Gorere Ihanamolaidia Siahuna—Ia be Dirava amo Eiava?
TANO haida ai, nega momo tomadiho taudia haida na gabu helağadia e laomu, badina momo edia amo e kamonai edia gorere na unuseniai e hanamodia. Tano ma haida ai, pris bona babalau taudia na e gwaumu, idia na Dirava ena siahu amo taunimanima edia gorere bae hanamodia diba. A ma tano haida ai, haida na Kruseid heboudia lalodiai edia uilisea amo e tore isimu eiava edia itotohi e negemu bena e gwaumu edia gorere amo vada e hanamodia.
Unu gorere e hanamomu taudia edia tomadiho na idauidau dainai, nega momo ta ese ma ta e gwau heniamu, etomu ia na koikoi tauna eiava Dirava asi dibana tauna. To henanadai binai: Dirava be nega momo e heiri-heirimu taudia amo hoa karadia e karamu, a? Baibel na ini e gwau tomamu: “Dirava na dia heiri-heiri Diravana, a maino Diravana.” (1 Korinto 14:33) Una dainai gorere ihanamolaidia siahuna be Dirava amo eiava? Haida be e gwaumu idia na Iesu ena siahu amo taunimanima edia gorere e hanamodiamu. To, Iesu ese gorere taudia e hanamodia dalana mani aita laloa.
Iesu ese Gorere Taudia E Hanamodia Dalana
Iesu ese gorere taudia e hanamodia daladia na dia hari negai haida e karamu heğereğerena. Haheitalai binai: Iesu na ia dekena e laova gorere taudia iboudiai e hanamodiava. A dia haida mo edia gorere se hanamodiava, lasi iboudiai e hanamodia. Bona Iesu ese gorere taudia e hanamodiava neganai, una gorere na maoromaoro e ore vaitaniva. Baibel na ini e gwau tomamu: “Bena aru taudia iboudiai idau-tohona urana e urava, badina be siahuna na iena amo e lasi, iboudiai e hamauridia.”—Luka 6:19.
Hari ina negai, gorere e hanamomu taudia momo na e gwaumu haida edia gorere se hanamomu badina na unu gorere taudia na asie abidadamamu. A Iesu enai, ena be haida na ia asie abidadama heniava, to ia ese unu gorere danu e hanamodiava. Haheitalai binai: Nega ta Iesu na matakepulu tauna ta e itaia, ena be ia ese Iesu na se boiria, to Iesu ese ena gorere e hanamoa. Gabeai, Iesu ese e nanadaia: “Dirava Natuna o abiabiraiamu a?” Ia e haere, eto: “Lohiabada e, ia be daika?” Iesu eto: “Vada o itaia; ia na ina harihari e hereva henimumu.”—Ioane 9:1-7, 35-38.
To reana bo henanadaimu, ‘Bema Iesu ese asie abidadama taudia edia gorere e hanamodia, dahaka dainai ia ese e hanamodia taudia iboudiai na ini e hamaorodia toma: “Emu abidadama ese vada e hamaurimu; mai mainomu ida aola”?’ (Luka 8:48; 17:19; 18:42) Iesu ena hereva ese e hahedinaraia ğoevağoevamu, haida na mai edia abidadama dainai Iesu e tahua bona ia ese edia gorere e hanamo. A haida na Iesu asie tahua dainai Iesu ese edia gorere amo se hanamodia. To, Iesu ese edia gorere amo e hanamodia taudia na dia edia abidadama dainai, a Dirava ena siahu amo edia gorere e hanamodia. Baibel ese Iesu na ini e herevalaia toma: “Dirava ese Lauma Helağa bona siahu e horolaia; bena ia na eha loava, kara namodia e karava, Diabolo ese e hadikadiava taudia iboudiai e hamauridiava; badina be Dirava ese e bamoava.”—Aposetolo Edia Kara 10:38.
Hari ina negai, momo ma e uramu moni bae abi guna, gabeamo gorere taudia bae hanamodia. Taunimanima momo mai dibadia unu gorere e hanamomu taudia na moni gogo taudia. Ripoti ta ese e hahedinaraiamu, unu bamona tauna ta na lağani ta lalonai ena TV program amo e abimu monina na K218,000,000. Dubu oreadia haida danu taunimanima amo moni bada e abimu, badina unu e laomu gorere taudia na e laloamu unuseniai edia gorere bae namo diba. To Iesu na idau, ia na e hanamodia taudia edia amo moni na se gogova. Mani a laloa: Nega ta ia ese taunimanima e ubudia. (Mataio 15:30-38) Iesu ese ena hahediba taudia na haroro totona e siaidia neganai, e hamaorodia eto: “Gorere taudia ba hamauridia, mase taudia ba hatoredia isi, lepra taudia ba hağoevadia, lauma dikadia ba luludia lasi; vada o abi doa, vada ba heni doa.” (Mataio 10:8) Dahaka dainai hari ina negai taunimanima ese hoa dalanai gorere e hanamodiamu dalana be idau bona Iesu ese gorere e hanamodia dalana be ma idau?
