Iesu ena Mauri bona Gaukara

Dagedage Totona Hegaegae Karana

IESU ese ena aposetolo taudia ia hadibaia haroro gaukara karaia dalana dekenai. Unai murinai ia hamaorodia dagedage taudia dekenai do idia naria namonamo. Ia gwau: “Lau ese lau siaia umui, mamoe, uda sisia edia huanai bamona . . . To taunimanima dekenai do umui naria namonamo. Badina be idia ese kaunsolo edia vairana dekenai do idia hakaua umui, bona idia edia dubu lalonai do idia botaia umui. Lohia bona king edia vairana dekenai do idia hakaua umui, lau dainai.”

Ena be Iesu ia diba ena aposetolo taudia be hisihisi bada do idia abia, to ia gwauhamata henidia, ia gwau: “Umui idia kota henia neganai umui emui lalona do idia hekwarahi lasi, do umui gwauraia herevadia totona. Badina be unai neganai do umui gwauraia herevadia be Dirava ese do ia henia umui dekenai. Badina be gwauraia tauna be umui lasi, to umui emui Tamana ena Lauma umui emui lalona dekenai do ia hereva.”

Iesu ia hereva noho, ia gwau: “Kakana ese ena tadina do ia samania, do ia mase totona. Tamana ese ena natuna do ia samania, do ia mase totona. Memero do idia toreisi, edia tamana bona sinana do idia alaia mase.” Ma ia gwau: “Lauegu ladana dainai taunimanima ibounai ese do idia badu henia umui dekenai. To do ia haheauka lao ela bona dokona tauna be do ia mauri.”

Iesu ia hahedinaraia haroro gaukara be mai ena anina bada gaukara. Unai dainai aonega dalanai unai gaukara idia karaia be namo bona unai amo idia gaukara noho diba bona ta ese ia ia koua lasi. Ia gwau: “Hanua ta dekenai umui do idia dagedage henia neganai be idau hanua dekenai do umui heau lao. Badina be umui lau hamaoroa momokani, [Israel] edia hanua ibounai dekenai emui gaukara do umui haorea lasi neganai Taunimanima ena Natuna do ia giroa mai.”

Momokani, Iesu be ena aposetolo taudia 12 ia sisiba henia bona idia ia hagoadaia to ia mase bona ia toreisilou murinai, tanobada hegegemadai unai gaukara do idia karaia taudia danu ia sisiba henia bona idia ia hagoadaia. Unai ia hahedinaraia gauna be, Iesu ese aposetolo taudia ia siaia Israel taudia idia haroro henidia totona, to Israel taudia sibodia lasi, to ‘taunimanima iboudiai be iena hahediba taudia do idia badu henidia.’ Danu, Iesu ese ia siaidia neganai, unai haroro negana kwadogina lalonai aposetolo taudia be lohia bona pavapava edia vairanai idia kota lasi. Bona danu, unai neganai sibodia edia ruma bese taudia ese unai abidadama taudia kota dekenai idia henidia lasi do idia mase totona.

Iesu ia gwau ena diba tahua taudia be haroro gaukara do idia haorea lasi ela bona “Taunimanima ena Natuna do ia giroa mai.” Unai peroveta hereva ena anina be iena hahediba taudia be Dirava ena Basileia sivarai namona tanobada hegegemadai idia do harorolaia lasi neganai, Iehova ena tuari badana Aramagedono do ia ginidae. Iesu be unai tuari ena gunalaia tauna.

Iesu be ena aposetolo taudia ma ia hamaorodia, ia gwau: “Diba tahua tauna ese ena hadibaia tauna do ia hanaia diba lasi. Hesiai tauna ese ena biaguna be do ia hanaia diba lasi.” Unai dainai Iesu ena diba tahua taudia be hisihisi bona dagedage do idia abia, Iesu ese ia abia hegeregerena, Dirava ena Basileia Sivarai Namona idia harorolaia dainai. To ia sisiba henidia noho, ia gwau: “Tauanina be do idia alaia diba, to [mauri] be do idia alaia diba lasi taudia dekenai do umui gari lasi. To [mauri] bona tauanina ruaosi [Gehena] dekenai do ia alaia mase diba Diravana dekenai be do umui gari, be namo.”

Iesu ena haheitalai ita tohotohoa be gau badana. Gari lasi dekenai ia haheauka ela bona ia mase, badina ia ura lasi ena abidadama karana siahu ibounai tauna, Iehova Dirava dekenai, ia hadikaia. Momokani, Iehova sibona ese ta ena mauri ia kokia diba (anina be ena gabeai maurina) eiava ta ia hatoreaisi lou diba, mauri hanaihanai do ia abia totona. Unai dainai Iehova, iseda guba Tamana be lalokau bona hebogahisi tauna momokani!

Iesu be ma hahegoada hereva ia gwauraia iena hahediba taudia dekenai. Inai hereva be parabole ta bona unai parabole ese Iehova ena lalokau karadia ia hahedinaraia. Ia gwau: “Manu maragidia rua be moni maragimaragi tamona dekenai do idia hoia, ani? To idia ta be tano dekenai do ia moru lasi, emui Tamana bema ia ura lasi neganai. To umui be emui kwarana huina ibounai be idia duahia ore momokani. Do umui gari lasi. Umui be manu maragi momo umui hanaia.”

Iesu ese ena hahediba taudia ia hagania Basileia ena sivarai do idia harorolaia. Unai sivarai ese ruma bese ia hapararaia diba. Haida ese do idia abia dae to haida ese do idia dadaraia. Unai dainai Iesu ia gwau: “Umui emui lalona dekenai umui gwau lasi, maino lau mailaia tanobada dekenai totona lau mai. Maino lau mailaia lasi, to tuari kaia sibona.” Bema ta ese Buka Helaga ena hereva ia abia dae anina be ia goada. Iesu ia gwau: “Bema tau ta ena tamana o ena sinana ia ura henia bada, to lau dekenai ia ura henia maragi, ia be lau dekenai do ia hegeregere lasi. O bema tau ta ena natuna mero o ena natuna kekeni ia ura henia bada, to lau be ia ura henia maragi, ia be lau dekenai do ia hegeregere lasi.”

Ena hereva ia hadokoa gwauraia neganai, Iesu ia hahedinaraia bema haida ese ena hahediba taudia idia abia dae neganai ia danu idia abia dae unai. “Bema tau ta ese ranu keruma kapusi tamona sibona ia henia lauegu murinai ia raka tau maragina ta dekenai, umui lau hamaoroa momokani, ia be davana do ia abia momokani.” Mataio 10:​16-42.

◆ Iesu ese dahaka sisiba ia henia ena aposetolo taudia dekenai?

◆ Dahaka hahegoada bona heduru herevadia ia henidia?

◆ Dahaka dainai Iesu ena hereva be mai anina bada hari idia noho Keristen taudia dekenai?

◆ Edena dala amo Iesu ena diba tahua tauna ese ena hadibaia tauna ia hanaia lasi?