Iesu ena Mauri Bona Gaukara

Iairo ena Ruma Ia Rakatania bona Nasareta Ia Vadivadi Henia Lou

UNAI dina ai Iesu ia bisi momokani, Hanua Gwauta amo davara dekenai ia lao, hahine mai ena rara gorere ia hanamoa bona Iairo ena natuna ia hatoreaisi lou. To unai dina ena gaukara be do ia ore lasi. Iesu ese Iairo ena ruma ia rakatania neganai, matakepulu taudia rua be iena murina dekenai idia raka, mai boiboi bada danu, idia gwau: “[David] ena Natuna e, oi bogahisihisi ai dekenai.”

“[David] ena Natuna” idia boiria neganai, unai tatau rua ese idia hahedinaraia idia laloa Iesu be David ena terona dekenai do ia pavapava, bona ia be gwauhamata Mesiana. To Iesu ese edia taitai ia laloa lasi toana ia hahedinaraia. Unai bamona ia karaia badina reana ia ura idia ura bada eiava lasi karana ia tohoa. To unai tatau be idia hesiku lasi. Idia be Iesu murinai idia raka lao Iesu ena noho gabuna dekenai, bona Iesu be ruma dekenai ia raka vareai neganai, idia danu be Iesu murinai idia raka vareai.

Unuseniai Iesu ese ia henanadai henidia, ia gwau: “Lau dekenai umui abidadama henia, inai bamona kara lau karaia diba?”

Idia haere “Lohiabada e, Oibe” mai lalo-maoro danu.

Vadaeni, edia matana ia daua toho bona Iesu ia gwau: “Umui emui abidadama hegeregerena, unai bamona lau karaia umui dekenai.” Maoromaoro matana idia kehoa bona idia itaia diba. Iesu ia hereva goada idia dekenai ia gwau: “Inai kara be tau ta dekenai do umui hamaoroa lasi.” To idia moale bada dainai, Iesu ena taravatu idia laloaboio, bona ia ena sivarai be unai tano dekenai idia gwauraia loaloa.

Unai tatau ese Iesu idia rakatania neganai, taunimanima haida ese tau ta idia abia mai. Lauma dikadia ese iena hereva dalana idia hadikaia. Iesu ese lauma dikadia ia luludia bona maoromaoro unai tau ia hereva diba. Hutuma idia hoa, idia gwau: “Kara inai bamona nega ta idia hedinarai lasi Israela dekenai.”

Farisea taudia danu idia noho. Idia gwau diba lasi unai hoa karadia idia vara lasi. To edia lalohadai dikadia dainai bona edia abidadama be lasi dainai, idia hereva Iesu be edeseni amo iena siahu ia abia, idia gwau: “Lauma dikadia edia lohia ena siahu dekenai ia ese lauma dikadia ia lulua.”

Unai kara iboudiai idia ore murinai, Iesu ia giroa lao ena hanua korikori Nasareta dekenai, bona ena aposetolo taudia ese idia bamoa. Lagani ta gunanai, ia ese dubu helaga ia vadivadi henia bona unuseniai ia hadibaia noho. Taunimanima ese Iesu ena hereva idia kamonai hamatamaia neganai, idia moalelaia, to gabeai ia ena hadibaia herevadia idia dadaraia bona idia ura idia alaia. Harihari, mai ena hebogahisi danu, Iesu ia ura ia ena dekena taudia gunadia ia durudia.

Gabu haida dekenai, taunimanima idia aru lao Iesu dekenai, to iniseniai ta ia mai lasi. Unai dainai, Sabati Dinanai, ia lao dubu dekenai ia hadibaia totona. Iesu ena hereva idia kamonai henia taudia momo idia hoa. Idia henanadai: ‘Hari tau ena aonega bona ena siahu be edeseni ia abia? Ia be kapenta tauna ena natuna lasi, a? Ena sinana ena ladana be Maria, ani? Ena tadina be Iakobo bona Iosef, bona Simona bona Iuda, ani? Unai dainai inai siahu ibounai be edeseni ia abia?’

Idia gwau: ‘Iesu be hanua tauna ta ita bamona. Ita itaia ia bada ia lao neganai, bona ena ruma bese taudia danu ita diba. Edena bamona ia be Mesia?’ Unai dainai, ena be ena aonega bada bona hoa karadia momo ia hahedinaraia, to idia dadaraia. Bona sibona ena varavara korikoridia ese Iesu idia dadaraia danu. Unai dainai Iesu ia gwau: “Peroveta tauna be do idia matauraia, to ena hanua korikori dekenai, bona ena ruma dekenai be do idia matauraia lasi.”

Iesu ese edia abidadama lasi karana dekenai ia hoa. Unai dainai, unuseniai be siahu karadia ta ia karaia lasi, to gorere taudia tamona tamona mo latanai ena imana ia atoa, edia gorere ia hanamoa. Mataio 9:​27-34; 13:​54-58; Mareko 6:​1-6; Isaia 9:7.

◆ Iesu be “[David] ena Natuna” idia gwauraia neganai, matakepulu taudia idia hahedinaraia idia be dahaka idia abidadama henia noho?

◆ Farisea taudia idia gwau Iesu be edeseni amo siahu ia abia ena hoa karadia ia karaia totona?

◆ Dahaka dainai Iesu ia lou lao Nasareta taudia ia durudia be hebogahisi karana?

◆ Iesu be Nasareta dekenai ia lao neganai, edena bamona kara ia davaria bona dahaka dainai?