Maino Diravana ese Ita Ia Hagoadaia
“Inai hereva dekena amo umui ta ta dekenai goada do umui henia.”—1 TESALONIKA 4:18.
1. Paulo be edena bamona ia noinoi, unai amo ia hahedinaraia maino ia laloa bada?
APOSETOLO Paulo ia ura bada Keristen ekalesia oreana ese maino do ia abia. Unai dainai, iena revareva 13 lalodiai ia ese Dirava ia noia, ia tore henidia taudia ese maino, Dirava ena amo do idia abia. Unai hegeregerena, Paulo ese kongregesen matamatana Tesalonika dekenai ia tore henia, ia gwau: “Dirava ai noia, iena hariharibada bona iena maino umui dekenai do ia henia.” Unai revareva ena dokonai ia be ma ia noinoi lou, ia gwau: “Maino ena Dirava ese umui do ia hahelagaia. Emui lalona bona emui laumana bona emui tauanina be ia ese do ia naria noho. Mai kerere ta lasi danu do umui noho ela bona iseda Lohiabada Iesu Keriso do ia giroa mai.”—1 Tesalonika 1:1; 5:23.
2. (a) Paulo ena lalokau kongregesen dekenai be edena bamona? (b) Keristen elda taudia hari inai negai ese Paulo edena bamona idia tohotoho diba?
2 Paulo bona iena bamona taudia be unai Keristen matamatadia edia huanai idia hekwarahi bona hisihisi idia ania. Paulo i gwau: “Umui huanai ai be manau, iena natuna ia ubua hahine bamona. Umui ai lalokau henia bada dainai ai ese Sivarai Namona umui dekenai ai henia. Bona inai sibona lasi, to ai be ai noho hegaegae, aiemai mauri umui dainai do ai atoa diho badina be umui ai lalokau henia bada.” Unai bamona ia hereva dainai, ita diba Paulo ese unai kongregesen ia lalokau henia bada, ani? Momokani, hari inai negai, tanobada hegegemadai unai bamona lalokau be Keristen elda taudia ese idia hahedinaraia, Iehova ena Witness taudia edia kongregesen 50,000 lalodia.—1 Tesalonika 2:7-9; Ioane 13:34, 35; 15:12-14.
3. (a) Timoteo ese Tesalonika ena kongregesen edena bamona ia durua? (b) Inai be dahaka hegeregerena hari inai nega lalonai?
3 Hedibagani Tauna, Satana ese hisihisi idauidau amo unai Keristen taudia Tesalonika dekenai ia hahisidia vadaeni. Unai dainai Paulo ese Timoteo ia siaia lao idia dekenai, ‘ia ese idia do ia hagoadaia, bona edia abidadama do ia durua totona.’ Timoteo be Paulo dekenai ia giroa lou, Atene dekenai, bena edia abidadama bona lalokau ia hamaorolaia mai ena moale bada ida. Paulo be edia abidadama bona kara maoromaoro sivaraina ia kamonai neganai ena lalona ia goada momokani, bona Dirava ia guriguri henia goadagoada noho, abidadama ai idia dabu gaudia do ia henidia guguru. (1 Tesalonika 3:1, 2, 5-7, 10) Unai hegeregerena, hari inai nega lalonai sekit naria taudia ese kongregesen idia hagoadadia, Iehova ena Witness taudia edia gaukara idia taravatulaia o idia dagedage henidia bada gabudia dekenai danu.—Isaia 32:1, 2.
‘Ia Mai Neganai’
4, 5. (a) Paulo ena noinoi ma ta be dahaka, bona dahaka dainai ita ese unai noinoi ita laloa bada? (b) Dahaka dainai hari inai nega be mai anina bada?
4 Ena revareva lalonai aposetolo Paulo be ma ia gwau: “Namona be Lohiabada ese emui lalokau umui ta ta dekenai bona taunimanima ibounai dekenai do ia habadaia, umui dekenai ai lalokau henia bada hegeregerena. Inai dala dekenai Dirava ese goada umui do ia henia, Vadaeni iseda Lohiabada Iesu Keriso mai ena helaga taudia ibounai idia mai neganai umui be do umui goeva bona mai helaga danu do umui gini iseda Tamana Dirava ena vairana dekenai.”—1 Tesalonika 3:12, 13.
