Baibel be Edena Bamona Lau Ia Durua Diba?

DAHAKA DO OI KARAIA?

Haheitalai ta laloa: David be motuka amo hanua matamata ta dekenai ia heau vareai. Strit sain ese idia hahedinaraia ia be gabu kererena ai ia noho. David ia laloparara ia boio vadaeni. Reana ia heau noho lalonai, dala kererena ia abia hidi.

Bema oi be David, dahaka do oi karaia?

STOPU BONA LALOA!

Dahaka oi karaia diba?

1. Haida oi nanadaia, dala maorona idia hadibaia totona.

2. Mapu ta o GPS oi gaukaralaia.

3. Oi draiv noho badina oi diba gabu maorona do oi davaria.

Haere “C” be oi do ia durua namonamo lasi.

Haere B be mai ena namo bona Haere A ia hanaia. Badina mapu o GPS edia namo be motuka lalonai do idia noho, emu loaloa ibounai lalonai oi do ia durua o hakaua.

Baibel be mapu ta o GPS bamona bona oi ia durua diba!

Dahaka dainai Baibel be buka hereadaena?

• Badina emu hekwakwanai idauidau lalonai oi ia durua o hakaua diba

• Badina oi do ia durua emu kara oi dibaia bena taunimanima namona ta ai oi lao totona

• Badina ia hahedinaraia edena dala ai mauri namona oi moalelaia diba

HENANADAI BADADIA HAERELAIA

Ita tubu daekau lalonai, henanadai momo ita henia.

• Dahaka dainai guba be blu?

• Hisiu be dahaka amo idia karaia?

Gabeai, ita laloa momo henanadai ita henia.

• Dahaka dainai dika idia vara?

• Dahaka dainai taunimanima idia mase?

Bema haere be Baibel ai idia noho be edena bamona?

Momo idia gwau Baibel be gori sivaraidia amo ia honu, bona ia be buka gunana ta, bona ena hereva do ita lalopararalaia diba lasi. To edena bamona, Baibel be mai ena kerere eiava taunimanima ese Baibel idia laloa kerere?

Hegeregere, momo idia laloa Baibel ia gwau Dirava be tanobada ia control o biagua. Unai hereva be momokani, a? To inai tanobada ai dika be ia bada ia lao! Ia lalonai hisihisi, gorere, mase, ogogami, bona disasta momo idia vara. Oi laloa unai dika ibounai be lalokau Diravana ese ia havaraia, a?

Oi ura haere oi diba, a? Baibel ena haere dekenai do oi hoa, badina ia gwau Satani Diabolo be tanobada ibounai ia control o biagua noho!

Reana oi itaia, inai buklet ai be Baibel ena siri momo idia noho. Iehova ena Witnes taudia idia diba momokani Baibel be ita ia hakaua namonamo diba. Badina be “Toretore Helagadia be Dirava ena hahekau henunai idia torea, bona ia be mai ena namo hadibaia totona, sisiba henia totona, gau idauidau hamaoromaoroa totona.” (2 Timoteo 3:16, 17) Namona be nega oi atoa oi ese inai buka​—⁠idaunegai bona hari inai negai ita gaukaralaia bukana​—⁠oi stadilaia totona!