Oi Ura Do Oi Headava A?

“HEADAVA namona ese hebamo iboudiai ia hanaia.” Tau ta be unai bamona ia hereva. Unai hegeregerena, uhau bona ulato milion momo idia ura do idia headava.

Haida ese kompiuta eiava babalau amo heduru idia tahua, adavana davaria totona. To namona be ita ia havaraia Diravana, headava ginigunana ia havaraia Diravana, ena heduru ita tahua, ani? (Genese 2:18-24) Dirava be mai ena lalokau ida iseda namo ia tahua bona ia be mai ena aonega dainai, namona be adavana ta ita tahua neganai, iena sisiba bona ena taravatu ita abia dae bona ita badinaia. (Salamo 19:7) Bible lalonai iena taravatu be inai:

‘Ekalesia Tauna Sibona Adavaia’

Dahaka dainai? Badina be Iehova Dirava ese iseda namo ia tahua dainai. Aposetolo Paulo ena sisiba, ‘ekalesia tauna sibona oi adavaia,’ be Iehova ena hesiai taudia idau negai idia noho edia kara hegeregerena, idia ese tomadiho momokani taudia, sibodia edia orea taudia mo, idia adavaia. (1 Korinto 7:39; Deuteronomi 7:3, 4) Unai bamona headava amo hahenamo momo idia vara, bona ita lalodiatao be namo.

Hahenamo haida be inai: Bema iseda adavadia be tomadiho momokani taudia, ita do idia durua, iseda Tamana guba dekenai ia noho ita badinaia noho totona. (Kohelete 4:9-12 itaia.) Bema tau ta mai ena hahine ida be Keristen taudia, idia hahegoada heheni diba bena hahetoho idauidau idia davaridia neganai do idia kwalimu diba. Idia gaukara hebou diba, headava hamanokaia gaudia koudia totona. Idia ruaosi ese Iehova ena sisiba namona idia tahua bona idia badinaia dainai, hekwakwanai haida idia vara neganai, idia hanaidia diba bona mai edia lalo-tamona ida idia gaukara hebou diba, idia gaukara helulu lasi. Bema mai edia lalona ibounai ida idia hekwarahi Iehova ena hesiai gaukara idia karaia totona bona edia mauri lalonai Iena dala idia badinaia totona, unai ese edia headava do ia durua. Edia headava amo Dirava do idia hanamoa.

Lagani haida idia lao vadaeni, haneulato ta ladana Gloria ese tauhau ta ia tura henia. Unai tauhau be Keristen heboudia dekenai ia lao bona Gima Kohorona Stadi lalonai haere ia henia. Idia ese Gloria idia sisiba henia, namona be unai tauhau ia tura henia lasi, ia do bapatiso lasi dainai, to ia “lalokau henia bada” dainai, sisiba ia badinaia lasi. To, ia diba unai sisiba be namo. Unai dainai dina ta, mai ena lalona ibounai ida Iehova ia guriguri henia, ena heduru ia noia. Nega sisina murinai idia davaria unai tauhau be kara-bodaga tauna, bena maoromaoro Gloria ese ena hetura karana ia hadokoa. Gabeai ia ese Keristen tauhauna namona ta ia adavaia. Hari inai negai ena tau be kongregesen ena elda tauna ta, bona edia natudia ruaosi ese hereva momokani idia goadalaia. Gloria ese guna idia vara gaudia ia lalodia lou neganai, ia gwau: “Iehova lau tanikiu henia badina ena heduru dainai hekwakwanai momo lau reaia. Iena hahekau dainai sisiba namona lau abia, bena unai dainai lau be mai egu lalokau adavana ida mauri namona ai moalelaia diba.”

Dahaka Dainai Idau Gabu ai Adavana Oi Tahua?

Dahaka dainai Iehova ia gwauhamata henia vadaeni tauna ese Keristen oreana murimuri adavana ta do ia tahua? Unai Keristen tauna ia do diba namonamo lasi a, Iehova be iseda namo habadaia dalana ia diba bona tahua? (Hereva Lada-isidia 3:1-7; Salamo 145:16) Oi be edena bamona? Oi abia dae Iehova “Dirava tamona be nega ibounai ia hereva momokani” a? (Roma 3:4) Bema oibe, oi diba ena sisiba ibounai be maoromaoro bona momokani bona mai ena namo. (Isaia 48:17, 18) Iseda lalokau Tamana guba dekenai ese ita ia sisiba henia, iseda namo hari inai negai bona gabeai danu ia tahua dainai, to ita be palani ita lalohadailaia neganai, reana hari inai nega sibona ita laloa. Adavana ita tahua neganai, namona be hari inai nega sibona ita laloa lasi, to vaira negana danu ita laloa be namo, ani?—Salamo 37:11, 29.

