Abidadama amo Gorere Hanamoa Karana​—Dirava amo Ia Mai A?

TAU ta be lagani 38 lalodiai ia gorere noho. Iesu ese ia nanadaia, ia gwau: “Oi be mauri oi ura, a?” Bema oi be unai tau bamona, do oi haere, do oi gwau, Oibe, ani? Iesu ese ia hamaoroa, ia gwau: “ ‘Oi toreisi, oiemu geda oi lokua, oi raka.’ Vadaeni nega tamona ena tauanina ia namo vadaeni, ia toreisi, ena geda ia lokua, ia raka hamatamaia.”​—Ioane 5:​5-9.

Iesu be Dirava ena siahu amo unai tauna mo ia hanamoa lasi, to gorere taudia idauidau ia hanamodia. (Mataio 11:​4, 5) Hari inai negai, abidadama amo gorere idia hanamoa taudia idia gwau Dirava ese unai dala amo taunimanima ia do hanamodia noho, bona taunimanima daha momo idia gwau unai dala amo idia namo lou.

Edia Idau be Dahaka?

Bema Bible ena hereva ita tahua, do ita davaria Bible ese ia gwauraia gorere hanamoa karadia bona hari inai negai abidadama amo gorere idia hanamoa taudia edia kara be idau. Iesu bona ena hahediba taudia ese taunimanima idia hanamodia, davana lasi. Iesu ia gwau: “Gau momo umui abia vadaeni, davana lasi. Unai dainai gau momo do umui henia, davana lasi.” (Mataio 10:8) Unai amo idia ese Elisaia ena kara idia tohotohoa​—Naaman ena lepra gorerena ia hanamoa neganai, ia henia gwauraia harihari gauna ia abia dae lasi. (2 Hanua Pavapavadia 5:​1, 14-16) Unai dainai, abidadama amo gorere idia hanamoa taudia ese edia heduru dainai davana idia abia neganai, Bible ena hereva idia badinaia lasi unai.

Danu, aposetolo edia negai, gorere taudia be nega tamona idia hanamodia eiava nega kwadogi lalonai idia hanamodia. Petro ese tau ta “aena dika ia vara” ia itaia neganai ia hamaoroa, ia gwau: “Iesu Keriso, Nasareta tauna, ena ladana dekenai oi toreisi, oi raka.” Bena “nega tamona iena aena bona iena komukomu be goada vadaeni. Vadaeni ia roho, ia gini, ma ia raka lao.” (Kara 3:​1-8) Unai bamona sivarai ma haida be Kara 5:​15, 16 bona 14:​8-10 lalodiai oi duahilaia diba.

Hari inai negai, abidadama amo gorere idia hanamoa taudia edia heduru be reana dina haida, pura haida, eiava hua haida murinai namo ia havaraia! Inai danu mani oi laloa, abidadama amo gorere idia hanamoa taudia be inai bamona gorere taudia idia tahudia idia durudia totona: matakepulu taudia, aena idia mase o imana idia mase taudia, eiava taia kudima taudia, badina nega haida unai gorere edia badina be edia lalona dekenai idia matamaia. Doketa ta, Paul Brand, ia gwau: ‘Ta ena aena o ena matana idia boio neganai . . . hoa dalanai idia hanamoa diba lasi.’ To, Iesu ese “gorere taudia bona hisihisi taudia ibounai ia hanamoa.” Ena be tau ta ena imana ia dika momokani, to Iesu ese ia hanamoa.​—Mataio 9:35; Mareko 3:​3-5.

‘Oi Abidadama Lasi’

Madi, gorere dikadika taudia momo be abidadama amo gorere hanamoa heboudia dekediai idia lao heduru abia totona, to edia ruma dekenai idia giroa lou neganai edia gorere be do bada. Abidadama amo gorere hanamoa taudia idia gwau, ‘Unai taudia be abidadama lasi,’ unai dainai idia namo lou lasi. Unai be koikoi. Doketa William Nolen ia gwau: “Doketa korikoridia be idia diba, gorere taudia idia hanamoa diba lasi neganai, anina be edia diba be hegeregere lasi, to hoa dalana amo gorere idia hanamoa taudia, bema idia durua toho tauna ia namo lou lasi, idia gwau kerere be gorere tauna ena.”

Dirava ena peroveta taudia, Iesu, o Iesu ena hahediba taudia be nega ta idia gwau lasi, ta idia hanamoa diba lasi badina unai tau be abidadama lasi dainai. Momokani, taunimanima haida be abidadama lasi dainai idia lao lasi idia dekenai edia gorere hanamoa totona. To, idia lao taudia iboudiai be edia gorere idia hanamoa vaitani!​—Mareko 6:​5, 6.

