Edena Dala ai Dirava ese Iseda Tomadiho Karana Ia Moalelaia Diba?

Leseni 13 ai ita herevalaia bamona, tomadiho momo be Dirava idia hamoalea lasi. To iseda Havaraia Tauna ese ia moalelaia dalana ai ia ita tomadiho henia diba. Dirava ese edena “tomadiho dalana” ia moalelaia? (Iamesi 1:27) Baibel ia hadibaia gaudia itaia.

1. Iseda tomadiho ai dahaka be mai anina bada?

Iseda tomadiho be Baibel ena hahediba hereva ida ia hegeregere be mai anina bada. Iesu be Dirava dekenai ia gwau: “Oiemu hereva be momokani.” (Ioane 17:17) Tomadiho haida ese Dirava ena Hereva momokani Baibel lalonai idia dadaraia. Idia ese taunimanima edia sene karadia bona hahediba hereva koikoidia amo Baibel ena hereva idia haidaua. To Iehova be iena ‘taravatu idia dadaraia’ taudia dekenai ia moale lasi. (Mareko 7:9 duahia.) Unai dainai iseda tomadiho karana be Baibel ena hahediba herevadia ida ia hegeregere neganai, Dirava ena kudouna do ita hamoalea diba.

2. Edena dala ai Iehova ita tomadiho henia be namo?

Iehova be iseda Havaraia Tauna dainai ia sibona ita tomadiho henia be maoro. (Apokalupo 4:11) Anina be ia do ita lalokau henia, bona ia sibona ita tomadiho henia be namo, to kaivakuku bona unai bamona gauna ta ena laulau ita gaukaralaia lasi.​​—Isaia 42:8 duahia.

Iehova dekenai iseda tomadiho karana ia ‘helaga, bona ia moalelaia’ be namo. (Roma 12:1) Unai ena anina be iseda mauri ai iena kara maoromaoro taravatudia ita badinaia be namo. Hegeregere, Iehova idia lalokau henia taudia ese iena taravatu headava totona idia laloa bada bona idia badinaia. Bona tauanina hamiroa karadia, hegeregere kuku bona buatau ania karana, bona drag gaukaralaia kerere eiava alkahol o bia momo inua karana idia dadaraia.a

3. Dahaka dainai abidadama tamona taudia ida Iehova ita tomadiho henia be namo?

Iseda wiki ta ta ena hebou ese dala ia kehoa ‘Iehova do ita hanamoa, idia hebou taudia edia huanai.’ (Salamo 111:​1, 2) Dala ta be ane amo Dirava ita hanamoa. (Salamo 104:33 duahia.) Iehova ia ura hebou ita lao, badina ita ia lalokau henia bona ia diba ita ese hebou amo heduru do ita abia, unai amo mauri do ita moalelaia hanaihanai. Hebou ai ita hagoadaia heheni neganai unai ese ita ia durua.

DIBA MA HAIDA ABIA

4. Iseda tomadiho lalonai kaivakuku ita gaukaralaia lasi be namo

VIDIO: Dirava be Kaivakuku Tomadiho Henia Karana Ia Abia Dae, A? (3:​26)

• Baibel negadiai, Dirava ena taunimanima haida be ia tomadiho henia totona, kaivakuku idia gaukaralaia neganai dahaka ia vara?

Taunimanima haida be edia tomadiho lalonai kaivakuku idia gaukaralaia badina idia ura Dirava kahirakahira idia lao. To unai bamona idia karaia neganai, idia be Dirava amo idia daudau. Esodo 20:​4-6 bona Salamo 106:​35, 36 duahia, bena inai henanadai herevalaia:

• Edena bamona laulau, kaivakuku o gau ma haida oi itaia, taunimanima ese edia tomadiho lalonai idia gaukaralaia?

• Kaivakuku o laulau gaukaralaia karana dekenai Iehova ena hemami be edena bamona?

• Kaivakuku o laulau gaukaralaia karana be edena bamona oi laloa?

5. Iehova sibona tomadiho henia karana ese lalohadai koikoidia amo ita ia ruhaia

VIDIO: Hereva Momokani ese Lau Ia Ruhaia (5:​16)

Salamo 91:14 duahia, bena inai henanadai herevalaia:

• Iehova ita lalokau henia bona ia sibona ita tomadiho henia neganai, iena gwauhamata ita totona be dahaka?

6. Kongrigeisen heboudia ai Dirava ita tomadiho

Kongrigeisen heboudia ai, ane ita abia bona haere ita henia karana amo Iehova ita hanamoa bona ita hagoadaia heheni. Salamo 22:22 duahia, bena inai henanadai herevalaia:

• Hebou ai oi kamonai haeredia oi moalelaia, a?

• Oi ura haere ta henia totona do oi hegaegae, a?

7. Iehova ia moale bema ita dibaia gaudia be ma haida ida ita herevalaia

Dala idauidau ai, ma haida dekenai Baibel ena hereva momokani ita herevalaia diba. Salamo 9:1 bona 34:1 duahia, bena inai henanadai herevalaia:

• Baibel amo oi dibaia gauna ta be dahaka bona oi ura ma ta dekenai unai oi herevalaia?

POINT BADANA

Iseda Havaraia Tauna ita hamoalea bema ia sibona ita tomadiho henia, kongrigeisen heboudia ai ia ita hanamoa, bona ita dibaia gaudia be ma haida ida ita herevalaia.

Riviu

• Edena dala ai Dirava tomadiho henia ena dala maorona do ita dibaia?

• Dahaka dainai Iehova sibona ita tomadiho henia be namo?

• Dahaka dainai Dirava idia ura hamoalea taudia ida ia ita tomadiho henia be namo?

REFERENS ITAIA

Inai sivarai “Kaivakuku Hesiai Henia Karana Lau Rakatania” ai, hahine ta ese kaivakuku tomadiho henia karana ia rakatania dalana oi duahia.

“Baibel ese Mauri Ia Haidaua” (Gima Kohorona, July 1, 2011)

Kongrigeisen heboudia ai haere oi henia totona oi do ia durua gaudia oi dibaia.

“Kongrigeisen ai Iehova Hanamoa” (Gima Kohorona, January 2019)

Do oi itaia tau matamata ta be kongrigeisen heboudia amo namo ia abia ena be ia auka hebou ia lao totona.

Iehova be Lau Ia Naria (3:​07)

Momo idia laloa korosi be Keristani tomadiho ia hahedinaraia, to oi laloa iseda tomadiho lalonai ita gaukaralaia be maoro, a?

“Dahaka Dainai Iehova Ena Witnes Taudia be Korosi Idia Gaukaralaia Lasi?” (Websait atikol)