Iesu Ena Anibou Ginigabena

Lagani ta ta ai, hua Nisan ena dina namba 14 ai Iuda taudia be Pasova idia karaia. Unai amo Iehova ese Aigupito ena igui hesiai amo idia ia ruhaia bona Gwauhamata Tanona dekenai idia ia hakaua mai karana do idia laloatao. Lagani 33 C.E. ai, Iesu bona aposetolo taudia be Ierusalema ena ataiai daiutuna ai Pasova idia karaia. Idia aniani ore murinai, Iesu ia gwau: ‘Umui ta ese lau be egu inai taudia dekenai do ia henia.’ Aposetolo taudia idia hoa, bona Iesu idia nanadaia: ‘Ia be daika?’ Iesu ia gwau: ‘Paraoa lau henia tauna be unai.’ Bena Iesu be Iuda Iskariote dekenai paraoa ia henia. Maoromaoro, Iuda be daiutu amo ia raka-lasi.

Bena Iesu ia guriguri, paraoa ia makohia, bona aposetolo taudia dekenai ia henia. Ia gwau: ‘Inai paraoa umui ania. Inai be egu tauanina ia laulaulaia, umui totona do lau henia.’ Bena wain totona ia guriguri bona aposetolo taudia dekenai ia henia. Ia gwau: ‘Inai wain umui inua. Unai be egu rara ia laulaulaia, emui kara dika gwauatao totona do lau bubua. Lau gwauhamata guba ai umui be lau ida king gaukara do ita karaia. Lagani ta ta ai unai do umui karaia lau laloatao totona.’ Iesu ena murinai idia raka taudia be lagani ta ta ai unai hebou idia karaia. Hari idia gwauraia Lohiabada Ena Anibou.

Idia aniani murinai, aposetolo taudia be idia huanai daika be bada idia hepapahuahulaia. To Iesu ese idia ia hamaoroa: ‘Umui huanai ia bada tauna be do ia maragi bona umui ia gunalaia tauna be umui do ia hesiai henia.’

‘Umui be lauegu turadia. Egu Tamana amo lau kamonai gaudia ibounai be umui dekenai lau gwauraia hedinarai. Daudau lasi egu Tamana, guba dekenai do lau lao. Umui be tanobada dekenai umui noho, bona taunimanima do idia diba umui be egu hahediba taudia bema ta ta umui lalokau henia. Lau ese umui lau lalokau henia hegeregerena.’

Dokonai, Iesu ese Iehova ia noia ena hahediba taudia ia gimaia totona. Bona maino ai idia gaukara hebou totona. Danu Iehova ena ladana ia hahelagaia totona ia guriguri. Bena Iesu bona ena aposetolo taudia be Iehova hanamoa anedia idia abia bena daiutu amo idia raka-lasi. Iesu idia arest negana ia kahirakahira.