IDAUNEGAI AONEGANA HARI ISEDA NEGA TOTONA

Kudouna Ibounai ida Dika Gwauatao

BAIBEL ENA HAKAUA HEREVANA: “Bema ta be badina ta dainai ma ta dekenai ia maumau, . . . mai kudouna ibounai ida do umui gwauatao heheni. Iehova ese mai kudouna ibounai ida umui ia gwauatao hegeregerena, namona be umui danu be unai bamona do umui karaia.”—Kolose 3:13.

Hahine ta be ena imana ia abia isi bona ma hahine ta amo ia raka siri

Ena anina be dahaka? Baibel ai, kara dika be abitorehai ida ia hahegeregerea bona gwauatao karana be abitorehai davana tahua noho lasi karana ida ia hahegeregerea. (Luka 11:4) Buka ta ia gwau Baibel ai Greek herevana idia hahanaia “gwauatao” anina be “abitorehai davana tahua noho lasi.” Unai dainai, bema ita dekenai kerere ia karaia tauna ena dika ita gwauatao, namona be unai tauna ena kerere davana ita tahua lasi. Ita ese ma haida edia kerere ita gwauatao neganai, unai ese ia hahedinaraia lasi idia karaia kererena ita abia dae eiava ita ia hahisia karana ita laloa maragi. Herevana ita diba ita be badina maorona ta dainai ita maumau, to namona be ita badu noho lasi.

Hari ia be mai anina a? Ita be goevadae lasi taudia dainai, ita ibounai ita kara dika. (Roma 3:23) To, bema hari haida edia dika gwauatao karana ita manadalaia, gabeai idia ese iseda dika danu do idia gwauatao. Oibe, dika ita gwauatao neganai, ita dekenai namo do ia havaraia. Edena dala ai?

Hahine rua be idia ta ta idia rosia heheni

Bema ita do badu noho bona haida edia dika ita gwauatao lasi, unai ese dika ia havaraia diba. Unai bamona lalohadai ese ita dekenai kara auka, badu bona lalohisihisi do ia havaraia. Ma danu gorere badadia ia havaraia diba. Inai buka (Journal of the American College of Cardiology) ia torea tauna Yoichi Chida bona Profesa ta ladana Andrew Steptoe be unai buka lalonai idia gwau: “Tahua gaukarana lalonai idia davaria, badu, inai heheni karana bona kudou gorerena [coronary heart disease] ese dika bada ia havaraia diba.”

Unai dainai, namona be dika gwauatao karana ese ia havaraia namo ita lalodia. Bema mai kudouna ibounai ida haida edia dika ita gwauatao, ita ese lalotamona bona maino ita havaraia, unai ese iseda hetura karana ma haida ida ia gimaia diba. Danu namona be ita hahedinaraia, kara dika amo idia helalo-kerehai taudia edia dika ia gwauatao Diravana ita tohotohoa.—⁠Mareko 11:25; Efeso 4:32; 5:1.