“Gorere Ihanamolaidia Siahuna”—Daika Amo?
Lağani momo lalodiai, doketa taudia haida na gorere e hanamodiamu tomadiho taudia haida edia kara e tahu. Bena dahaka e davari? England ai lağani 20 lalodiai una hetahu ğaukarana e karaia doketa ta ena niuspepa ta (London ena Daily Telegraph) lalonai ini e gwau toma: “Doketa taudia edia ripoti ta ese hoa dalanai gorere taudia ihanamodia karana na se hamomokaniamu.” To, taunimanima momo na e gwaumu idia na gabu helağadia, eiava gorere e hanamomu tomadiho taudia edia siahu amo e namo. Madi, reana haida ese idia e koidiamu, ani?
Iesu na Ororo Harorona ai ini e gwau toma, tomadiho koikoi taudia ese ia bae hamaoroa, baeto: “Lohiabada e, Lohiabada e, . . . Oi ladamu ai lauma dikadia asia luludia a?” Bena Iesu ese baine haere henidia, baineto: “Asi dibagu umui; dahua aola, kara havara taumui e.” (Mataio 7:22, 23) Taunimanima unu bamodia na e tomu gorere ihanamolaina siahuna na Dirava amo e abia, to aposetolo Paulo na ini e gwa toma: “Hari dika tauna na Satana ena siahu ai bainema, mai siahu koikoidia, mai toa koikoidia, mai hoa karadia koikoidia ida. Bona ia ese ena kara gagevagagevadia amo mase dalana ai e rakamu taudia baine koidia.”—2 Tesalonika 2:9, 10.
Ma danu, Dirava na dia helağa taudia o kaivakuku amo gorere taudia basine hanamodia. Dahaka dainai? Badina Baibel na ini e haheğani toma: “Kaivakuku itomadiho-henidia na ba heautani” bona “nahuamui ba toho, dirava koikoidia na garina.” (1 Korinto 10:14; 1 Ioane 5:21) Unu gorere ihanamolaidia siahuna na Diabolo ese e ğaukaralaiamu koikoi karana ta, badina e uramu taunimanima na tomadiho momokanina amo baine veridia oho. Baibel na ini e gwau tomamu: “Satana sibona diari aneruna ai e hahelao.”—2 Korinto 11:14.
Dahaka Dainai Iesu Bona Aposetolo Taudia na Gorere Taudia E Hanamodia?
Keristani Greek Revarevadia lalodiai e tore sivaraidia amo baita lalopararamu, Iesu bona aposetolo taudia na Dirava amo siahu e abi dainai, idia na hoa dalanai gorere taudia e hanamodia. (Ioane 3:2; Heberu 2:3, 4) Iesu ese hoa dalanai gorere taudia e hanamodia karana ese ia e harorolaiava sivaraina e durua bada herea, Baibel na e gwaumu: “Iesu na Galilea idoinai eha laolao, edia dubu lalodiai e hahedibava, bona basileia sivaraina namona e harorolaiava. Bona taunimanima edia gorere bona edia hisihisi idau-idau amo e hamauridiava.” (Mataio 4:23) Iesu ena hoa karadia iboudiai—gorere taudia e hanamodia, hutuma e ubudia, mase taudia e hatoredia isi bona ma haida—ese e hahedinaraia, Basileia baine lohiaia neganai, ia ese abidadama taudia na unu baine hanamodia toma. Una na sivarai namona, ani?
Iesu bona aposetolo taudia e mase muridiai, unu hoa karadia iboudiai danu e ore. Aposetolo Paulo eto: “Peroveta herevadia hari bae ore; gado idaudia bae doko; aonega danu baine boio.” (1 Korinto 13:8) Dahaka dainai? Iesu bona aposetolo taudia ese gorere e hanamo bona hoa karadia ma haida e kara amo e hahedinaraia, Iesu na gwauhamata Mesiana bona Keristani kongrigeisen na Dirava ese e abia hidi. Una e ğuğuru neganai, unu hoa karadia danu vada e “ore.”
To, Iesu ese hoa dalanai gorere taudia e hanamodia karana ese ita na ğau ta e hadibadamu. Bema ita na Iesu ese e gwaurai ğaudia—Dirava ena Basileia ese baine havara ğaudia—baita kamonai bona baita abidadama henia, vada ita dibada nega ta baine ema, bona unai negai ina Baibel herevana baine ğuğuru vaitani, eto: “Hanua tauna ta basineto: ‘E goreregumu.’ ”—Isaia 33:24; 35:5, 6; Apokalupo 21:4.