Tuari Tauna Bona Kekeni Maragina

Suria tanona ai, Israela kekeni maragina ia noho, ia be ena tama sina amo ia daudau. Asuria tuari taudia ese idia abia bona hari tuari tauna ladana Namana ena hahine ena hesiai gaukara ia karaia. Unai kekeni maragina be Iehova ia tomadiho henia, ena be ia badinai idia noho taudia be tomadiho koikoi idia badinaia.

Namana be gorere dikana ia abia, bona unai ese ia hahisia hanaihanai. Kekeni maragina ia ura bada Namana ia durua. Namana ena adavana dekenai ia gwau: ‘Emu adavana ena gorere ia hanamoa diba tauna ta lau diba. Israela ai, Iehova ena peroveta tauna ta Elisaia ia noho. Emu adavana ena gorere ia hanamoa diba.’

Namana ena adavana ese kekeni maragina ena hereva be Namana dekenai ia gwauraia. Namana ia ura gau idauidau ia tohoa dainai, Elisaia ena ruma, Israela dekenai ia lao. Namana ia laloa Elisaia ese mai anina bada tauna ta bamona ia do ia abia dae. To Elisaia be ena hesiai tauna ia siaia Namana ia hanamoa henia bona ia gwau: ‘Ioridane Sinavai dekenai oi lao bona nega 7 oi digu. Bena do oi namo.’

Namana ia moale lasi. Ia gwau: ‘Lau laloa peroveta tauna be ena Dirava dekenai do ia boiboi bona ena imana be lau latanai ia davea karana amo do lau namo. To, ia gwau Israela ena sinavai ta dekenai do lau lao. Suria ai sinavai namodia idia noho. Dahaka dainai unuseni lau lao lasi?’ Namana ia badu, bona Elisaia ena ruma ia rakatania.

Namana ena hesiai taudia ese idia durua ia laloa namonamo totona. Ia dekenai idia gwau: ‘Oi ura gau ibounai oi karaia oi namo totona, a? Inai peroveta tauna ese ia gwauraia gauna be auka lasi. Oi badinaia be namo, ani?’ Namana ese idia ia kamonai henia. Ioridane Sinavai dekenai ia lao bona nega 7 ia digu. Bena ranu amo ia daekau neganai ena gorere ia ore. Ia moale bada, bona Elisaia tanikiu henia totona ia giroa lou. Namana ia gwau: ‘Hari lau diba Iehova be Dirava momokanina.’ Namana be ena gorere amo ia namo bona ia giroa mai neganai Israela kekeni maragina ena hemami mani oi laloa.