Ororo Harorona

Iesu be aposetolo taudia 12 ia abia hidi murinai, ororo amo ia diho bona hutuma idia haboua noho gabuna dekenai ia lao. Unai taudia be Galilea, Iudea, Turo, Sidono, Suria, bona Ioridane kahana amo idia mai. Gorere dainai idia hisihisi taudia bona demoni ese idia hahisia taudia idia abia mai. Iesu ese idia ibounai ia hanamoa. Bena ororo badinai ia helai bona ia hereva matamaia. Bema ita ura Dirava ita tura henia, Iesu be do ita karaia gaudia ia herevalaia. Namona be Iehova ena heduru ita abia bona ia lalokau henia karana do ita dibaia. To bema taunimanima ita lalokau henia lasi, anina be Dirava ita lalokau henia lasi. Namona be taunimanima ibounai, ita idia inai henia taudia danu, ita hebogahisi henia bona kara namo henia.

Iesu ia gwau: ‘Emu turadia sibona oi lalokau henia be hegeregere lasi. Namona be emu kudouna amo emu inai taudia oi lalokau henia bona edia dika oi gwauatao. Bema ta be oi dekenai ia badu, karaharaga oi lao, bona sori hereva oi gwauraia. Oi ura ta ese oi do ia kara namo henia hegeregerena idia dekenai unai bamona do oi karaia.’

Danu Iesu ese sisiba namona ia henia. Ia gwau: ‘Iehova ita tura henia karana be mai anina bada, moni momo abia karana ia hereaia.’ Henaohenao tauna ese emu moni ia henaoa diba, to emu hetura karana Iehova ida be ta ese do ia henaoa lasi. Aniani, inuinu, o dabua totona oi lalohekwarahi lasi. Guba manudia oi itaia. Hanaihanai Dirava ese ia naridia bona edia aniani ia henia. Lalohekwarahi momo karana ese emu mauri do ia halataia lasi. Laloatao, Iehova be emu dabu gaudia ia diba.’

Hutuma ese Iesu amo idia kamonai gaudia be ma ta amo idia kamonai lasi. Edia dubu gunalaia taudia ese idia dekenai unai gaudia idia hadibaia lasi. Dahaka dainai Iesu be hadibaia tauna namona? Badina ia hadibaia gaudia ibounai be Iehova amo.