Iesu ena Mauri bona Gaukara

Nikodemo Ia Hadibaia

LAGANI 30 C.E. ai, Paseka aria dekenai ia lao neganai, Iesu ese hoa karadia haida ia karaia. Unai dainai taunimanima momo ese idia abidadama henia. Iuda ena kota badana tauna ta, ladana Nikodemo ese Iesu ena kara ia hoalaia bona ia ura ma diba haida ia abia. Hanuaboi neganai Iesu ia vadivadi henia, Iuda lohia taudia ma haida do idia itaia bena ena ladana do idia hadikaia garina.

Ia gwau: “Rabi e, ai diba oi be hadibaia tauna, Dirava dekena amo oi mai vadaeni, badina oi karaia toadia be tau ta ia karaia diba lasi bema Dirava ese ia durua lasi neganai.” Iesu ese Nikodemo ia hamaoroa, bema ta ia ura Dirava ena Basileia lalonai do ia noho, namona be “ia vara lou.”

To edena bamona ia vara lou diba? Nikodemo ia henanadai, ia gwau: “Ena sinana bogana dekenai do ia vareai lou diba, vadaeni do ia vara lou, a?”

Lasi, unai be vara lou ena anina lasi. Iesu ese ena anina ia gwauraia, ia gwau: “Taunimanima be ranu dekena amo bona Lauma Helaga dekena amo bema ia vara lasi, ia be Dirava ena Basileia lalonai do ia vareai diba lasi.” Iesu be bapatiso ia abia neganai lauma helaga be ia dekenai ia diho mai, unai amo ia be “ranu dekena amo bona Lauma Helaga dekena amo” ia vara. Unai neganai guba amo Dirava ia boiboi ia gwau: “Inai be lauegu Natuna, egu lalokau, lau moale bada ia dekenai.” Unai amo ia hahedinaraia lauma natuna, guba Basileia lalonai do ia vareai diba tauna ta, ia havaraia. Gabeai, Pentekoste 33 C.E. ai, bapatiso idia abia vadaeni taudia ma haida ese lauma helaga idia abia, unai amo idia vara lou bona Dirava ena lauma natudia ai idia lao.

To Dirava ena Natuna hereadaena be mai ena dagi badana. Iesu ese Nikodemo ia hamaoroa, ia gwau: “Mose ese taunimanima idia noho lasi tano dekenai gaigai ia abia isi bamona, Taunimanima ena Natuna danu unai bamona do idia abia isi. Vadaeni do idia abidadama henia taudia ibounai ese mauri hanaihanai do idia abia.” Oibe, gaigai dikadia ese idia koridia Israel taudia iboudiai idia mauri totona, namona be unai auri laboralabora gaigaina idia raraia tao. Unai hegeregerena, namona be taunimanima iboudiai ese Dirava ena Natuna idia abidadama henia idia mauri totona.

Iesu ese Nikodemo dekenai Iehova ena lalokau karana ia herevalaia, ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” Ierusalem dekenai Iesu ese ena hesiai gaukara ia hamatamaia, bena hua 6 murinai, unai hereva amo ia hahedinaraia goevagoeva, iena amo Iehova Dirava ese taunimanima do ia hamauridia. Ioane 2:23-3:21; Mataio 3:16, 17; Kara 2:1-4; Numera 21:9.

◆ Dahaka ia vara dainai Nikodemo ese Iesu ia vadivadi henia, bona dahaka dainai hanuaboi neganai ia vadivadi henia?

◆ “Vara lou” ena anina be dahaka?

◆ Edena hereva amo Iesu ese ena hamauria gaukarana ia haheitalaia?