Inai hereva oi abia dae momokani a, Basileia be ia kahirakahira bona kahirakahira inai tanobada do ia hagoevaia? Oiemu helaro be tanobadada Paradaisona lalonai do oi noho a? Eiava oi ura hari tanobada ena kara oi moalelaidia bada? Kohu momo oi do ia henia diba tauna ta oi tahua a? Eiava tomadiho momokani ia tahua guna tauna ta, a? (Mataio 6:33) Oiemu mauri lalonai dahaka oi tahua guna? Aonega karana be, iseda lalohadai korikoridia bona iseda ura korikoridia ita tahudia namonamo. Bena, bema iseda lalohadai eiava ura haida be maoromaoro momokani lasi, do ita haidaudia diba bena Iehova habadua karadia amo do ita raka siri diba.—Salamo 78:40, 41 itaia.

Iseda Kudouna ese Ita Idia Koia

Ieremia 17:9 ia gwau: “Taunimanima edia kudouna be koikoi herea bona dika rohoroho.” Unai dainai namona be ita naria namonamo. Namona be ita laloatao, kongregesen ena elda taudia bona ma haida ese Bible amo idia henidia sisibana idia dadaraia taudia, be gabeai nega momo idia taitai bona idia lalohisihisi bada.

To reana ta do ia henanadai, do ia gwau: ‘Dahaka dainai unai bamona oi hereva? Lau be tadikaka ta lau diba, ia be murimuri kekenina ta ia adavaia, bona hari idia ruaosi be Iehova ena hesiai gaukara idia karaia.’ Momokani, nega ta ta unai bamona ia vara, bona ai moale, idia ruaosi be “hereva momokani ena dala dekenai idia raka noho” dainai. (3 Ioane 4) To, bapatiso ia do abia lasi kekenina ia adavaia tadikakana ena kara be gwau-edeede karana ta. Gabeai sibona ena ura hegeregerena do ia gwau-edeede lou a? Reana do ia laloa, gau haida dekenai ena diba ese Dirava ena diba ia hanaia, bena ma gau ta ia vara neganai Bible ena sisiba do ia dadaraia bona sibona ena aonega do ia badinaia, a? Bible ese ita ia sisiba henia, ‘Iehova do ita abidadama henia mai eda kudouna ibounai ida.’ (Hereva Lada-isidia 3:5) Unai hereva ena anina be gau ibounai dekenai Dirava ena ura ita karaia. Unai dainai namona be iseda kudouna ita hadibaia, kamonai karadia do ia karaia be namo, gau badadia dekenai sibona lasi, to gau maragidia dekenai danu. (Luka 16:10) Bema Dirava ita gwau-edeede henia, edena bamona kara ita hamatamaia unai? Hari tadikaka, ekalesia hahinena ia adavaia lasi tauna, be reana hari ia diba ia be mai ena kerere ia sibona ena ura ia karaia dainai, bona Iehova ia noia vadaeni ena kerere do ia gwauatao. To oi ura unai dala amo oiemu headava oi hamatamaia a?

Reana ma ta do ia gwau: ‘To lau ia tura henia merona ese Bible ia stadilaia matamaia bona Keristen hebou dekediai ia lao.’ To, dahaka dainai ia stadi? Ia ura oi do ia adavaia dainai, eiava ia ura Iehova Dirava do ia dibaia bona ena hesiai gaukara do ia karaia dainai a? Umui hetura heheni neganai, reana unai mero ena lalohadai korikori do ia hedinarai goevagoeva lasi. To umui headava murinai dahaka do oi davaria? Momokani, reana do oi naria ela bona unai mero ia bapatiso vadaeni, bena emui headava dinana do umui gwauraia hidi. Unai neganai ‘ekalesia tauna sibona oi adavaia,’ to, unai sisiba ena anina korikorina oi badinaia a?

Edena tadikaka be kongregesen ena hesiai taudia o elda taudia ai idia lao diba? Bema idia bapatiso vadaeni, unai sibona dainai idia be hegeregere unai dagi do idia abia a? Lasi, to, ‘edia kara idia tahua guna.’ (1 Timoteo 3:10) Unai ese ita dahaka ia hadibaia? Namona be gau toi ita karaia; gaudia be inai: Namona be headava ena anina korikorina ita laloa. Namona be oi ura henia tauna ena lalohadai bona kara korikoridia oi tahudia namonamo. Namona be ena hereva oi kamonai namonamo. Dirava hanamoa herevadia be ena kudouna amo ia gwauraidia a? Nega sisina daudau lalonai, ia hahedinaraia Keristen dalanai ia tubu daekau a? Namona be ia hahedinaraia guna ia be mai ena abidadama bona lauma dalanai ia goada, bena oi lalohadai diba oi ura do oi adavaia eiava. Tau ta be inai hereva ta ia gwauraia: “Kekeni e! lau gwauraia sivaraina. Ena anina be inai—Mero namona oi tahua sibona lasi, To headava negana namona oi tahua danu.”

