Iesu ena Mauri bona Gaukara

Ioane Ia Maragi Iesu Ia Bada

LAGANI 30 C.E. ena Paseka murinai, Iesu bona ena hahediba taudia ese Ierusalem idia rakatania bona Iudea dekenai idia lao taunimanima bapatisodia totona. Lagani ta ia lao vadaeni Ioane Bapatiso ese unai gaukara ia hamatamaia, bona ena hahediba taudia ese idia bamoa noho.

Iesu ese taunimanima ia bapatisodia lasi, to ena oda herevana hegeregerena ena hahediba taudia ese idia bapatisodia. Idia karaia bapatisona bona Ioane ese ia karaia bapatisona edia anina be tamona; ia be Dirava ena Taravatu idia utua taudia be edia kara dika amo idia helalo-kerehai ena toana. To, Iesu be mase amo ia toreisi lou negana murinai, ena hahediba taudia ia hamaorodia idia be bapatiso mai anina idauna do idia karaia. Keristen bapatiso be toa ta, ia hahedinaraia bapatiso tauna ese Iehova Dirava ia gwauhamata henia, ena ura do ia karaia hanaihanai.

Iesu be ena haroro gaukara ia hamatamaia neganai, ia bona Ioane ruaosi, ena be idia gaukara hebou lasi, to gaukara tamona idia karaia—taunimanima idia hadibadia bona helalo-kerehai taudia idia bapatisodia. To Ioane ena hahediba taudia ese Iesu idia vagege henia bona idia maumauraia; idia gwau: “Rabi e, . . . ia bapatiso karaia noho. Bona taunimanima ibounai ia dekenai idia lao noho.”

Ioane ese Iesu ia vagege henia lasi, to ena gaukara ia moalelaia bona ia ura ena hahediba taudia danu do idia moalelaia. Ia hamaorodia, ia gwau: “Umui danu umui diba lau gwau lau be Keriso lasi, to iena vairana dekenai lau mai guna totona Dirava ese lau ia siaia vadaeni.” Bena haheitalai namona ia gwauraia, ia gwau: “Headava matamata hahine be headava matamata tauna ese ia biagua. To headava matamata tauna ena turana be ia gini noho, ia hakala, vadaeni headava matamata tauna ena gadona ia kamonai neganai ia moale bada. Unai dainai, lauegu moale be ia momokani vadaeni.”

Ioane be headava matamata tauna ena turana, bona hua 6 gunanai ia be mai ena moale ida ena hahediba taudia ia hakaudia lao Iesu dekenai. Gabeai idia haida be Dirava ese ena lauma helaga amo ia horodia, guba dekenai Keriso ena headava matamata hahinena oreana ai do idia lao totona. Ioane ia ura ena hahediba taudia ese Iesu idia do gavaia, badina Dirava ese ia siaia, Keriso ena haroro gaukara ena dala ia lailaia totona. Ioane ia gwau: “Ia be do ia bada, lau be do lau maragi.”

Nega sisina murinai King Herod ese Ioane ia dogoatao. Herod ese ena kakana Filipo ena adavana, Herodia ia abia iena. Ioane ese ena kerere ia gwauraia hedinarai neganai, Herod ese dibura rumana lalonai ia koua. Iesu ese Ioane ena sivarai ia kamonai neganai, ia mai ena hahediba taudia ida Iudea idia rakatania bona Galilea dekenai idia lao. Ioane 3:22-4:3; Kara 19:4; Mataio 28:19; 2 Korinto 11:2; Mareko 1:14; 6:17-20.

◆ Iesu be mase amo ia do toreisi lou lasi neganai ena oda hegeregerena idia karaia bapatisodia edia anina be dahaka? Ena toreisi lou murinai idia karaia bapatisodia edia anina be dahaka?

◆ Edena bamona Ioane ese ia hahedinaraia ena hahediba taudia edia maumau be anina lasi?

◆ Dahaka dainai Ioane be dibura rumana lalonai idia koua?