Matamata Taudia Idia Bapatiso be Namo, A?

KERISTANI tama ta Philippines amo, ena ladana be Carlos,a ia gwau: “Lau moale bada badina hari egu natuna be Iehova ena hesiai kekenina ta, bona lau diba ia moale danu.” Tama ta Greece amo, ia gwau: “Lau bona egu adavana ai moale, badina emai natudia toi be edia matamata negana lalonai bapatiso idia abia bona Iehova ena Witnes taudia ai idia lao. Hereva momokani dekenai idia goada idia lao bona mai moale ida Iehova idia hesiai henia noho.”

Keristani tama sina idia moale bada edia natudia idia bapatiso neganai, to nega haida idia laloa momo danu. Sina ta ia gwau, “Lau moale bada bona lau laloa momo.” Dahaka dainai unai bamona hemami ia abia? Ia gwau: “Lau laloparara, egu natuna ena kara dainai Iehova ese do ia hahemaoro henia.”

Matamata taudia ibounai ese tahua gauna idia atoa, Iehova ena bapatiso Witnes ai idia lao totona. To, Keristani tama sina idia henanadai, ‘Lau diba egu natuna ia goada, to ia hegeregere matabodaga karadia ia dadaraia bona Iehova vairanai ia goeva totona, a?’ Eiava tama sina ma haida be sibodia idia nanadaia, ‘Egu natuna ese kohu momo tahua karana ena hahetoho ia davaria neganai, mai moale bona ura bada ida Dirava do ia hesiai henia noho, a?’ Baibel ai edena hakaua herevadia ese tama sina ia durua, bena idia diba edia natudia be bapatiso totona idia hegeregere eiava?

Ta be Keriso Ena Hahediba Tauna ai Ia Lao be Namo

Dirava ena Hereva ia gwau lasi ta be edena mauri lagani ai bapatiso do ia abia, to ia hahedinaraia, ia be hahediba tauna ai ia lao neganai, ia hegeregere bapatiso ia abia totona. Iesu be ena murinai idia raka taudia ia hadibaia: “Bese ibounai taudia be hahediba taudia ai umui halaoa.” (Mat. 28:19) Unai dainai, Keriso ena hahediba taudia ai idia lao vadaeni taudia be bapatiso totona idia hegeregere.

Hahediba tauna ena anina be dahaka? Insight on the Scriptures ia gwau: “Unai hereva ena anina be, Keriso ena hahediba hereva idia abia dae sibona lasi, to idia badinaia danu.” Idia matamata momokani taudia be Keriso ena hahediba taudia korikoridia ai idia lao diba, a? Latin America ai, lagani 40 mai kahana misinari gaukara ia karaia taihu ta ese ia bona ena kakana bona tadina kekenidia ia herevalaia neganai, ia gwau: “Ai bada vadaeni bona ai diba ai ura Iehova ai hesiai henia bona Paradaiso lalonai ai noho. Ai bapatiso dainai, unai ese ai ia durua matamata taudia idia davaria hahetoho ai haheaukalaidia totona. Ai maragi neganai Dirava dekenai emai mauri ai gwauhamatalaia, bona unai ai lalohisihisilaia lasi.”

Edena bamona oi diba bema emu natuna be Keriso ena hahediba tauna ta? Baibel ia gwau: “Mero maragina ese iena kara dekena amo, sibona ena mauri ia hedinaraia noho. Iena kara dekena amo do oi diba, unai mero ia goeva bona ia maoro, o lasi.” (Aon. 20:11) Matamata tauna ta ena kara amo do oi diba, ia be hahediba tauna hegeregerena ‘ia goada ia lao.’​—⁠1 Tim. 4:⁠15.

Gau Haida ese Idia Hamomokania Emu Natuna be Hahediba Tauna

Emu natuna ese oi ia kamonai henia, a? (Kol. 3:20) Ia dekenai oi henia ruma gaukara idauidau ia karaia, a? Iesu ena mauri lagani be 12 neganai, Baibel ia gwau: “[Ena tama sina] henunai ia noho.” (Luka 2:51) Hari natudia be hanaihanai tama sina idia kamonai henia lasi. To, Keristani taudia momokanidia be Iesu ena ‘aena gabudia ai do idia raka namonamo.’ Unai dainai, idia ura bapatiso idia abia matamata taudia ese edia tama sina idia kamonai henia be namo.​—⁠1 Pet. 2:⁠21.

Mani inai henanadai idauidau oi laloa: Emu natuna be hesiai gaukara lalonai ‘Basileia ia tahua guna,’ a? (Mat. 6:33) Mai ena ura ida ma haida dekenai sivarai namona ia harorolaia, eiava oi ese oi doria ia haroro totona, a? Ia be bapatiso lasi pablisa dainai, do ia karaia maduna ia diba, a? Ia be mai ena ura ida teritori dekenai ia davaria kamonai taudia ia lou henia, a? Ena sikuli turadia bona tisa taudia dekenai ia hahedinaraia, ia be Iehova ena Witnes tauna ta, a?

