Iehova ese Iehosapata Ia Gimaia

Iuda ena king Iehosapata be Bala ena boubou patana bona kaivakuku ia hadikaia ore. Ia ura taunimanima be Iehova ena taravatu do idia diba. Unai dainai lohia taudia bona Levi taudia be Iuda tanodia dekenai ia siaidia Iehova ena taravatu hadibaia totona.

Kahirakahira idia noho besedia be Iuda tuari henia totona idia gari, badina idia diba Iehova be ena taunimanima ida ia noho. Bona King Iehosapata dekenai harihari gaudia idia mailaia danu. To Moaba, Amono bona Seiri ororo gabudia idia noho taudia idia mai Iuda tuari henia totona. Iehosapata ia diba Iehova ena heduru ia abia be namo. Ia ese tatau, hahine, natudia ibounai be Ierusalema dekenai ia haboua. Bona idia vairanai ia guriguri: ‘Iehova e, emu heduru ai abia lasi neganai, do ai kwalimu lasi. Mani ai oi hamaoroa dahaka do ai karaia.’

Iehova ia haere: ‘Oi gari lasi. Oi do lau durua. Emu gabu dekenai oi gini, marere lasi, bona lau ese umui lau hamauria dalana do umui itaia.’ Edena dala ai Iehova ese idia ia hamauria?

Daba ai, Iehosapata ese ane taudia ia abia hidi bona ia hamaorodia tuari taudia vairanai do idia raka. Ierusalema amo idia raka ela bona tuari gabuna ladana Tekoa dekenai.

Ane idia abia taudia be mai moale bona gado bada ida Iehova idia hanamoa lalonai, Iehova be iena taunimanima totona ia tuari. Ia ese Amono bona Moaba taudia dekenai daradara ia havaraia bona ta ta idia alaia matamaia, bona idia ta ia mauri lasi. To Iehova ese Iuda taudia, edia tuari taudia bona hahelaga taudia ia gimaia. Kahirakahira tanodia ai idia noho taudia be Iehova ese Iuda taudia totona ia karaia sivarai idia kamonai neganai, idia laloparara Iehova be idia ia gimaia noho. Edena dala ai Iehova ese ena taunimanima ia hamauria? Dala momo ai unai ia karaia. Bona taunimanima amo heduru ia noia lasi.