5 Paulo ese vaira negana ia herevalaia unai, Iesu ‘do ia giroa mai bona tanobada dokona danu’ negana; unai neganai “Taunimanima ena Natuna be mai ena hairai danu do ia mai, mai ena aneru helagadia danu.” Iseda King guba dekenai be lagani 1914 lalonai ia ginidae. Hari inai negai Iesu be ena terona mai hairaina latanai ia helai, tanobada besedia bona taunimanima ia kota henidia noho bona ia hapararadia; mamoe bamona taudia mai edia manau be ena idiba kahana dekenai ia atodia, “hisihisi bada herea” amo do idia roho mauri bena mauri hanaihanai be paradaiso tanobadana dekenai do idia abia totona.—Mataio 24:3-21; 25:31-34, 41, 46.
Inai Hadibaia Hereva ese Iseda Namo Idia Habadaia
6 Oi danu ese mauri hanaihanai oi tahua noho a? Bema oibe, namona be Paulo ena hereva, Tesalonika taudia ia tore henidia herevana, oi kamonai henia be namo: “Aiemai varavara taudia e, edena bamona do umui mauri Dirava hamoalea totona dalana be umui ai hadibaia vadaeni. Oibe, bona inai mauri dalana umui badinaia noho. To hari Iesu ena ladana dainai umui ai noia goadagoada, taunimanima edia vairanai inai bamona mauri namona do umui habadaia. Aiemai hadibaia hereva Lohiabada Iesu ena ladanai, umui dekenai ai henia gauna, be umui diba vadaeni.” (1 Tesalonika 4:1, 2) Hari “hadibaia hereva” Paulo ese ia herevalaia, be dahaka dahaka.
7. (a) Dahaka “hadibaia hereva” ia henidia? (b) Dirava ena lauma ita abia vadaeni murinai, dahaka dainai ita be nega ibounai ita naria namonamo be namo?
7 “Hadibaia hereva” ginigunana be kara maoromaoro herevana, Paulo ia hereva goadagoada, ia gwau: “Dirava ena ura be inai: do umui helaga, heudahanai karadia do umui rakatania momokani. Umui ta ta emui adavana danu do umui noho hebou mai helaga bona mai maoromaoro Dirava ena vairana dekenai. Emui adavana umui abidia be, umui ura henidia lasi mai matabodaga danu, Dirava diba lasi bese taudia bamona.” Ita moale, badina be Dirava bona ena Natuna, Iesu Keriso ita diba, bona mauri hanaihanai ita tahua noho dainai. Bema ita naria namonamo lasi dainai tanobada ena matabodaga karadia edia kopukopu lalonai ita idia veria vareai lou, ita hemarai bada be namo! Madi, iseda orea taudia haida be nega daudau lalonai dibura rumadia dekenai idia haheauka, eiava lagani momo lalodiai misinari gaukara idia karaia goadagoada, to unai murinai idia naria namonamo lasi dainai Hedibagani Tauna ese kara bodagadia amo ia hakereredia. Dirava ena lauma helaga ita abia vadaeni; namona be matabodaga karadia amo ‘ena lalona do ita hahisia lasi’!—1 Tesalonika 4:3-8; Ioane 17:3; 1 Korinto 10:12, 13; Efeso 4:30.
8, 9. (a) ‘Iseda varavara ekalesia taudia ita lalokau henidia’ neganai, dahaka lalokau ita hahedinaraia? (b) Unai lalokau be edena bamona ita habadaia diba, bona inai dainai dahaka namo do ita davaria?
8 Paulo ena “hadibaia hereva” ma ta be, “emui varavara ekalesia taudia do umui lalokau henidia.” (1 Tesalonika 4:9, 10) Inai be lalohadai maoromaorodia amo ia vara lalokauna, a ga’pe, hahedinaraia dalana ta, Paulo ese inai siri 9 lalonai, bona karoa 3, siri 6 bona 12 lalonai danu ia herevalaia mai ena ura bada danu. Inai dala amo Iesu bona Petro idia lalokau heheni bona David bona Ionatan idia lalokau heheni. (Ioane 21:15-17; 1 Samuel 20:17; 2 Samuel 1:26) Inai bamona lalokau be Iehova ena Witness taudia ese idia hahedinaraia, pioneer gaukara bona Dirava ena hesiai gaukara ma haida lalodiai idia hebamo heheni negadiai.