Momokani, nega haida ena be taunimanima be abidadama lasi, to idia hanamodia. Naaman, Suria taudia edia tuari biaguna, ese peroveta Elisaia ia gwauraia dalana ena lepra gorerena hanamoa totona ia abia dae lasi. To ia namo lou murinai, ia gwau: “Harihari lau diba, Dirava be tanobada ena kahana ma ta dekenai ia noho lasi, to Israel sibona dekenai ia noho.” (2 Hanua Pavapavadia 5:​11-13, 15) Unai dainai abidadama amo gorere idia hanamoa toho taudia edia samani herevadia be anina lasi.

Harihari Gauna​—Gorere Hanamoa Siahuna be Ia Doko Vadaeni

Momokani, aposetolo edia negai, taunimanima be mai edia siahu hoa dalana amo gorere idia hanamoa, ani? (1 Korinto 12:9) To unai negai idia karaia hoa karadia be mai edia badina. Lagani 1,500 lalodiai, Israel besena be Dirava ese ia abia hidi besena; to aposetolo edia negai Dirava ese Israel besena ia dadaraia idia be abidadama lasi dainai, bena Keristen kongregesen matamamatana be edia gabu ai ia atoa. Unai Keristen taudia ginigunadia ese heduru idauna idia abia edia abidadama hagoadaia totona bona murimuri taudia dekenai idia hahedinaraia Iehova Dirava ese ia durudia be gau badana.

Unai dainai Dirava ese harihari gaudia, idia ta be gorere hanamoa siahuna, be Keristen kongregesen matamatana ia henia. Idia be “toa” ta kamonai lasi taudia dekenai bona idia amo kamonai taudia edia abidadama idia hagoadaia diba. (1 Korinto 14:​22, NW ) To hari, kahirakahira lagani 2,000 murinai, Keristen tomadihona be tomadiho matamatana lasi. (1 Korinto 13:​9-13 itaia danu.) Idau negai Bible idia torea haorea bona Bible milion momo idia hariharilaidia vadaeni. Unai dainai hari inai negai idia noho Keristen taudia momokanidia ese Bible ena hereva idia hahedinaraia diba kamonai lasi taudia dekenai, edia hahediba herevadia hamomokanidia totona. Hoa karadia edia heduru be anina lasi hari.

Paulo ia gwau harihari gaudia idaudia be “do idia doko.” (1 Korinto 13:8) Unai harihari gaudia be ma ta dekenai idia hanai diba Keriso Iesu ena aposetolo ese edia imadia be ta dekenai idia atoa neganai, eiava ta be idia ida idia noho neganai. (Kara 8:​18-20; 10:​44-46; 19:6) Aposetolo idia mase murinai, hoa karadia idia doko.

Buka ta, Cyclopedia of Biblical, Theological, and Ecclesiastical Literature ia gwau, “Taunimanima ese idia hakoikoia diba lasi herevana be inai: lagani 100 lalodiai aposetolo idia mase murinai, Keristen taudia gunadia edia hoa karadia edia sivarai ita kamonai lasi eiava sisina sibona ita kamonai.”

Inai Dainai Oi Naria Namonamo

Iesu Keriso ia gwau nega do ia ginidae bena taunimanima momo do idia gwau: “Lohiabada e, Lohiabada e, oiemu ladana dekenai guna ai haroro, ani? Oiemu ladana dekenai lauma dika ai lulua bona oiemu ladana dekenai hoa kara momo ai karaia, ani?” Bena Iesu do ia hamaorodia, do ia gwau: “Umui be lau diba lasi momokani. Idau gabuna dekenai umui lao, umui dika karaia taudia.” (Mataio 7:​22, 23) Bema Dirava ena lauma ese ia durudia lasi unai “hoa karadia” idia karaia totona, edena bamona idia karaia diba?

Nega haida idia koikoi bada. Haheitalai ta be inai: Zimbabwe ena niuspepa ta, The Herald, ese abidadama amo gorere hanamoa tauna mai ladana bada ese ia hanamodia taudia toi edia sivarai ia torea. Niuspepa ese unai tau ena koikoi karana ia gwauraia hedinarai, ia gwau: “Natu ta ia do kamonai diba lasi bona ia do hereva diba lasi; natu ta ena taiana be nega ta ai idia kudima lasi bona ia be mu tauna lasi; bona taia kudima hahinena ta be ia do kamonai diba lasi.”

Taunimanima haida idia laloa unai hanamoa karana dainai edia gorere idia namo lou, to gau be idia gorere momokani lasi. Gorere taudia ma haida, bema abidadama amo gorere hanamoa tauna ena heduru idia abia bena nega taina daudau murinai idia namo lou, unai ese ia hahedinaraia edia tauanina sibodia hanamoa siahuna ese ia hanamodia lou. Doketa William Nolen ia gwau, “Doketa momokani dekenai idia lao gorere taudia 10 10 amo 8 8 edia gorere be sibodia do idia namo lou.” Unai dainai bema nega taina daudau ia ore murinai gorere tauna ia namo lou, abidadama amo gorere ia hanamoa tauna ia gwau diba, iena heduru dainai ia namo lou.

