Iesu Ia Giroa Lou Guba Dekenai

Galilea ai, Iesu be ena murinai idia raka taudia ida ia hedavari. Idia dekenai mai anina bada hahegani ia henia: ‘Umui lao bona tano ibounai ai taunimanima be hahediba taudia ai umui halaoa. Umui dekenai lau hadibaia gaudia be idia dekenai do umui hadibaia, bona idia do umui bapatisoa.’ Bena ia gwauhamata: ‘Laloatao, hanaihanai lau be umui ida.’

Iesu ia toreisi lou murinai, dina 40 lalonai, Galilea bona Ierusalema ai ena hahediba taudia handred momo dekenai ia hedinarai. Idia dekenai mai anina bada gaudia ia hadibaia bona hoa karadia momo ia karaia. Bena Olive Ororona ai Iesu be nega ginigabena ena aposetolo taudia ida ia hedavari. Ia gwau: ‘Ierusalema umui rakatania lasi. Tamana ese ia gwauhamatalaia gauna totona do umui naria noho.’

Aposetolo taudia be Iesu ena hereva ena anina idia lalopararalaia lasi. Unai dainai ia idia nanadaia: ‘Inai nega ai oi be Israela ena King ai do oi lao, a?’ Iesu ia gwau: ‘King ai lau lao totona Iehova ese ia abia hidi negana be ia do ginidae lasi. Daudau lasi lauma helaga ena siahu do umui abia, bona lau do umui gwauraia hedinarai. Ierusalema, Iudea ibounai, Samaria, bona tanobada ena daudau momokani gabudia dekenai umui lao bona haroro.’

Bena Iesu be guba dekenai ia daekau bona ori ese ia koua. Iena hahediba taudia be guba idia itaia noho, to ia boio vadaeni.

Hahediba taudia be Olive Ororona idia rakatania bona Ierusalema dekenai idia lao. Hanaihanai idia be ataiai daiutu ta ai idia hebou bona idia guriguri. Iesu amo hakaua hereva haida abia totona idia naria.