Iehova Ena Tuari Orea Badana

Suria ena king Bene-hadada be Israela ia tuari henia noho. To nega ta ta ai peroveta tauna Elisaia ese Israela ena king ia hadibaia guna dainai ia heau mauri. Unai dainai Bene-hadada ia ura Elisaia ia dogoatao. Ia kamonai Elisaia be Dotana siti ai ia noho, bona ia dogoatao totona Suria ena tuari taudia ia siaia.

Suria taudia be hanuaboi ai Dotana siti dekenai idia mai. Daba ai, Elisaia ena hesiai tauna be murimuri dekenai ia lao bona ia itaia siti be tuari orea badana ese ia hagegea. Ia gari bada bona ia boiboi: ‘Elisaia, dahaka do ita karaia?’ Elisaia ese ia hamaoroa: ‘Iseda durua taudia be momo, to idia be momo lasi.’ Unai neganai, Iehova ese Elisaia ena hesiai tauna ena matana ia kehoa bona ororo gabudia ai, lahi bamona hosi bona tuari kariota ia itaia.

Suria ena tuari taudia be Elisaia idia ura dogoatao neganai, heduru totona Iehova dekenai ia guriguri. Bona Iehova ese tuari taudia dekenai daradara ia havaraia dainai idia diba lasi edeseni idia noho. Elisaia be tuari taudia ia hamaoroa: ‘Umui be siti kererena dekenai umui noho. Lau umui badinaia, umui tahua tauna dekenai umui do lau abia lao.’ Elisaia idia badinaia ela bona Samaria dekenai, Israela ena king ia noho gabuna.

Suria taudia be idia noho gabuna idia dibaia, to dala be lasi. Israela ena king be Elisaia ia nanadaia: ‘Idia do lau hamasea, a?’ Elisaia ia laloa unai be nega namona idia do ia panisia totona, a? Lasi. Elisaia ia gwau: ‘Idia oi hamasea lasi. Aniani oi henia, bona idia oi siaia lao.’ Unai dainai king ese idia totona aria badana ia karaia, bena ia siaidia lao.