Bema oiemu kudouna ese oi ia doria sisiba namona bona lalohadai maorodia do oi dadaraidia totona, dahaka do ia vara diba? Dika bada ia vara diba. Bible ena sisiba mani oi laloatao, ia gwau:

‘Oi Hadoa Gauna Hegeregerena Mo Do Oi Abia’

Jacqueline ena sivarai mani oi laloa. Keristen kongregesen murimurinai ia noho tauhauna ta ia tura henia dainai, elda taudia ese idia sisiba henia. To ia laloa edia sisiba be auka dainai, Bible amo idia henia sisibana ia dadaraia. Gabeai, ia be sibona ena lalohadai ia laloa lou neganai, ia gwau: “Lauegu ura gaudia sibodia lau laloa, to Iehova ena lalohadai bona iena hereva lau laloa lasi.” Ena turana ese Bible ia stadilaia matamaia, bena gabeai bapatiso ia abia. Hua toi idia do ore lasi neganai idia headava.

Edia headava dinana murinai, hekwakwanai idia vara haraga. Jacqueline ena tau ena kerere haida idia hedinarai goevagoeva, guna Jacqueline ese unai kerere ia itaia lasi o ia laloa lasi. Ia do headava lasi neganai, ia laloa headava do ia namo herea bona moale bona lalo-tamona ai do idia noho, to idau, edia headava ia dika. Ena adavana be orea amo i atoa siri, bena ia ese Jacqueline mai ena natuna maragidia ruaosi ia rakatanidia. Jacqueline sibona ese ena natuna ia naridia bona ia ubudia mai ena hekwarahi bada ida. Ai vara gauna ese Jacqueline dahaka ia hadibaia? Ia gwau: “Ia ese kamonai karana lau ia hadibalaia. Ena be oi laloa oi idia henia sisibana be auka eiava oi laloa ia be hegeregere lasi oi dekenai, to namona be oi laloa ia be Iehova ena amo ia mai sisibana bona oi badinaia be namo.”—Galatia 6:7; Salamo 86:11.

Inai sivarai danu mani oi laloa. Maritza ese ena gaukara gabuna dekenai tauhau ta ia hedavari henia. Tanobada ai idia karaia gaudia, guna ia diba lasi gaudia, ia hahedinaraia ia dekenai—bona Maritza ia laloa idia dika lasi. Hari tauhau be edukeisini namona ia abia, ena kara be namo, bona aonega dalanai gau idauidau ia herevalaidia diba. Ena be Bible amo Maritza idia sisiba henia, to ia laloa lasi, badina be unai tauhau ia lalokau henia bada.

Nega sisina murinai Maritza ese Keristen heboudia ia hesikulaia, badina tanobada ena moale gabudia ia manadalaia dainai. Idia do headava lasi neganai, hari mero ese ia gwauhamata henia ena Keristen hebou karana do ia koua lasi, bena ena hereva ia hamomokania. To, Maritza ese ma kara idauidau ia karaia dainai, sisina sisina ia sibona ese hebou karana ia manokalaia bona haroro gaukarana ia rakatania.

Guna ia be mai ena adavana ida idia helai hebou bona gau idauidau idia herevalaidia namo herea, to gabeai dahaka ia vara? Metairarametaira edia herevahereva hebou karana ia doko, ena tau ese ia hadihoa, bena Maritza sibona ese edia natudia 4 ia naridia bona ia ubudia. Natuna badana ena mauri laganidia be 9 bona maragina ena mauri laganida be 4. Ia vara gauna dainai Maritza ena darana ia doko. Lagani toi lalonai unai bamona ia noho, bena ena lalohisihisi ia ore bamona neganai, ia vara gauna ena badina ia tahua bona ena lalona ia hadaia, dahaka do ia karaia. Sibona ia hamaoroa loulou, ia gwau: “Bema lau mauri noho, hisihisi do lau ania noho.” To ia do daradara, badina ia do laloatao, guna Basileia ena sivarai namona ia harorolaia loaloa neganai, lai ena paraka iena kopina ai ia moalelaia.

