Korenelio ese Lauma Helaga Ia Abia

Kaisarea ai, Roma ami ofesa tauna ladana, Korenelio ia noho. Ia be Iuda tauna lasi, to Iuda taudia be ia idia matauraia. Ogogami bona dabu taudia ia durudia bada. Korenelio ese Iehova ia abidadama henia bona hanaihanai ia dekenai ia guriguri. Dina ta ai, aneru ta be Korenelio dekenai ia hedinarai bona ia gwau: ‘Dirava ese emu guriguri ia kamonai. Petero ia noho gabuna Iopa siti dekenai tatau haida oi siaia, bona oi hamaoroa ia mai totona.’ Karaharaga, Korenelio ese tatau toi ia siaia Iopa dekenai, unai gabu ena daudau saut kahana amo be 50 kilomita bamona.

Iopa ai, Petero be matahanai ta amo animal haida ia itaia. Iuda taudia be unai animal idia ania lasi badina unai be taravatu. Bona gadona ta ia kamonai ia gwau oi ania. Petero ia ura lasi, ia gwau: ‘To egu mauri ai goeva lasi animal ta lau ania lasi.’ Unai gadona ese ia hamaoroa: ‘Unai animal oi gwauraia lasi idia miro. Dirava ese ia hagoevaia vadaeni.’ Ma Petero ia hamaoroa: ‘Emu iduara dekenai tatau toi idia gini. Idia ida oi lao.’ Petero be iduara dekenai ia lao bona unai tatau ia nanadaia dahaka dainai idia mai. Idia haere: ‘Ai be Roma ena ami ofesa Korenelio ese ia siaia mai. Oi be ena ruma Kaisarea dekenai do oi mai.’ Petero be unai tatau ia abia dae ena ruma ai idia mahuta totona. Murina dinana ai, Petero be unai tatau bona Iopa tadikaka haida ida Kaisarea dekenai idia lao.

Korenelio ese Petero ia itaia neganai, ia tui diho. To Petero ia gwau: ‘Oi toreisi! Lau danu be taunimanima. Dirava ese lau ia hamaoroa emu ruma dekenai lau mai totona, ena be Iuda taudia be idau bese taudia edia ruma dekenai idia vareai lasi. Vadaeni lau oi boiria ena badina mani oi gwauraia.’

Korenelio ese Petero ia hamaoroa: ‘Dina 4 gunanai lau be Dirava dekenai lau guriguri, bona aneru ta ese lau ia hamaoroa oi do lau boiria. Mani Iehova ena hereva be ai dekenai oi hadibaia.’ Petero ia gwau: ‘Lau laloparara Dirava be taunimanima ena toana ia laloa lasi. Ia idia ura tomadiho henia taudia ia abia dae.’ Petero ese idia dekenai Iesu ena sivarai momo ia gwauraia. Bena lauma helaga be Korenelio bona ia ida idia noho taudia latanai ia diho, bona ibounai idia bapatiso.