9 Paulo ia gwau: “Umui ai noia, unai lalokau do umui habadaia.” Iseda lalokau, ia amo iseda tadikaka ida ita lalokau heheni lalokauna, be nega ibounai ita habadaia diba. Elda taudia bona kongregesen ena hesiai taudia ese Basileia gaukarana idia gunalaia mai edia goada danu negadiai, inai lalokau be bada herea. Kongregesen taudia be taunimanima mo, unai dainai nega haida idia badu heheni, to idia iboudiai ese ‘Basileia idia tahua guna’ neganai, unai hekwakwanai idia laloa maragi. Ita tahua gauna be nega ibounai ita itaia tao be namo!—Mataio 6:20, 21, 33; 2 Korinto 4:18.
10. Edena dala amo ita Keristen taudia be “taunimanima namodia” ai ita lao diba?
10 Bena Paulo be “hadibaia hereva” ma ta ia gwauraia, ia gwau: “Inai bamona mauri umui tahua be namo: mai manau danu umui noho, haida edia mauri totona umui hereva momo lasi. Haida dekena amo edia aniani umui tahua lasi, to umui sibona emui aniani do umui havaraia.” Dina ta ta iboudiai ita be “taunimanima namodia” hegeregeredia ita kara bona lalokau maorona amo iseda tadikaka ita lalokau henidia noho lalonai, iseda dabu gaudia iboudiai be Dirava ese ita do ia henia.—1 Tesalonika 4:11, 12; Ioane 13:35; Roma 12:10-12.
Toreisi Lou Helarona ese Iseda Lalona Ia Hagoadaia
11. (a) Dahaka dainai Paulo ese toreisi lou ia gwauraia? (b) Paulo ena hereva ena anina ita dekenai be dahaka?
11 Unai murinai aposetolo Paulo ese toreisi lou helarona namo hereana ia herevalaia. Badina be dahaka? Badina be ia ura iena tadikaka do ia hagoadadia, do idia vara hisihisidia do idia haheaukalaia totona. Edia mauri do idia boio diba. Idia haida be mase dekenai idia mahuta vadaeni. Unai dainai Paulo ese Keristen taudia edia lalona ia hagoadaia be namo. (1 Tesalonika 2:14-20) Unai neganai idia laloa Keriso be kahirakahira do ia lou mai, unai dainai idia ura do idia diba dahaka be idia mase vadaeni taudia dekenai do ia vara. Iena revareva amo Paulo ese unai bamona idia lalohisihisi bona idia daradara taudia edia lalona ia hagoadaia, bona iboudiai edia lalona ia hagoadaia, do idia haheauka ela bona Iehova ena “dina” do ia ginidae. Namona be Paulo ena sisiba ese ita ibounai ia durua, lauma dalanai do ita gini goada bona sivarai namona do ita harorolaia totona, inai nega ena dokona ita naria noho lalonai.—2 Tesalonika1:6-10.
12 Iseda lalokau tauna ta ia mase neganai, dahaka ese iseda lalona ia hagoadaia momokani, bona unai hahegoada be daika ena amo ia mai?
12 Paulo ia gwau: “Aiemai varavara taudia e, ai ura lasi mase dekenai idia mahuta taudia totona umui daradara. Umui lalohisihisi lasi, ekalesia lasi taudia bamona, madi idia laloa goada diba lasi.” (1 Tesalonika 4:13) Toreisi lou helarona ese iseda lalona ia hagoadaia bona ia hamainoa momokani! Ma lagani 5 murinai, Paulo ese iena revareva iharuana Korinto taudia edia be inai hereva amo ia torea matamaia: “Lau ura Dirava iseda Tamana bona Lohiabada Iesu Keriso ese bogahisihisi bona maino umui dekenai do idia henia. Dirava iseda Lohiabada Iesu Keriso ena Tamana ita hanamoa. Ia be iseda Tamana, bona bogahisihisi bona durua ibounai ia henia Diravana. Aiemai hisihisi ibounai lalonai ia ese ai ia durua noho. Unai dainai hisihisi idia abia noho taudia be ai durua diba. Dirava ese ai ia henia durua be ai ese ma ai henia noho idia dekenai.”—2 Korinto 1:2-4.
