Elisaia be Lahi Kariota Ia Itadia​—Oi Danu, A?

Suria ena king be Dirava ena peroveta tauna Elisaia ia tahua, bona ororo ai ia noho bona mai ena magu hanuana Dotana, lalonai ia davaria. Ia ese tuari taudia, hosi bona kariota momo ia siaia lao. Daba ia rere neganai, iena tuari taudia ese Dotana hanua idia koua hagegea.​—2 Kin. 6:13, 14.

Elisaia ena hesiai tauna be murimuri ia lao neganai, tuari taudia ia itaia bona ia boiboi bada, ia gwau: “Lohia e, madi ita be dika! Edena bamona do ita karaia?” Elisaia ia haere: “Oi gari lasi, badina be ita idia durua taudia be momo, to unai orea idia durua taudia be momo lasi.” Bena Elisaia ia guriguri, ia gwau: “Lohiabada e, oi dekenai lau noinoi, iena matana do oi kehoa, ia itaia diba totona.” Vadaeni “Lohiabada ese unai hesiai tauna ena matana ia kehoa, ia itaia, ororo be lahi kariota dekenai idia honu, idia ese Elisaia ia noho gabuna idia hagegea noho.” (2 Kin. 6:15-17) Unai sivarai bona Elisaia ena mauri lalonai idia vara gaudia ma haida amo dahaka ita dibaia?

Suria tuari taudia be Dotana hanua idia hagegea neganai, Elisaia be ia gari lasi badina Iehova ia abidadama henia, bona Iehova ena gimaia karana ia itaia. Iseda negai, Iehova be hoa karadia ia karaia lasi, to ita diba Ia ese ena orea ia gimaia noho. Unai be hegeregere lahi kariota bona hosi ese ita idia hagegea. Bema ita abia dae Iehova be ena taunimanima ia gimaia bona hanaihanai ia ita abidadama henia, do ita gari lasi bona ia ese ita do ia hanamoa. (Sal. 4:8) Mani ita itaia, Elisaia ena mauri lalonai idia vara gaudia ma haida ese edena dala ai ita do idia durua.

ELISAIA ESE ELIA IA HESIAI HENIA MATAMAIA

Nega ta Elisaia be tano ia makohia noho lalonai, Elia be ia dekenai ia lao bona ena kouti be Elisaia ena latanai ia atoa. Elisaia ia laloparara unai kara amo Elia ese ia boiria iena hesiai tauna ai ia lao totona. Elisaia ese aria ta ia karaia, ena tama sina ia bamahuta henidia, bona Elia murinai ia lao ia hesiai henia totona. (1 Kin. 19:16, 19-21) Elisaia be mai ena ura ida Iehova ia hesiai henia, unai dainai Dirava ese ia gaukaralaia bona gabeai ia be peroveta tauna Elia ena gabu ia abia.

Elisaia be Elia totona reana lagani 6 ia gaukara. Unai nega ai, ia be “Elia ena imana dekenai ranu ia bubua tauna.” (2 Kin. 3:11, NW) Guna negadiai, vaia taunimanima be aniani totona sipuni, foka, o kaia idia gaukaralaia lasi, to edia imana idia gaukaralaia. Aniani murinai, hesiai tauna ese ena biaguna ena imana dekenai ranu ia bubua ia huria totona. Elisaia ese ia karaia gaukara haida be gaukara maragidia o anina bada lasi. To, Elisaia ia laloa Elia ena hesiai gaukara ia karaia be hahenamo badana.

Hari inai negai, Keristani taudia momo be ful-taim hesiai gaukara idauidau idia karaia. Unai bamona idia karaia badina Iehova idia abidadama henia, bona idia ura mai edia goada ibounai ida Ia idia hesiai henia. Haida be edia tano idia rakatania Betele, konstraksen bona gaukara ma haida idia karaia totona. Taunimanima idia laloa unai gaukara be anina bada lasi. To, namo lasi Keristani taudia be unai bamona idia laloa, badina Iehova ese edia gaukara ia laloa bada.​—Heb. 6:10.

ELISAIA BE ENA GAUKARA IA RAKATANIA LASI

Dirava ese Elia be koehirihiri amo guba dekenai ia do abia daekau lasi neganai, Gilegala amo Betele dekenai ia siaia lao. Elia ese Elisaia ia hamaoroa ia do ia bamoa lasi, to Elisaia ia gwau: “Lau ese oi do lau rakatania lasi.” Edia laolao lalonai, nega rua Elia ese Elisaia ia hamaoroa do ia noho, to ia kamonai lasi. (2 Kin. 2:1-6) Ruta be Naomi ia rakatania lasi hegeregerena, Elisaia danu be Elia ia rakatania lasi. (Ruta 1:8, 16, 17) Dahaka dainai? Elisaia be Elia hesiai henia gaukarana ia laloa bada, badina unai gaukara be Dirava ese ia dekenai ia henia.

Ita dekenai Elisaia be haheitalai namona. Bema nega ibounai ita laloatao ita be Iehova ita hesiai henia, Dirava ena orea lalonai ita abia hesiai gaukara do ita laloa bada. Unai be hahenamo hereadaena.​—Sal. 65:4; 84:10.

