Lalohisihisi​—“Bema [Ita] be Badina ta Dainai Ma Ta Dekenai [Ita] Maumau”

OI DANU be Linda bamona oi laloa, a? Madi, haida edia kara dainai ma haida idia lalohisihisi bena Iehova bona kongrigeisen idia rakatania. Oi danu be unai bamona, a?

Ta ese “Dirava Ena Lalokau” amo Ita Ia Hapararaia be Namo, A?

Momokani, ita ia hahisia tadikaka o taihu ena dika ita gwauatao be ia auka. To, Keristani taudia idia lalokau heheni be namo. (Ioane 13:34, 35) Bema tadikaka o taihu ta ese ita ia gwauraia dika, do ita lalohisihisi bada.​—Salamo 55:12.

Oibe, Baibel ia gwau, nega haida Keristani tauna ta “be badina ta dainai ma ta dekenai ia maumau.” (Kolose 3:13) Ita dekenai unai ia vara neganai, reana do ita lalohisihisi bada. To, dahaka ese ita ia durua diba? Baibel ena hakaua herevadia toi mani ita laloa:

Iseda guba Tamana be gau ibounai ia itaia. Iehova ese ita idia hahisia taudia bona idia vara gaudia ibounai ia itaia. (Heberu 4:13) Bona hisihisi negadiai, Iehova be ita dekenai ia hebogahisi. (Isaia 63:9) Ia ura lasi “hisihisi, eiava metau,” o gau ma ta “ese ita be Dirava ena lalokau . . . amo, ita ia hapararaia diba.” (Roma 8:35, 38, 39) Unai hegeregerena, namo lasi gau ta o tau ta ese Dirava ena lalokau amo ita ia hapararaia.

Ta ena dika ita gwauatao anina be ita gwau lasi iena kara be kerere lasi. Ita ia hahisia tauna ena dika ita gwauatao neganai, anina be ita gwau lasi ena kara dika ita laloa maragi o iena kara be kerere lasi. Laloatao, Iehova be kara dika ia abia dae lasi, to bema kerere tauna ia helalo-kerehai momokani, iena dika ia gwauatao. (Salamo 103:12, 13; Habakuku 1:13) Iehova be ita ia noia ia ita tohotohoa totona, anina be ita ia hagoadaia ma haida edia dika ita gwauatao totona. “Iena badu be hanaihanai do ia noho lasi.”​—Salamo 103:9; Mataio 6:14.

Ita badu lasi neganai, namo ita davaria. Edena dala ai? Haheitalai ta mani oi laloa. Nadi ta oi abia isi​—reana ia metau momokani lasi​—bona emu imana oi toia roro, nadi be oi dogoatao. Reana emu imana ia hisihisi, ena be nega sisina lalonai nadi oi dogoatao. To bema nega daudau lalonai nadi oi dogoatao be edena bamona? Miniti haida o hora tamona o momo lalonai nadi oi dogoatao diba, a? Emu imana do ia hisihisi bada! Momokani, nadi ena metau do ia idau lasi. To bema nadi oi dogoatao daudau, oi mamia ena metau ia bada ia lao. Badu karana be unai bamona. Herevana ita badu nega sisina o daudau, to ita be sibona ita hahisia bada. Unai dainai, Iehova ese ita ia hagoadaia ita badu lasi totona. Unai bamona ita karaia neganai, namo ita davaria.​—Aonega Herevadia 11:17.

“Lau Mamia Iehova be Lau Ia Hereva Henia”

Ena be taihu ena kara ese Linda ia hahisia, to dahaka ese Linda ia durua ia badu noho lasi totona? Badina ta be inai: Iena Baibel stadi amo ia davaria, haida edia dika ia gwauatao be namo. (Salamo 130:3, 4) Linda ia diba bema unai bamona ita karaia, Iehova ese eda dika do ia gwauatao danu. (Efeso 4:32–5:2) Linda ia gwau: “Lau mamia Iehova be lau ia hereva henia.”

Gabeai, Linda ese badu karana ia dadaraia. Ia ese taihu ena dika ia gwauatao, bona hari idia be tura namodia. Linda be Iehova hesiai henia karana ia goadalaia. Namona be oi diba, Iehova ia ura oi ia durua danu.