13, 14. (a) Dahaka dainai Paulo ia ura mase ena anina be Keristen taudia do ia hadibadia? (b) Bible ese ia hahedinaraia mase taudia be edena bamona?
13 Aposetolo ia ura lasi ita be mase taudia do ita daradaralaidia. Gabeai, sibodia be Keristen idia gwauraia taudia ese tomadiho dalana maorona idia rakatania, Babulono bona Greece edia hahediba herevadia dekenai idia giroa lou. Taunimanima edia lauma idia mase diba lasi herevana be unai taudia ese idia abia dae—hari inai negai unai hereva be tanobada ibounai ena tomadiho koikoi basileiana ena hahediba herevana badana ta. Idia gwau, taunimanima idia mase murinai idia be guba eiava pegatori eiava hisihisi hanaihanai gabuna dekenai idia mauri noho, to unai hereva amo taunimanima edia lalona idia hagoadaia diba lasi. Danu, taunimanima edia lauma ia mase diba lasi herevana ese toreisi lou herevana ia hakoikoia, badina be bema mase taudia be idia mase momokani lasi, mauri abia totona idia toreisi lou ena anina be dahaka?
14 Paulo ese “mase dekenai idia mahuta taudia” ia gwauraidia. Oibe, idia “mahuta.” Ia mahuta noho tauna be gau ta ia diba lasi bona kara ta ia karaia diba lasi. (Kohelete 9:5, 10 itaia.) Iesu be ena haroro gaukara ia karaia noho lalonai, nega ta ia gwau Lasaro “be ia mahuta noho,” ma ia gwau ia, Iesu, ese do ia “haoa.” Keriso ena hahediba taudia be unai hereva edia anina idia lalopararalaia lasi dainai, “Iesu ese idia dekenai ia hereva maoro, ia gwau, ‘Lasaro be ia mase vadaeni.’” Lasaro ena taihuna ruaosi, Mareta bona Maria be edia lalona idia goada toreisi lou helarona dainai, bona Iesu ese edia lalona ma ia hagoadaia lou. Iesu ese iena turana, dina 4 ia mase vadaeni tauna, be mase ena mahuta amo ia hatorea isi lou neganai, unai ese edia abidadama ia hagoadaia bada!—Ioane 11:11-14, 21-25, 43-45.
15. (a) Dahaka ese iseda abidadama toreisi lou helarona dekenai ia hagoadaia? (b) Iseda lalokau tauna ta ia mase murinai, iseda lalohisihisi be edena bamona ita hamaragia diba?
15 Iesu ese unai hoa karana ia karaia bona mase taudia ma haida danu ia hatoredia isi, bona unai murinai Iehova ese Iesu ia hatorea isi lou—unai kara iboudiai be taunimanima momo ese idia itaia bona idia hamomokania dainai, edia hereva ese iseda abidadama toreisi lou helarona dekenai idia hagoadaia. (Luka 7:11-17; 8:49-56; 1 Korinto 15:3-8) Momokani, iseda lalokau tauna ta ia mase neganai ita lalohisihisi bona ita taitai. To Lohia Badana Iehova ena gwauhamata ese iseda lalona ia hagoadaia momokani, ia gwau “mase do ia haorea ela bona hanaihanai, bona . . . taitai ranuna be vaira iboudiai amo do ia dahua oho”! (Isaia 25:8; Apokalupo 21:4) Iseda lalohisihisi haorea dalana namo hereana be inai: Maino Diravana ena hesiai gaukara be nega ibounai ita goadalaia, bona Basileia helarona namo hereana be ma haida ita henidia noho.—Kara 20:35itaia.
Toreisi Lou Dalana
16, 17. (a) Dirava ese mase edena bamona do ia haorea? (b) Paulo ia gwau daidia do idia toreisi lou guna, bona daidia be gabeai?
