LESENI 12
Dahaka ese Oi Do Ia Durua Baibel Oi Stadilaia Noho Totona?
Baibel stadilaia noho karana be mai ena namo bada, to danu ia be mai ena hekwarahi. Nega haida do oi laloa bema Baibel do oi stadilaia noho eiava lasi. To dahaka dainai ita gaukara goada be namo? Dahaka ese oi do ia durua mai haheauka ida oi stadi noho totona?
1. Dahaka dainai Baibel stadilaia karana be mai anina bada?
“Dirava ena hereva be ia mauri noho, bona ia be mai ena siahu.” (Heberu 4:12) Baibel be mai anina bada badina Dirava ena lalohadai bona hemami oi dekenai do ia hahedinaraia. Baibel amo gau momo do oi dibaia, bona emu mauri do ia hanamoa bona vaira nega totona helaro do ia henia. Danu mai anina bada gauna be, Baibel ese oi ia durua Iehova ena turana ai oi lao totona. Baibel oi stadilaia neganai, ena hereva ese emu mauri do ia durua.
2. Dahaka dainai Baibel ena hereva momokani ita dibaia be mai anina bada?
Baibel ena hereva momokani be dava bada gaudia bamona. Unai dainai Baibel ese ita ia hagoadaia ‘hereva momokani ita hoia bona ita hoihoilaia lasi.’ (Aonega Herevadia 23:23) Baibel ena hereva momokani ese ita ia durua karana ita lalopararalaia neganai, iseda stadi karana do ita hadokoa lasi ena be koua gaudia idia vara.—Aonega Herevadia 2:4, 5 duahia.
3. Edena dala ai Iehova ese oi do ia durua oi stadi noho totona?
Emu siahu ibounai Havaraia Tauna bona Turana, Iehova, ia ura oi ia durua, ia oi dibaia totona. Ia ese oi dekenai “ura bona goada ia henia, ia ura henia gaudia [oi] karaia totona.” (Filipi 2:13 duahia.) Danu bema nega haida heduru oi ura emu stadi karaia, eiava oi dibaia gaudia oi badinaia totona, Dirava ese oi ia durua diba. Bema koua gaudia eiava dagedage hanaia totona goada oi ura neganai, Dirava ese oi ia durua diba. Hanaihanai Iehova guriguri henia karana ese oi ia durua diba Baibel oi stadilaia noho totona.—1 Tesalonika 5:17.
DIBA MA HAIDA ABIA
Baibel oi stadilaia noho dalana dibaia, ena be oi bisi eiava ma haida ese oi idia dagedage henia. Bona oi stadi noho totona, Iehova ese oi do ia durua daladia oi laloa.
4. Baibel stadi oi laloa bada
Nega haida ita bisi bada bona toana be nega be lasi Baibel ita stadi totona. Dahaka ese ita ia durua diba? Filipi 1:10 duahia, bena inai henanadai herevalaia:
Dahaka be “mai anina bada gaudia” emu mauri lalonai?
Edena dala ai Baibel stadilaia karana oi atoa guna diba?
Bema baketi be miri amo oi hahonua guna, bena nadi oi udaia, speis be lasi nadi ibounai totona
Bema nadi oi udaia guna, speis do ia hegeregere miri ibounai oi hahonua totona. Unai hegeregerena, bema “mai anina bada gaudia” be emu mauri lalonai oi atoa guna, unai gaudia ibounai do oi hagugurua diba bona nega ia noho gau ma haida totona
Baibel stadilaia karana ese ita ia durua Dirava ita dibaia bona tomadiho henia totona. Mataio 5:3 duahia, bena inai henanadai herevalaia:
Baibel stadilaia karana ita atoa guna neganai, dahaka heduru ita abia diba?
5. Dagedage neganai haheauka noho
Ma haida oi dekenai hereva idauidau do idia gwauraia emu Baibel stadi oi hadokoa totona. Francesco ena haheitalai itaia. VIDIO itaia, bona inai henanadai herevalaia.
Vidio ai, Francesco ese ia dibaia gaudia be ena turadia bona famili dekenai ia gwauraia neganai, dahaka idia karaia?
Iena haheauka karana dainai dahaka ia vara?
Timoteo Iharuana 2:24, 25 duahia, bena inai henanadai herevalaia:
Oi dibaia noho gaudia dainai emu famili bona turadia edia hemami oi dekenai be edena bamona?
Inai siri hegeregerena, Baibel oi stadilaia dainai ta ia moale lasi neganai, dahaka oi karaia be namo? Dahaka dainai unai bamona oi haere?
6. Iehova dekenai tabekau oi ia durua totona
Iehova kahirakahira ita lao noho lalonai, do ita ura ia ita hamoalea. To nega haida iseda mauri ai iena taravatu hegeregerena senisi ita karaia be mai ena hekwarahi. Bema unai bamona oi mamia, oi hesiku lasi. Iehova ese oi do ia durua. VIDIO itaia, bona inai henanadai herevalaia.
Vidio ai, Jim be dahaka senisi ia karaia Iehova hamoalea totona?
Iena haheitalai ese edena dala ai oi ia durua?
Heberu 11:6 duahia, bena inai henanadai herevalaia:
Iehova be dahaka do ia karaia “mai momokani ida ia idia tahua taudia” eiava idia hekwarahi ia idia dibaia bona hamoalea taudia totona?
Iehova ia itaia oi hekwarahi Baibel oi stadilaia neganai, iena hemami be edena bamona?
HAIDA DO IDIA HENANADAI: “Dahaka dainai Baibel oi stadilaia?”
Emu haere be dahaka?
POINT BADANA
Herevana Baibel stadilaia karana be mai ena hekwarahi, to unai ese oi ia durua diba mauri oi moalelaia hanaihanai totona. Nega ibounai Iehova oi tabekau henia, bona ia ese oi do ia hanamoa.
Riviu
Dahaka dainai oi dekenai Baibel ena hereva momokani be mai anina bada?
Edena dala ai oi ese ‘mai anina bada gaudia do oi diba’?
Dahaka dainai Baibel oi stadilaia noho totona Iehova ena heduru oi noia be namo?
REFERENS ITAIA
Taunimanima idia durua edia nega idia gaukaralaia namonamo daladia foa mani oi laloa.
“Edena Bamona Emu Nega Oi Gaukaralaia Namonamo” (Noga!, February 2014)
Do oi itaia edena bamona hahine ta be Iehova ese ia durua, ena be iena hekwarahi Dirava hamoalea totona be ena tau ese ia lalopararalaia lasi.
Do oi itaia edena dala ai hahine ta be ia haheauka dainai iena tau ia durua.
Haida idia gwau Iehova ena Witnes be famili idia hapararaia. To unai be momokani, a?
“Iehova Ena Witnes Taudia be Famili Idia Hapararaia Eiava Idia Hagoadaia?” (Websait atikol)