Kongrigeisen heboudia lao henia karana ia laloa bada, a? (Sal. 122:⁠1) Gima Kohorona Stadi bona Kongrigeisen Baibel Stadi dekenai haere henia karana ia moalelaia, a? Tiokratik Haroro Sikuli lalonai mai ena ura ida kahana ia henia, a?​—⁠Heb. 10:​24, 25.

Emu natuna ia hekwarahi sikuli ai bona gabu ma haida ai matabodaga karadia bona hebamo dikadia ia dadaraia totona, a? (Aon. 13:20) Ia be edena bamona miusiki, muvi, TV program, bona vidio gadara ia ura henia? Eiava Intanet ai edena gaudia ia tahua momo? Ena kara bona hereva amo ia hahedinaraia ia ura Baibel ena taravatu ia badinaia, a?

Emu natuna be Baibel ia diba namonamo, a? Ruma Bese Ena Tomadiho lalonai ia dibaia gaudia be sibona ena hereva dalana amo ia gwauraia, a? Baibel ena hereva momokani badadia ia gwauraia hedinarai diba, a? (Aon. 2:​6-9) Baibel duahiduahi bona igui hesiai tauna mai ena kamonai bona mai ena kara maoromaoro ese ia halasia Baibel bukadia duahia karana ia ura henia, a? (Mat. 24:45) Baibel ena hahediba herevadia bona siridia ia henanadailaia, a?

Unai henanadai idauidau amo do oi diba, emu natuna be ia goada ia lao eiava lasi. Unai oi lalohadailaia murinai, reana oi laloa emu natuna ena kara haida ia haidaua guna be namo, gabeai bapatiso ia abia. To, bema ena mauri lalonai hahediba tauna ena kara ia hahedinaraia, bona Dirava dekenai ia gwauhamata, vadaeni ia oi koua lasi bapatiso ia abia totona.

Matamata Taudia ese Iehova Idia Hanamoa

Dirava ena hesiai taudia momo be edia matamata negana lalonai, Dirava idia abidadama henia bona badinaia. Idia haida be inai: Iosepa, Samuela, Iosaia, bona Iesu. (Gen. 37:2; 39:​1-3; 1 Sam. 1:​24-28; 2:​18-20; 2 Siv. 34:​1-3; Luka 2:​42-49) Bona Filipo ena natuna kekeni foa be peroveta gaukara idia karaia, toana be idia maragi negana amo edia tamana ese ia hadibadia namonamo.​—⁠Kara 21:​8, 9.

Greece ai, Witnes merona ta ia gwau: “Lauegu mauri lagani be 12 neganai, lau bapatiso. Lau karaia abia hidi dainai, lau lalohisihisi lasi. Unai nega amo lagani 24 idia hanaia vadaeni, to unai lagani 24 amo 23 be ful-taim hesiai gaukara lau karaia. Egu lalokau Iehova dekenai ese hanaihanai lau ia durua, matamata taudia idia davaria hekwakwanai lau hanaidia totona. Egu mauri lagani be 12 neganai, Baibel dekenai gau momo lau diba lasi, to hari gau momo lau dibaia. Lau diba Iehova lau lalokau henia bona lau ura ia lau hesiai henia hanaihanai. Lau moale badina Iehova ena heduru dainai Ia lau hesiai henia noho.”

Ena be ta be ia buruka o matamata, to bema hahediba tauna korikorina ena kara ia hahedinaraia, bapatiso ia abia be namo. Aposetolo Paulo ia gwau: “Tau ta be ena kudouna ai ia abidadama neganai, ia be kara maoromaoro tauna ai ia lao, to ena uduna amo unai abidadama ia gwauraia hedinarai neganai, ia be hahemauri do ia abia.” (Roma 10:10) Keristani mero o kekeni matamata ia bapatiso neganai, ia bona ena tama sina dekenai unai be mai anina bada gauna. Namo lasi gau ta ese oi eiava emu natuna ia koua unai umui moalelaia hebou totona.

[Footnote]

[Box on page 5]

Bapatiso Dekenai Lalohadai Maorona Abia

Tama sina haida idia laloa edia natudia idia bapatiso be mai anina, to idia gari, dika gabeai edia natudia ese Baibel ena taravatu ta idia utua. To bapatiso bona hesiai gaukara helagana ese ta ena vaira nega ia hadikaia diba, a? Baibel ia gwau, lasi. Aonega Herevadia 10:22 ia gwau: “Lohiabada ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.” Bona Paulo be mero matamata Timoteo ia tore henia, ia gwau: “Oibe, Dirava badinaia karana lalonai gau momo do ita abia, bema ita abia dae ita dekenai idia noho gaudia be hegeregere.”​—⁠1 Tim. 6:⁠6.