16 Keriso, “toreisi lou taudia . . . ia gunalaia” tauna, be hari inai negai ena terona latanai ia helai, Dirava ena idibana kahanai, guba lalonai; ita abia dae momokani ia ese Iehova ena palani namodia Basileia totona do ia hagugurua. (Heberu 6:17, 18; 10:12, 13) Paul be ena revareva ma ta lalonai ia torea herevana be inai: “Badina be Keriso ese gau ibounai do ia biagua, ela bona Dirava ese ia dekenai idia tuari taudia ibounai iena aena henunai do ia atodia. Ia dekenai idia tuari taudia ibounai ia ese ia haorea murinai, Dirava ese mase danu do ia haorea.” Edena dala amo? Toreisi lou amo bona taunimanima ese Adam ena amo idia abia masena abia oho karana amo. Aposetolo Paulo ese inai bamona ia gwauraia: “Badina be tau tamona dekena amo mase ia vara, bona inai bamona danu, tau tamona dekena amo mase dekena amo toreisi lou ia vara. Badina be taunimanima ibounai Adam dainai idia mase vadaeni, unai bamona danu Keriso idia abidadama henia dainai ibounai do idia mauri. To ta ta edia nega, edia nega dekenai mauri do idia abia. Keriso ia toreisi lou guna, unai murinai, ia giroa mai neganai, Keriso idia badinaia taudia ibounai danu do idia toreisi lou.” (1 Korinto 15:20-26) Inai toreisi lou dalana be Paulo ese ia gwauraia, iena revareva ginigunana Tesalonika taudia edia ia torea neganai, ia gwau:
17 “Badina be ita abidadama henia gauna be inai: Iesu ia mase, ma ia toreisi lou. Unai dainai Iesu idia abidadama henia taudia idia mase neganai, Dirava ese do ia hakaudia vareai, vadaeni, Iesu danu do idia noho. Ai ese Lohiabada ena hereva umui dekenai ai hadibaia noho be inai: Lohiabada do ia giroa mai neganai be ita mauri noho taudia ese guna mase dekenai idia mahuta taudia do ita gunalaia lasi. Lasi, to mai goada danu Lohiabada do ia boiboi, bona aneru badana ese do ia boiboi, Dirava ena kibi regena danu. Bona unai neganai Lohiabada be guba dekena amo do ia diho mai. Vadaeni Iesu idia abidadama henia . . . bona mase dekenai idia mahuta vadaeni taudia be do idia toreisi lou guna.”—1 Tesalonika 4:14-16.
18. Horoa taudia “mase dekenai idia mahuta” edena negai idia toreisi lou?
18 Lagani 1914 lalonai Iesu Keriso be Basileia siahuna ida ia “giroa mai,” bena unai murinai ia ese “Iesu idia abidadama henia taudia” ia boiridia idia hebou totona. Unai horoa taudia haida, “mase dekenai idia mahuta vadaeni taudia,” be kibi regena amo ia boiridia, lauma ai do idia toreisi lou bona guba dekenai do idia daekau totona. Nega daudau lalonai Gima Kohorona ia gwau, horoa Keristen taudia be mase amo inai bamona idia toreisi lou matamaia, lagani 1918 lalonai.
19. Idia do mauri noho taudia be edena negai bona edena dala amo “Dirava ese . . . do ia abia daekau, guba ena ori latanai,” bona dahaka totona ia abidia daekau?
19 To horoa Keristen taudia oredia, tanobada dekenai idia do noho taudia 9,000 bamona, be edena bamona? Namona be idia danu be Dirava idia badinaia noho ela bona tanobada dekenai idia mase. Paulo be ma hereva ta ia torea, hegeregere ia be idia danu idia noho bamona Keriso ia giroa mai vadaeni negana lalonai; ia gwau: “Unai neganai ita mauri noho taudia be Dirava ese idia danu ita do ia abia daekau, guba ena ori latanai, Lohiabada danu do ita hedavari. Vadaeni Lohiabada danu do ita noho hebou hanaihanai.” (1 Tesalonika 4:7; Apokalupo 1:10 danu itaia.) Inai dala amo 144,000 do ia hatoredia isi bena Mamoe ena Natuna, Iesu Keriso ida hahelaga taudia ai bona pavapava ai do idia lao, guba ena Siona Ororona dekenai. “Mase dekena amo toreisi lou gingigunana be inai.” (Apokalupo 20:14:1, 4; 20:4, 5) To taunimanima milion momo, hari inai negai idia be edia mase guridia dekenai idia noho taudia, dekenai dahaka do ia vara?
