HEREVAHEREVA HAMATAMAIA
LESENI 5
Aonega Gaukaralaia
Hakaua Hereva: “Namona be hanaihanai mai gado namo ida do umui hereva.”—Kol. 4:6.
Paulo ese Ia Karaia Gauna
1. VIDIO itaia, eiava Kara 17:22, 23 duahia. Bena inai henanadai oi laloa:
Paulo be Atena ai tomadiho koikoi karadia ia itaia neganai ena hemami be edena bamona?—Kara 17:16 itaia.
Paulo be Atena taudia ia gwau henia lasi, to edena dala ai mai aonega ida idia abia dae gaudia ia gaukaralaia sivarai namona ia harorolaia totona?
Paulo amo Dahaka Ita Dibaia?
2. Taunimanima do idia ura kamonai bema ita gwauraia herevadia ita abia hidi namonamo, dala maorona bona nega maorona ai ita gwauraia.
Paulo Tohotohoa
3. Oi gwauraia herevadia abia hidi namonamo. Hegeregere, dubu ia lao diba lasi tauna oi hereva henia neganai, Baibel eiava Iesu oi herevalaia dalana oi haidaua diba.
4. Namo lasi karaharaga ta ena hereva oi hamaoromaoroa. Oi naria ela bona ena hereva ia haorea. Bema ia gwauraia gauna ta be Baibel ida ia hegeregere lasi, namo lasi ia ida oi hepapahuahu. (Iam. 1:19) Iena hereva oi kamonai namonamo neganai, ia abia dae gaudia bona edia badina do oi dibaia.—Aon. 20:5.
5. Iena lalohadai maorona ta dekenai oi lalotamona bona oi hanamoa. Reana do ia abia dae iena tomadiho ese ia hadibaia gaudia be maoro. To umui ruaosi umui lalotamona gauna ta oi herevalaia guna, bena metairametaira oi durua Baibel ena hahediba herevana ia lalopararalaia totona.