Maritza ia gwau: “Bema guna lau kamonai, inai hisihisi bona lalohisihisi lau reaia diba!” Ena natudia edia sikuli turadia amo Iehova ena Witness taudia ia davaridia lou. Hereva momokani ia ura henia lou bona ena lalokau Iehova dekenai ia havaraia lou. Ia mai ena natudia be Dirava ena hesiai gaukara idia karaia hari. Mai ena lalona ibounai ida Maritza ia gwau: “Iehova ese ia henia sisibana oi badinaia, bona namona be oi diba, oi laloa lasi tauna be reana Iehova ese ia hagaukaraia ena ura be oi ia hadibalaia totona.” Iesu ia gwau: “Umui emui kamonai umui naria namonamo.” (Luka 8:18) Oibe, namona be oi kara haragaharaga lasi, to oi itaia namonamo bona oi hakala guna be namo!

Kingdom Hall dekenai do oi lao neganai, Keristen taudia mai edia adavadia ida be do oi itadia, idia be mai edia moale ida idia hebou. To danu, ma taunimanima haida do oi itadia, idia ta ta be sibona sibona idia helai, badina edia adavadia murimuri taudia ese idia bamodia lasi dainai. Idia ura dikadika edia adavadia ese do idai bamodia hebou dekenai! Nega momo, hebou ia doko negadiai, maoromaoro idia lao ruma dekenai bena tadikaka bona taihu ida idia herevahereva diba lasi bona idia hebamo heheni diba lasi. Oi ura oiemu noho danu be unai bamona a? Bema Bible ena sisiba ‘ekalesia tauna sibona oi adavaia,’ oi dadaraia, unai bamona do ia vara diba oi dekenai. Aonega karana be inai: Iehova ena sisiba ita badinaia bena unai dika idauidau do ita reaia diba!—Salamo 119:9; Hereva Lada-isidia 28:26.

Iehova Oi Naria

Reana do oi gwau: ‘To kongregesen lalonai turana ta lau davaria diba lasi. Ta ta sibodia be lauegu uru taudia.’ Reana unai be momokani. To oi diba momokani Iehova ia ura do oi moale, a? “Ia ese umui ia naria noho.” (1 Petro 5:6, 7) Inai hereva lada-isina oi laloatao a? Ia gwau: “Mai darana hahinena be Iehova ena amo.” (Hereva Lada-isidia 19:14) Bema oi ura do oi headava, namona be headava oi gurigurilaia, ani?—Filipi 4:6, 7.

Hana ena sivarai oi laloatao a? Ia ura natuna ta do ia havaraia neganai, dahaka ia karaia? Mai taitai ida ia ese ena ura ia gurigurilaia Iehova dekenai, bena Iehova ia naria. Ia abidadama henia momokani. Ia noia gauna be gabeai hoa dalanai ia abia—natuna merona ta ia havaraia.—1 Samuel 1:9-11, 18-20; Salamo 62:8.

Ena be oiemu kongregesen lalonai oiemu uru taudia be momo lasi, to sekit bona distrik hebouhebou dekenai haida do oi hedavari henidia, ani? Lauma dalanai ita goada ita lao totona, unai hebouhebou dekediai ita lao. To mai hebouhebou dekenai volantia gaukara idia karaia taudia idia moale diba, badina edia tadikaka bona taihu idia hesiai henidia bona edia tadikaka bona taihu, Dirava ena hesiai gaukara be mai edia lalona ibounai danu idia karaia taudia, idia hedavari henidia dainai. Reana unai neganai ta do oi davaria bena gabeai umui ruaosi do umui headava.

To bema Keristen turana ta oi davaria diba lasi, Iehova oi noia oi do ia durua tauhau o haneulato goevana bamona do oi noho totona. Oi do headava lasi neganai, kara namodia oi manadalaia, bena oi be headava tauna namona ai bona tama namona ai do oi lao diba, eiava oi be headava hahinena namona ai bona sina namona ai do oi lao diba. (Galatia 5:22, 23) Pioneer gaukara ese momo ia durudia, unai bamona idia karaia totona. Oiemu nega bona goada gaukaralaidia dalana hereadaena be unai!

Bema oi ura do oi headava, emu turana be edeseniai do oi tahua? Namona be Iehova idia tomadiho henia taudia, idia tahua gaudia be oi tahua gaudia hegeregeredia bona idia ura dikadika ena hesiai gaukara do idia karaia hanaihanai taudia, bogaragidiai oi tahua. (2 Timoteo 2:22) Bona bema Iehova ese Dirava garina ia Gari adavana ta oi do ia henia, namona be emui headava ese iseda lalokau Diravana do ia hanamoa.

[Box on page 31]

“Bema guna lau kamonai, inai hisihisi bona lalohisihisi lau reaia diba!”