Iesu ena Mauri bona Gaukara

Hoa Karana Iharuana Kana Ai

IESU be nega daudau sisina Iudea ai ia haroro loaloa bena sibona ena provinsi, Galilea, dekenai ia lou henia neganai, ia laga-ani lasi, to ena haroro gaukara ia habadaia. Ena hahediba taudia ese idia bamoa lasi, to sibodia edia bese taudia dekenai bona edia gaukara gunadia dekenai idia lou lao.

Iesu ese dahaka hereva ia harorolaia matamaia? Gauna be inai: “Dirava ena Basileia be kahirakahira ia ginidae. Umui emui lalona umui giroa, Sivarai Namona umui abidadama henia.” Galilea taudia ese Iesu idia abia dae bona idia matauraia, ena haroro herevana dainai lasi, to guna, Ierusalem ai, Paseka ariana dekenai idia lao neganai, Iesu ese ia karaia hoa karadia idia itaia dainai.

Iesu ese ena haroro gaukara Galilea provinsi dekenai ia hamatamaia Kana dekenai. Unai be vanegai headava ena aria ta ai ranu be uaina dekenai ia halaoa gabuna. Ena vadivadi iharuana neganai, King Herod Antipa ena gavamani ena lohia tauna ta ena natuna ese gorere ia davaria. Inai lohia tauna ia kamonai Iesu be Iudea dekena amo ia mai vadaeni, Kana dekenai ia ginidae vadaeni neganai, ena hanua, Kaperanaum, ia rakatania Iesu ia tahua totona. Ia lalohisihisi bada dainai Iesu ia noia, ia gwau: ‘Mani oi mai haraga, egu natuna ia mase gwauraia.’

Iesu ia haere henia, ia gwau: ‘Oi lou lao emu ruma dekenai. Emu natuna ia mauri vadaeni!’ Lohia tauna ese Iesu ena hereva ia abia dae, ena hanua dekenai ia lou lao. Dala dekenai ia lao noho neganai, ena hesiai taudia idia mai, ia ida idia hedavari. Idia hamaoroa ena mero ia mauri vadaeni! Ia nanadaidia, ia gwau: ‘Edena hora ai ena tauanina ia namo?’

Idia haere, idia gwau: ‘Varani, dina tubua kahanai.’

Lohia tauna ia laloa unai hora ai Iesu ese ia hamaoroa, ia gwau: ‘Emu natuna ia mauri vadaeni!’ Vadaeni, ia bona ena ruma taudia iboudiai ese Keriso ena hahediba taudia ai idia lao.

Iesu be Iudea amo ia mai negana ruaosi ai Kana dekenai hoa karadia ia karaia. Guna, Iesu ese ma hoa karadia haida ia karaia, to Kana dekenai ia karaia gaudia ese ena lou mai Galilea dekenai idia hahedinaraia.

Hari, Iesu be ena hanua, Nasaret dekenai ia lou lao. Unuseniai dahaka ia vara? Ioane 4:43-54; Mareko 1:14, 15; Luka 4:14, 15.

◆ Iesu be Galilea dekenai ia lou lao neganai, ena hahediba taudia be dahaka idia karaia, bona taunimanima ese Iesu edena bamona idia laloa?

◆ Iesu ese dahaka hoa karana ia karaia, bona ia dainai ia durua taudia be edena bamona idia laloa?

◆ Edena bamona Iesu ese ia hahedinaraia Kana ia laloa bada?

[Full-page picture on page 8]