Karoa 48
Iairo ena Ruma Ia Rakatania Ia Lou Lao Nasaret
UNAI dina dekenai Iesu ese kara momo ia karaia—Hanua Gwauta tanona amo gohu ia hanaia, gorere hahinena ta ia hamauria, bona Iairo ena natuna ia hatorea isi lou. To unai dina ia do ore lasi. Iairo ena ruma ia rakatania neganai, matakepulu taudia rua be ia murinai idia raka, idia boiboi, idia gwau: “Davida ena Natuna e, oi bogahisihisi ai dekenai.”
Iesu idia gwauraia “Davida ena Natuna”; unai amo idia hahedinaraia idia laloa Iesu be David ena terona do ia abia tauna, Dirava ese ia gwauhamatalaia Mesiana. To Iesu ese edia noinoi ia kamonai lasi, reana badina be ia ura edia haheauka ia tohoa. To ruaosi idia hesiku lasi. Iesu murinai idia raka ela bona ena noho gabuna dekenai, bena ruma lalonai ia vareai neganai, ia murinai idia vareai.
Bena Iesu ese ia nanadaidia, ia gwau: “Lau dekenai umui abidadama henia, inai bamona kara lau karaia diba?”
Idia gwau: “Lohiabada e, oibe.”
Bena Iesu ese edia matadia ia daua toho, ia gwau: “Umui emui abidadama hegeregerena, unai bamona lau karaia umui dekenai.” Maoromaoro edia matadia idia kehodia, idia itaia diba! Iesu ia haganidia goadagoada, ia gwau: “Inai kara be tau ta dekenai do umui hamaoroa lasi.” To idia moale bada dainai, Iesu ena hahegani idia laloa lasi, ena sivarai be unai tano ibounai dekenai idia gwauraia loaloa.
Idia raka murimuri ai neganai, haida ese mu tauna mai ena lauma dikana Iesu dekenai idia hakaua mai. Iesu ese lauma dikana ia lulua, bena maoromaoro mu tauna ia hereva. Hutuma be idia hoa, idia gwau: “Kara inai bamona nega ta idia hedinarai lasi Israela dekenai.”
Farisea taudia danu idia noho. Idia gwau diba lasi unai hoa karadia idia vara lasi. To edia kara dika dainai Iesu idia abidadama henia lasi. Edia samani herevana idia gwauraia lou, idia gwau: “Lauma dikadia edia lohia ena siahu dekenai ia ese lauma dikadia ia lulua.”
Nega sisina murinai, Iesu be ena hanua korikori Nasaret dekenai ia lou lao, mai ena hahediba taudia ida. Lagani ta ia lao vadaeni, Nasaret ena dubu dekenai ia lao bona unuseniai ia hadibadia. Ena be matamanai taunimanima ese ena hereva namodia idia moalelaia, to gabeai ena hahediba herevadia idia badulaia dainai idia hamasea toho. To hari, Iesu be mai ena hebogahisi ida ena hanua taudia ia durudia toho lou.
Iesu be idau gabudia ai ia noho neganai, hutuma be ia dekenai idia mai, to Nasaret ai taunimanima be unai bamona idia karaia lasi. Unai dainai, Sabati dinana ai, dubu dekenai ia lao ia hadibadia totona. Ena hereva idia kamonai taudia momo idia hoa, idia gwau: “Inai tau ena aonega bona ena siahu kara be edeseni ia abia? Inai be kamuta tauna ena natuna lasi, a? Ena sinana ena ladana be Maria, ani? Ena tadina be Iakobo bona Iose, bona Simona bona Iuda, ani? Ena taihuna be ita dekenai idia noho, ani? Unai dainai inai siahu ibounai be edeseni ia abia?”
Sibodia dekenai inai bamona idia gwau: ‘Iesu be iseda hanua tauna ta ita bamona. Ita itaia ia tubu daekau neganai, bona ena ruma bese ita diba. Edena bamona ia be Mesia?’ Ena be ena aonega be bada bona siahu karadia ia karaia, to idia abia dae lasi ia be Mesia. Sibona ena varavara danu edia lalodia idia hekwakwanai ia dainai, unai dainai Iesu ia gwau: “Taunimanima haida idia laloa peroveta tauna be tau badana, to iena hanua korikori, iena iduhu bona ena ruma taudia idia laloa ia be tau badana lasi.”
Momokani, Iesu ia hoa bada, badina be idia be mai edia abidadama lasi. Unai dainai, unuseniai siahu karadia momo ia karaia lasi; gorere taudia ta ta mo latanai ena imana ia atoa, ia hamauridia. Mataio 9:27-34; 13:54-58; Mareko 6:1-6; Isaia 9:7.
▪ Matakepulu taudia ese Iesu idia gwauraia “Davida ena Natuna” neganai, idia hahedinaraia dahaka idia laloa?
▪ Farisea taudia idia gwau, Iesu be edeseni amo siahu ia abia hoa karadia karaia totona?
▪ Iesu ia lou lao Nasaret taudia durudia totona; dahaka dainai unai be hebogahisi karana?
▪ Nasaret taudia be edena bamona idia kara henia, bona dahaka dainai?