20, 21 (a) Taunimanima milion momo, idia edia mase guridia dekenai idia noho, be dahaka do idia karaia? (b) Dahaka orea be tanobada amo do ia mase ore lasi, bona badina be dahaka? (c) Bema inai orea taudia haida idia mase, dahaka gau namona be gabeai do idia davaria?
20 Ena be Paulo ese Tesalonika taudia ia tore henidia revarevana ginigunana lalonai unai taudia ia gwauraidia lasi, to Apokalupo 20:12 ese ita ia gwauhamata henia, “mase taudia, ladana bada taudia bona ladana maragi taudia” be do idia toreisi lou bena Dirava ena hahemaoro terona vairanai do idia gini. (Ioane 5:28, 29 danu itaia.) To, hari inai nega lalonai “hutuma bada herea,” taunimanima milion toi mai kahana, be unai terona vairanai idia haboudia vadaeni. “Hisihisi badana” be nega sisina murinai do ia ginidae neganai, Dirava ese inai orea taudia do ia hamauridia. Mamoe ena Natuna ese ia naridia bona “mauri ranuna, ia lohilohi gauna” dekenai ia hakaudia lao, unai dainai idia be tanobada amo do idia mase ore lasi. To idia haida be reana hari inai nega lalonai do idia mase, idia buruka dainai, eiava ma gau ta dainai. (Apokalupo 7:9, 14, 17; Kohelete 9:11) Unai taudia be edena bamona?
21 Iseda helaro mai moalena be, unai bamona “mamoe idaudia” be iboudiai nega daudau lasi murinai do idia toreisi lou. (Ioane 10:16) Edia abidadama bona kara be idau negai tauna Abraham ena hegeregeredia, unai dainai idia be Dirava danu idia hetura heheni vadaeni. Heberu karoa 11 ese ia gwauraidia abidadama taudia hegeregeredia, hari “mamoe idaudia” hari inai nega lalonai be hahetoho idauidau idia haheaukalaia vadaeni. Unai dainai idia danu be “toreisi lou mauri namo herea” Aramagedono murinai do idia davaria. (Heberu 11:35; Iakobo 2:23) Momokani, mai edia abidadama ida, ‘Iesu ena tauanina idia ania bona iena rarana idia inua’ taudia iboudiai be iena gwauhamata ena anina do idia abia: “Lauegu tauanina do ia ania, bona lauegu rarana do ia inua tauna ese mauri hanaihanai do ia abia, bona dokona dina dekenai lau ese do lau hatorea isi.”—Ioane 6:54; Roma 5:18, 21; 6:23.
22. Ita be edena bamona ita hagoadaia heheni diba?
22 Paulo ese toreisi lou helarona namo hereana ia gwauraia murinai, ia be ma ia gwau: “Inai hereva dekena amo umui ta ta dekenai goada do umui henia.” (1 Tesalonika 4:18) Bena ia ese “iseda Lohiabada Iesu Keriso do ia giroa mai” neganai do idia vara gaudia mai edia anina bada be ia gwauraia. (1 Tesalonika 5:23) Inai be dahaka dahaka? Mani oi ese inai magasin ena hereva ta ladana “Maino Dirava ena amo—Edena Negai?” oi itaia.
Henanadai Haida
□ Paulo be Keristen taudia dainai Dirava edena bamona ia noia?
□ Dahaka “hadibaia hereva” be aposetolo ese ia gwauraia, iseda namo habadaia totona?
□ Mase taudia dainai ita lalohisihisi neganai, Dirava ena hereva ese iseda lalona edena bamona ia hagoadaia?
□ Daidia do idia toreisi lou guna, bona daidia be gabeai?
6. Paulo ena hereva hegeregerena, dahaka be hari inai nega lalonai ita karaia be namo?