Ma gau ta be inai: Bible ia gwau “Satani sibona ese iena kara ia senisia diba, bona ia ese diari aneruna ena kopina ia atoa diba” haida koidia totona. (2 Korinto 11:14) Tesalonika Iharuana 2:​9, 10 ai, Paulo be ma ia gwau: “Satani ena siahu dekena amo unai Tau Dikana be do ia mai, vadaeni hoa bona toa karadia idauidau momo dekena amo ia ese taunimanima momo do ia hakaua kerere. Ia ese kara kerere bada dekena amo mase dalana dekenai idia raka noho taudia do ia koidia.” Unai dainai oi naria namonamo! Abidadama amo gorere hanamoa karadia momo be lauma dikadia edia siahu amo idia karaia! Paulo ia gwau: “Lau ura lasi lauma dikadia danu umui gaukara hebou. Lohiabada ena kapusi bona lauma dikadia edia kapusi ruaosi umui inua diba lasi.”​—1 Korinto 10:​20, 21.

Keristen ta Ia Gorere Neganai

Momokani, ta ia gorere neganai bema hoa dalana amo ta do ia hanamoa diba, reana ia laloa unai be namo herea. Aposetolo Paulo ida ia gaukara hebou tauna, Epafrodito, ese gorere ia davaria, kahirakahira ia mase. (Filipi 2:​25-27) Paulo ena bamona namona, Timoteo be ia “gorere nega momo.” (1 Timoteo 5:23) To, Paulo ese hoa dalana amo edia gorere ia hanamoa lasi. Bona Paulo ia gorere neganai, reana ia ida ia loaloa tauna Luka, “dogeta tauna,” ena heduru ia abia.​—Kolose 4:14.

Hari inai negai danu, bema Keristen ta ia gorere, ia ese doketa tauna momokanina ena heduru ia tahua diba, lauma dikadia edia siahu amo gorere idia hanamoa karadia do ia dadaraia. Danu, ia ese Dirava ia noia diba, hoa dalana amo do ia hanamoa lasi, to aonega do ia henia bena aonega dalana amo ena gorere hanamoa dalana do ia tahua diba. (Iakobo 1:5) Iehova ia noia diba, “gorere dainai ena geda dekenai ia hekure neganai, Iehova ese do ia hagoadaia.”​—Salamo 41:3.

Momokani, bema doketa ese iseda gorere idia hanamoa diba lasi ita lalo-metau. To, Keristen ta ia gorere neganai danu, namona be ia hekwarahi ‘gau namodia edia toana do ia diba’; namo lasi ena gorere ia laloa bada bona lauma gaudia ia lalodia maragi. (Filipi 1:10) Ena lalona hagoadaia totona, Dirava ena Basileia henunai do ia noho diba maurina ia laloa diba, unai negai “ia noho tauna ta do ia gwau lasi: ‘Lau gorere.’ ”​—Isaia 33:24; 65:​17-19.

Dirava ese ia gwauhamatalaia tanobadana matamatana mai ena kara maoromaoro be mai anina bada, to abidadama amo gorere hanamoa taudia edia gwauhamata be anina lasi. Akumadan, Ghana dekenai ia noho matakepulu tauna, ladana Peter, mani oi laloa. Lagani 26 lalodiai, abidadama amo gorere idia hanamoa toho taudia edia dubu idauidau dekenai ia lao, ena matana idia hanamoa helaoreana. To idia ta ese ena matana ia kehoa lasi. Unai dubu dekenai ia do lao neganai, Iehova ena Witness taudia ese idia davaria.

Witness taudia be Bible ena amo idia hahedinarai henia Dirava ena Basileia henunai gorere iboudiai do idia ore vaitani. Unai ese Peter ena lalona ena matana ia kehoa, ia lalo-parara unai. Bible ena hereva momokani ia moalelaia dainai, ena nega ibounai ia gaukaralaia Dirava ena Basileia harorolaia totona. Lagani toi mai kahana lalonai unai bamona ia karaia noho! Mai ena moale ida vaira negana ia naria, “unai neganai matakepulu taudia edia matana do ia kehoa, bona taia kudima taudia edia taiana do ia kehoa.”​—Isaia 35:​5, 6.

Bible ena heduru amo, taunimanima momo herea ese sibodia na abidadama amo gorere hanamoa taudia abidadama henia karana kererena amo idia ruhaia.

[Picture on page 28]

Bema taunimanima edia tauanina ena kahana ta ia dika momokani o ia boio, abidadama amo idia hanamoa diba lasi

[Pictures on page 30]

Ia gorere Keristen tauna ese Dirava ia noia, goada ia henia ia haheauka totona. Mai moalena ida tanobada matamatana ia naria, unuseniai “ia noho tauna ta do ia gwau lasi: ‘Lau gorere’ ”