Momokani, Iehova hesiai henia be mai ena hekwarahi. Ieremia be Dirava ena peroveta tauna, to hekwakwanai momo ia davaria. To Dirava momokani tomadiho henia karana ia herevalaia neganai, ia gwau: “Oiemu hereva ese lau ia hamoalea momokani, badina be, Lohiabada, Siahu Ibounai Diravana, lau be oiemu.” (Ier. 15:16) Ieremia ia diba Dirava hesiai henia karana ese moale ia havaraia. To, Satani ena tanobada ese metau idauidau ia havaraia. Gau badana be tama sina ese edia natudia idia durua unai idia diba totona.​—⁠Ier. 1:⁠19.

[Box/Picture on page 6]

Egu Natuna Ena Bapatiso Negana Ia Haidaua be Namo, A?

Nega haida, ena be natudia be bapatiso totona idia hegeregere vadaeni, to edia tama sina ese bapatiso negana idia haidaua. Dahaka dainai?

Lau gari, dika egu natuna ia bapatiso bona gabeai kara dika ta ia karaia bona orea amo do idia atoa siri. To bema matamata tauna ta ese iena bapatiso negana ia haidaua, ita gwau diba ia be Dirava ese do ia hahemaoro henia lasi, a? Solomona be matamata taudia dekenai inai ia gwauraia: “Do oi laloaboio lasi, inai kara ibounai dainai Dirava ese oi do ia kota henia.” (Had. 11:⁠9) Paulo ese matamata bona buruka taudia dekenai ia gwau: “Dirava ese ita ibounai ta ta be iseda kara hegeregerena do ia hahemaoro henia.”​—⁠Roma 14:⁠12.

Bapatiso eiava bapatiso lasi pablisa taudia ibounai be Dirava ese do ia hahemaoro henia. Laloaboio lasi, Iehova ese ena hesiai taudia ia gimaia, ia ese ‘dala ia kehoa lasi edia goada ia hereaia hedibagani idia davaria totona.’ (1 Kor. 10:13) To bema ‘idia laloa maoromaoro’ bona hedibagani idia dadaraia, Dirava ese idia do ia durua. (1 Pet. 5:​6-9) Keristani sina ta ia gwau: “Idia bapatiso vadaeni natudia be badina momo dainai, tanobada ena dika gaudia amo idia gini siri. Egu natuna mero ena mauri lagani be 15 neganai bapatiso ia abia, ia mamia bapatiso be gimaia gauna ta. Egu natuna ia gwau, ‘Do oi ura lasi Iehova ena taravatu oi utua.’ Bapatiso ese ena lalona ia hagoadaia, kara maoromaoro ia karaia totona.”

Bema emu kara bona haheitalai amo emu natudia oi hadibaia Iehova idia kamonai henia totona, vadaeni oi diba momokani, idia bapatiso murinai unai do idia karaia noho. Aonega Herevadia 20:7 ia gwau: “Bema tamana ta be kara maoromaoro tauna, bona iena kara ibounai, be mai laloa maoromaoro danu ia karaia neganai, unai tau ena natuna taudia, be mai moale danu do idia noho.”

Lau ura egu natuna ese tahua gaudia haida ia hagugurua guna. Matamata taudia ese gaukara karaia daladia idia dibaia be namo, unai amo gabeai sibodia idia naria diba. To oi naria namonamo, namo lasi idia oi hagoadaia edukeisen bona moni gaukara sibona idia laloa bada, to tomadiho momokanina lasi. Iesu ese “uhe” eiava Basileia ena hereva ia gwauraia neganai, ia gwau: “To ginigini huanai idia hadoa gauna be, tau ta ese Basileia ena hereva ia kamonai, to inai nega oromana ena lalohekwarahi gaudia bona taga ena koikoi siahuna ese Basileia ena hereva ia koua bena huahua ia atoa lasi.” (Mat. 13:22) Bema matamata ta ena mauri lalonai tanobada gaudia ia tahua guna, bona ena hetura karana Iehova ida ia laloa maragi, unai ese iena ura Dirava hesiai henia totona do ia hamaragia.

Natudia haida be bapatiso totona idia hegeregere, to edia tama sina ese idia koudia. Elda ta ese unai ia herevalaia neganai, ia gwau: “Bema tama sina ese bapatiso ia ura abia matamata tauna idia koua, unai ese ena lalona ia hamanokaia diba bona lauma dalanai do ia manoka.” Bona loaloa naria tadikaka ta ia gwau: “Matamata ta be reana do ia laloa hereva momokani lalonai ia goada ia lao diba lasi eiava ia hegeregere lasi. Reana moale davaria totona, tanobada gaudia do ia tahua matamaia.”

[Picture]

Iunivesiti edukeisen do oi tahua guna, a?

[Picture on page 3]

Matamata ta ena kara amo ia hahedinaraia, ia be hahediba tauna vadaeni

[Pictures on page 3]

Hebou totona ia hegaegae bona haere ia henia

[Picture on page 4]

Tama sina ia kamonai henia

[Picture on page 4]

Haroro gaukara ia karaia

[Picture on page 4]

Sibona ia guriguri