Keristani Tomadiho be Gabu Momo Dekenai Ia Lao

Aposetolo taudia be Iesu ena hahegani idia badinaia bona tanobada ibounai ai sivarai namona idia harorolaia. Lagani 47 C.E. ai, Antioka ai idia noho tadikaka ese Paulo bona Banaba be misinari laolao totona Asia Minor dekenai idia siaia. Idia lao gabudia be hegeregere Derebe, Lusitera bona Ikonio.

Paulo bona Banaba be taunimanima ibounai dekenai idia haroro, ena be idia taga o ogogami, matamata o buruka. Momo be Keriso ena hereva momokani idia abia dae. Paulo bona Banaba be Kurese ena gavana Seregio Paulo idia haroro henia neganai, meamea tauna ta ia ura idia ia koua. Paulo ese unai meamea tauna ia hamaoroa: ‘Iehova ena badu be oi latanai.’ Maoromaoro meamea tauna ia matakepulu. Gavana Seregio Paulo be ia vara gauna ia itaia neganai, abidadama tauna ai ia lao.

Paulo bona Banaba be gabu ibounai dekenai idia haroro, ruma-ta-ruma-ta ai, maketi ai, dala ai, bona sinagoga ai danu. Lusitera ai aena dika tauna idia hanamoa neganai, unai hoa karana idia itaia taudia idia laloa idia be dirava bona idia ura idia tomadiho henidia. To Paulo bona Banaba ese idia koudia, idia gwau: ‘Dirava sibona umui tomadiho henia! Ai be taunimanima sibona.’ Bena Iuda taudia haida idia mai bona hutuma edia lalona idia veria Paulo idia dagedage henia totona. Hutuma ese nadi amo ia idia hodoa, siti murimuri ai idia veria lao, bona idia rakatania. To, Paulo ia mase lasi! Maoromaoro, tadikaka idia mai bona ia idia durua bona siti dekenai idia abia vareai. Gabeai, Paulo be Antioka dekenai ia giroa lou.

Lagani 49 C.E. ai, Paulo be laolao ma ta ia karaia. Asia Minor dekenai tadikaka ia vadivadi henia murinai, Europe kahana ai sivarai namona ia abia lao. Ia lao gabudia be Atena, Efeso, Filipi, Tesalonika, bona gabu ma haida danu. Paulo idia bamoa taudia be Sila, Luka, bona tau matamata Timoteo. Kongrigeisen matamata idia haginia bona hagoadaia totona idia gaukara hebou. Lagani ta mai kahana, Paulo be Korinto ai ia noho bona tadikaka ia hagoadaia. Ia haroro, hahediba gaukarana ia karaia bona kongrigeisen momo dekenai revareva ia torea. Danu palai turia gaukarana ia karaia. Bona gabeai, Antioka dekenai ia giroa lou.

Gabeai lagani 52 C.E. ai, Paulo be Asia Minor amo ena laolao ihatoina ia hamatamaia. Ia be not kahana, Filipi dekenai ia lao, bena Korinto dekenai ia diho lao. Paulo be lagani haida lalonai Efeso ai, hahediba gaukara ia karaia, gorere taudia ia hanamoa, bona kongrigeisen ia durua. Danu dina ta ta ai sikuli rumana ai pablik tok ia henia. Taunimanima momo be ena hereva idia kamonai bona edia kara idia haidaua. Paulo be tano momo ai sivarai namona ia harorolaia murinai, Ierusalema dekenai ia lao.