‘LAU DO OI NOIA, BONA OIEMU URA GAUNA DO LAU HENIA’

Elisaia bona Elia idia laolao lalonai, Elia ia gwau: “Oi dekena amo Lohiabada ese lau ia do abia daekau lasi neganai, lau do oi noia, bona oiemu ura gauna oi dekenai do lau henia.” Elisaia ia haere: “Lau noinoi, oi dekenai ia noho siahuna do oi habadaia nega rua, bona lau dekenai do oi henia.” Lagani haida gunanai Solomona ia karaia bamona, Elisaia ese Elia amo gau ta ia noia, unai ese ia do ia durua Iehova ia hesiai henia namonamo totona. (1 Kin. 3:5, 9; 2 Kin. 2:9) Israela ai tama ta ese kohu ibounai amo ahuna rua be ena natuna roboana dekenai do ia henia. (Deu. 21:15-17) Unai dainai, Elisaia ia noinoi Dirava ena peroveta tauna Elia ena gabu do ia abia. Danu, Elisaia ia ura Elia ena gari lasi karana ia tohotohoa, badina Elia be mai ena lalona ibounai ida Iehova ia hesiai henia.​—1 Kin. 19:13, 14.

Elia be ena hesiai tauna ena noinoi dekenai dahaka ia gwau? Ia gwau: “Inai be gau aukana ta oi noia vadaeni. To Lohiabada ese lau ia abia daekau neganai, bema lau oi itaia, oiemu noia gauna do oi abia, to bema lau oi itaia lasi neganai, oiemu noia gauna do oi abia lasi.” (2 Kin. 2:10) Elia ena haere ena anina be rua. Ginigunana be, Dirava sibona ese abia hidi do ia karaia, bema Elisaia be ia noinoilaia gauna do ia abia o lasi. Iharuana be, bema Elisaia ia ura ia noinoilaia gauna ia abia, herevana dahaka ia vara, namona be Elia do ia rakatania lasi.

ELISAIA ESE IA ITAIA GAUNA

Dirava ese Elisaia ena noinoi gauna ia henia, a? Baibel ia gwau: “Idia raka noho, bona herevahereva noho neganai, nega tamona lahi kariota ta, bona lahi hosidia danu ese idia ruaosi ia hapararaia. Unai neganai Elia be koehirihiri ese ia abia daekau lao guba dekenai. Elisaia ese Elia ia itaia, ia daekau lao.”a Elisaia dekenai unai be Iehova ena haere: Elisaia ia itaia Dirava ese Elia be guba dekenai ia abia daekau, Elia amo nega rua idia habadaia siahuna ia abia, bona peroveta tauna ai ia lao.​—2 Kin. 2:11-14.

Elia ena dabua latana be tano dekenai ia moru, bena Elisaia ese ia abia bona ia karaia. Unai dabua ia hahedokilaia amo ia hamomokania ia be Dirava ena peroveta tauna. Hamomokania gauna ma ta be, gabeai Elisaia ese Ioridane Sinavaina ia hapararaia.

Elisaia ia itaia Elia be koehirihiri ese ia abia daekau lao guba neganai, unai ese ena kudouna ia hamarerea momokani. Badina dina ta ta ai taunimanima be lahi kariota bona hosi idia itaia diba lasi! Unai dainai, ia vara gauna ese ia hamomokania, Iehova be Elisaia ena noinoi gauna ia henia. Dirava ese iseda guriguri ia haerelaia neganai, ita be matahanai amo lahi kariota bona hosi ita itaia lasi. To, ita laloparara Dirava be ena siahu bada ia gaukaralaia ena ura ia havaraia totona. Bona Iehova ese ena tanobada oreana ia hanamoa karana ita itaia neganai, unai be hegeregere iena kariota badana ia heau noho ita “itaia.”​—Ese. 10:9-13.

Elisaia ese gau momo ia itaia, bona unai ese idia hamomokania Iehova ena siahu be bada. Dirava ena lauma helaga ese Elisaia ia hasiahua dainai, hoa karadia 16 ia karaia. To Elia be hoa karadia 8 sibona ia karaia.b Suria tuari taudia ese Dotana hanua idia hagegea neganai, unai be nega iharuana Elisaia ese lahi kariota bona hosi ia itaia.

ELISAIA BE IEHOVA IA ABIDADAMA HENIA

Ena be Elisaia ena inai taudia ese Dotana hanua idia hagegea, to ia gari lasi. Dahaka dainai? Badina iena abidadama Dirava dekenai be ia goada. Iseda abidadama be unai bamona ia goada be namo. Unai dainai, namona be Dirava ena lauma helaga totona ita guriguri, unai amo abidadama bona lauma helaga ena huahua ma haida ita hahedinaraia diba.​—Luka 11:13; Gal. 5:22, 23.

Dotana hanua dekenai ia vara gauna dainai, Elisaia be Iehova bona ena tuari aneru oreadia edia gimaia karana ia abidadama henia. Ia laloparara Dirava ese ena aneru ia siaidia, Dotana hanua bona Suria tuari taudia idia hagegea totona. Dirava ese Suria tuari taudia edia matana ia hakepulua, unai amo Elisaia bona ena hesiai tauna ia hamauridia. (2 Kin. 6:17-23) Unai nega dikana bona nega ma haida ai danu, Elisaia ese Iehova ia abidadama henia momokani.

Elisaia bamona, namona be Iehova Dirava ita abidadama henia. (Aon. 3:5, 6) Unai bamona ita karaia neganai, ‘Dirava ese ita dekenai do ia hebogahisi bona ita do ia hanamoa.’ (Sal. 67:1) Momokani, hari ita be lahi kariota bona hosi ese idia hagegea lasi, to “hisihisi badana” neganai Iehova ese iseda tanobada hegegemadai tadikaka oreana do ia gimaia. (Mat. 24:21; Apok. 7:9, 14) To unai nega ia do vara lasi lalonai, namona be hanaihanai ita laloatao, “Dirava be iseda heau mauri gabuna momokani.”​—Sal. 62:8.