Basileia Haroro Ripoti
‘Oiemu Orea Taudia be mai Edia Ura Kwalimu ida Oi Do Idia Durua’
SURIA ena tuari biaguna badana Namana be lepera gorerena ia abia. Bema gau ta ia karaia lasi, unai gorere dikana ese ena tauanina ia hadikaia diba bona mase ia havaraia diba danu. Namana be dahaka do ia karaia be namo? Namana ena ruma taudia bogaraginai be kekeni maragina ta, ‘Israela amo idia abia mauri’ kekenina unai. Mai ena goada ida ia hereva bona ia hahedinaraia peroveta tauna Elisaia be Namana do ia hanamoa diba.—2 King Taudia 5:1-3.
Kekeni ena gari lasi karana dainai, Namana ese Elisaia ia tahua bona ia namo ia lao. Ma danu, Namana be Iehova tomadiho henia tauna ai ia lao! Unai sivarai, Baibel lalonai idia torea sivaraina, be lagani 900 B.C.E. bamona ai ia vara. (2 King Taudia 5:4-15) Hari inai negai, memero kekeni momo be Basileia ena gaukara idia karaia neganai, unai bamona gari lasi karana idia hahedinaraia. Mozambique amo ia mai ekspiriens ese unai ia hahedinaraia.
Nuno, ena mauri lagani be 6, be bapatiso lasi pablisa ta. Bapatiso lasi pablisa ai ia do lao lasi negana lalonai, Nuno ese ena noho gabuna ena natudia ia haboua, guriguri ia gwauraia, bona Baibel ena hereva be Lau Egu Bible Sivarai Bukana amo ia hadibadia.
Nega momo Saturday daba Nuno ia toreisi haraga bona ena ruma bese ia hamaoroa: “Hari dina haroro gaukara do ita karaia.” Iena ura haroro gaukara dekenai be ma dala haida dekenai ia hedinarai danu. Maputo dekenai iena tama sina ida dala dekenai idia haroro neganai, nega momo Nuno be ia sibona ia lao taunimanima ia hereva henia totona. Unai bamona ia vara negana ta ai, bisinesi tauna ta ia mai ia dekenai bona ia henanadai: “Dahaka dainai inai magasin oi hoihoilaidia?” Nuno ia gwau: “Inai magasin lau hoihoilaidia lasi, to kontribusen do lau abia dae haroro gaukara durua totona.” Bisinesi tauna ia gwau: “Ena be lau ura lasi, emu kara bona aonega lau laloa bada. Inai gaukara dekenai lau ura kontribusen lau henia.”
Ma nega ta, dala dekenai Nuno ese tau ta ia hereva henia bona True Peace and Security—How Can You Find It? bukana ia hahedinaraia ia dekenai. Unai tau ia henanadai: “Oi be unuseniai ia noho sikuli dekenai oi lao, ani?” Nuno ia haere, “Oibe, unai sikuli dekenai lau lao, to hari lau be mai anina bada herevana inai buka amo lau herevalaia. Ia hahedinaraia Dirava do ia mailaia tanobada matamatana dekenai do oi mauri diba, inai buka ena laulau ia hahedinaraia hegeregerena.” Nuno ia diba lasi ia hereva henia tauna be tisa ta iena sikuli dekenai. Tisa ese unai buka sibona ia abia dae lasi to hari Gima Kohorona bona Awake! magasin be hanaihanai Nuno amo ia abia.
Nuno idia nanadaia dahaka dainai haroro gaukara ia ura karaia neganai, ia gwau: “Lau ura Iehova bona ena Natuna, Iesu Keriso, be taunimanima dekenai lau herevalaia bona hadibaia.” Ma ia gwau: “Bona bema taunimanima idia ura lasi kamonai neganai, ita lalo-hisihisi lasi.”
Tanobada hegegemadai, matamata taudia tausen momo be Nuno bamona, “mai edia ura kwalimu danu” Dirava ena Basileia idia hadibalaia bona idia harorolaia. (Salamo 110:3) To unai ia vara kava lasi. Tama sina be edia natudia idia maragi negana amo idia dekenai Iehova idia hadibalaia, haroro gaukara dekenai haheitalai namona idia hahedinaraia, bona Basileia idia tahua goadagoada ese hahenamo momo do idia abia.