Iesu ena Mauri bona Gaukara

Mataio Ia Boiria

IESU ese Kaperanaum ia rakatania bena ia lao Galilea Gohuna dekenai. Unuseniai danu, hutuma be ia dekenai idia lao bona ia hadibadia raka lao neganai, Mataio, ena ladana ta be Levi, ia itaia, ia helai noho takisi moni abia rumana dekenai. Vadaeni Iesu ese ia boiria, ia gwau: “Lauegu murinai oi raka.”

Reana Mataio be Petro, Andrea, Iakobo, bona Ioane bamona, Iesu ese ia boiria neganai, iena hahediba herevadia ia diba vadaeni. Bona idia hegeregeredia, Mataio ese Iesu ia kamonai toreisi, ena takisi gogoa karana ia rakatania bona Iesu murinai ia raka lao.

Gabeai, Mataio ese ena ruma dekenai aria badana ta ia karaia. Iesu bona Iena hahediba taudia bona Mataio ena bamona gunadia haida danu idia mai ena aria dekenai. Iuda taudia momo ese unai taudia idia dadaraidia, badina be Roma ena gavamani totona takisi moni idia gogoa. Danu, nega momo taunimanima idia koidia, takisi moni momo be idia edia amo idia abia totona.

Farisea taudia idia itaia, Iesu be takisi gogoa taudia danu idia aniani hebou, unai dainai ena hahediba taudia idia nanadaia, idia gwau: “Umui emui hadibaia tauna be dahaka dainai takisi gogoa taudia bona dika taudia danu gabu tamona dekenai idia aniani hebou?” Iesu ese edia hereva ia kamonai, bena ia haere henidia, ia gwau: “Goada taudia be dogeta do idia tahua lasi, to gorere taudia sibona. Umui lao, inai Buka Helaga hereva ena anina do umui laloa, inai bamona ia torea, ‘Lau be bogahisihisi lau ura, to boubou gauna be lau ura lasi.’ Badina be kara maoromaoro taudia boiria totona lau mai lasi, to kara dika taudia boiria totona lau mai.”

Mataio ese unai takisi gogoa taudia be aria dekenai ia boiridia mai, idia ese Iesu ena hereva idia kamonai henia bona lauma dalanai do ia hanamodia totona. Iesu ese unai taudia ia bamodia, badina ia ura do ia durudia Iehova ida do idia turana karaia namonamo totona. Sibodia idia gwauraia maoro Farisea taudia ese takisi gogoa taudia idia lalo-dika henidia, to Iesu be unai bamona ia karaia lasi. To idau, ia bogadia hisi bona lauma dalanai ia hanamodia, doketa ese gorere tauna ia hanamoa bamona.

Iesu ese kara dika taudia ia bogadia hisi neganai, ia ese edia kara dika ia gwauraia maoro lasi. Unai bamona hebogahisi karana be tauanina ai idia gorere taudia dekediai ia hahedinaraia vadaeni. Haheitalai ta be, Iesu be mai ena hebogahisi ida lepra tauna ia dauatoho neganai, ia gwau: “Lau ura, hari oi goeva.” Unai hegeregerena, namona be ita danu ese dabu taudia ita bogadia hisi, bona tauanina dalanai bona lauma dalanai ita durudia be namo. Mataio 8:3; 9:​9-13; Mareko 2:​13-17; Luka 5:​27-32.

◆ Iesu ese Mataio edeseniai ia itaia?

◆ Mataio ena gaukara be dahaka, bona dahaka dainai Iuda taudia ese takisi gogoa taudia idia lalo-dika henidia?

◆ Dahaka dainai Iesu idia gwauraia dika, bona ena haere be dahaka?

◆ Dahaka dainai Iesu ese kara dika taudia ia bamodia?

[Full-page picture on page 9]