Iesu ena Mauri bona Gaukara

Iesu ese Vabu ta ena Lalohisihisi Ia Haorea

IESU ese tuari biaguna ena hesiai tauna ena gorere ia hanamoa, bena ia lao Nain, unai hanua be Kaperanaum ena sautuest kahanai, edia padana be kilomita 32 bamona. Iena hahediba taudia bona taunimanima momo ese idia bamoa. Adorahi ai, Nain hanuana kahirakahira dekenai idia ginidae neganai, haida idia hedavari henidia, mase tauhauna ta idia huaia lao idia guria totona.

Unai tauhau ena sinana ia lalohisihisi bada. Ia be vabu, bona hari ia mase tauna be ena natuna tamona sibona. Iena tau ia mase neganai, ena lalona ia goada badina be ena natuna merona ia noho. Ena natuna ena mauri gabena ia laloa bada; ia dainai ia be mai ena helaro bona mai ena ura bada ia dekenai. To hari ena lalona hagoadaia tauna ta be lasi. Hanua taudia be ia ida gara gabuna dekenai idia raka lao neganai, ena lalohisihisi be bada herea momokani.

Iesu ese unai hahine ia itaia neganai ia bogaia hisi, badina be ia lalohisihisi bada dainai, bena mai ena hebogahisi ida ia hereva henia, ia gwau: “Oi tai lasi.” Iesu ena kara bona hereva dainai idia hoa. Mase patana dekenai ia raka kahirakahira bona ia daua tao neganai, idia huaia taudia be idia gini. Idia daradara, ia be dahaka do ia karaia.

Momokani, Iesu idia bamoa taudia ese Iesu ena hoa karadia, gorere taudia hamauridia karadia, idia itaia vadaeni. To ia idia itaia lasi mase tauna ta ia hamauria. Mase tauna ia hamauria diba a? Mase tauna ia hereva henia, ia gwau: “Uhau tauna e, lau hereva henia oi dekenai, oi toreisi.” Vadaeni, mase tauna ia helai tore! Ia hereva, bena Iesu ese ena sinana dekenai ia henia.

Taunimanima ese unai tauhau ia mauri momokani be idia itaia neganai, idia gwau: “Peroveta tauna badana ta iseda huanai ia hedinarai vadaeni.” Ma haida idia gwau: “Dirava ese ena bese taudia dekenai ia mai itaia vadaeni.” Haraga herea unai kara sivaraina be Iudea ibounai bona ena badibadinai tano ibounai dekenai idia gwauraia loaloa.

Unai neganai, Ioane Bapatiso be dibura rumana ai ia do noho. To ena hahediba taudia ese Iesu ena kara iboudiai, idia itaia karadia unai, ia idia hamaorolaia. Ioane ese unai edena bamona ia laloa? Gabu idauidau ai Iesu ese hoa karadia ia karaia neganai, unai gabu noholaia taudia be edena bamona idia laloa? Gima Kohorona gabena ese unai henanadai edia haere do ia gwauraia. Luka 7:​11-18.

◆ Iesu be Nain hanuana dekenai ia raka kahirakahira neganai, dahaka ia itaia?

◆ Ia itaia gauna be edena bamona ia laloa, bona dahaka ia karaia?

◆ Taunimanima ese Iesu ena hoa karadia be edena bamona idia laloa?