ‘Lasaro ia mase vadaeni.’

Iesu be Betania dekenai ia ginidae neganai, Lasaro be idia guria bona dina 4 ia hanaia vadaeni. Taunimanima momo idia mai Maria bona Mareta idia hagoadaia totona. Mareta ia kamonai Iesu ia mai neganai, karaharaga ia hedavari henia totona ia lao. Mareta ia gwau: “Lohiabada e, bema oi be iniseniai oi noho, egu taihuna be do ia mase lasi.” Iesu ese ia hamaoroa: ‘Emu taihuna do ia toreisi lou. Mareta e, unai oi abia dae, a?’ Mareta ia gwau: ‘Lau diba do ia toreisi lou.’ Iesu ese ia hamaoroa: “Toreisi lou be lau bona mauri be lau.”

Bena Mareta ia lao Maria dekenai bona ia hamaoroa: ‘Iesu ia mai vadaeni.’ Maria be Iesu dekenai ia heau lao, bona hutuma be ia murinai idia lao. Bona Iesu ena aena badinai ia goru diho, bona ia taitai. Maria ia gwau: ‘Lohiabada e, bema oi be iniseniai oi noho, egu taihuna be do ia mase lasi!’ Iesu ia itaia Maria ia lalohisihisi bada neganai, ia danu ia tai. Taunimanima idia itaia Iesu ia tai neganai, idia gwau: ‘Itaia, Lasaro ia lalokau henia bada.’ To haida idia gwau: ‘Dahaka dainai ena turana ena mase ia koua diba lasi?’ Iesu be dahaka do ia karaia?

Iesu be ia lao nadi amo idia koua guria gabuna dekenai. Iesu ia gwau: ‘Nadi umui kokia.’ Mareta ia gwau: ‘Lasaro ena tauanina be ia bonana vadaeni, badina hari be dina namba 4.’ To nadi idia kokia, bona Iesu ia guriguri: ‘Tamagu e, oi lau tanikiu henia badina lau oi kamonai henia. Lau diba oi be hanaihanai lau oi kamonai henia, to inai taudia dainai lau hereva badabada, unai amo do idia diba oi ese lau oi siaia.’ Bena ia boiboi badabada: “Lasaro e, oi raka-lasi!” Hoa gauna ia vara: Lasaro be ia idia kumia dabua ida guria gabuna amo ia raka-lasi. Iesu ia gwau: “Dabua umui ruhaia bona do ia raka.”

Unai idia itaia taudia momo ese Iesu idia abidadama henia. To haida idia lao bona Farisea taudia idia hadibaia. Unai nega amo, Farisea taudia idia ura Lasaro bona Iesu idia hamasea. Aposetolo tauna ta, Iuda Iskariote be hehuni dalanai Farisea taudia dekenai ia lao bona idia ia hamaoroa: ‘Bema umui lau durua Iesu umui davaria totona, lau dekenai moni hida do umui henia?’ Idia gwau siliva moni 30 do idia henia, bona Iuda be dala ia tahua Iesu be Farisea taudia dekenai ia henia totona.