Paulo be Roma Dekenai Idia Siaia Lao

Paulo ena misinari laolao ihatoina be Ierusalema dekenai ia doko. Unuseniai ia idia arest bona dibura ruma ai idia atoa. Hanuaboi ai, matahanai ta amo Iesu ese Paulo ia hamaoroa: ‘Oi be Roma dekenai do oi lao bona unuseniai oi haroro.’ Ierusalema amo Paulo idia abia lao Kaisarea dekenai, unuseniai lagani rua dibura ruma ai ia noho. Gavana Festo ese ia kota henia neganai, Paulo ia gwau: ‘Lau ura Roma ai Kaisara ese egu kota do ia kamonai.’ Festo ia gwau: “Oi ura Kaisara ese emu kota do ia kamonai dainai; Kaisara dekenai do oi lao.” Paulo be sisima ai idia udaia bona Roma dekenai idia abia lao, bona Keristani tadikaka rua, Luka bona Arisitako danu idia lao.

Davara dekenai, dina haida lalonai lai gubana ia toa. Sisima ai idia noho taudia idia laloa do idia mase. To Paulo ia gwau: ‘Tatau e, nihi ai aneru ta ese lau ia hamaoroa: “Paulo e, oi gari lasi. Roma dekenai do oi ginidae, bona oi ida sisima ai idia noho taudia be do idia mauri.” Umui lalogoada! Do ita mase lasi.’

Dina 14 lalonai lai gubana ia toa. Bena Melita motumotu idia itaia. Sisima be miri dekenai ia heau daekau bona ia makohia maragimaragi. To taunimanima 276 sisima lalonai be idia mauri. Haida idia nahu bona ma haida be sisima ia makohi ena au latanai idia hure lao bona kone dekenai idia daekau. Melita taudia ese idia durudia bona edia lahi idia karaia sibona idia hasiahua totona.

Hua toi murinai, soldia taudia ese sisima ma ta amo Paulo idia abia lao Roma dekenai. Ia ginidae neganai, tadikaka be ia hedavari henia totona idia mai. Paulo ese idia ia itaia neganai, Iehova ia tanikiu henia bona goada ia abia. Ena be Paulo be dibura tauna, to ia be idia rentaia ruma ai ia noho bona soldia taudia ese idia gimaia. Lagani rua lalonai unuseniai ia noho. Ia itaia totona idia mai taudia dekenai Dirava ena Basileia ia harorolaia bona Iesu ena sivarai ia hadibaia. Danu Asia Minor bona Iudea kongrigeisen totona revareva ia torea. Oibe, Iehova ese Paulo ia gaukaralaia bese idauidau dekenai sivarai namona ia halasia totona.