Haroro Taudia ese Uma ena Anina Idia Utua Noho Tanobada Ibounai Dekenai

“Aramagedono be ia kahirakahira ia mai noho lalonai, Iehova ena Witness taudia ese edia gaukara idia habadaia noho, ita momo be unai hisihisi badana amo do idia hamauria totona.”​—Inai hereva be Ian Boyne ese niuspepa ta ladana “The Sunday Gleaner,” March 15, 1987 gauna, lalonai ia torea, Kingston, Jamaica dekenai.

HEREVA momokanina unai. Iehova ena Witness taudia idia laloa Aramagedono, Dirava ese kara dika taudia do ia haoredia negana unai, be ia kahirakahira bona hari inai negai Dirava ese taunimanima ia kota henidia noho. (Apokalupo 14:​6, 7) Unai dainai taunimanima ese sivarai namona idia kamonaia be namo. Haroro tauna badana, Iesu Keriso ese orea ta ia haginia, ena aposetolo edia nega lalonai unai orea ese sivarai namona idia harorolaia “tanobada ena kahana ibounai” dekenai. (Kara 1:8; Kolose 1:23) Ia gwau unai bamona haroro gaukara be iseda nega lalonai do idia karaia. (Mataio 24:14) Unai gaukara ia karaia oreana be Iehova ena Witness taudia, Dirava ena Basileia ena sivarai namona be tano 210 dekenai idia harorolaia goadagoada noho.

Iehova ena Witness taudia idia haroro sibona lasi, to taunimanima idia hadibadia danu. Iesu ese ena hahediba taudia ia haganidia, ia gwau: “Bese ibounai be diba tahua taudia do umui halaoa, . . . Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:​19, 20) Edia haroro gaukara bona hadibaia gaukara amo idia durudia taudia haida edia sivarai mani oi duahia.

Mexico

Hahine ta ena ladana be Virginia. Ia be hahine burukana, bona ena mauri laganidia be 110. Ia gwau: “Ena be ta ia buruka momokani, to Iehova ia dibalaia diba bona ena hesiai gaukara ia karaia diba.” Ia matamata neganai, dabua idauna ia hadokilaia ia helaga herea totona. Ia gwau: “To lau be gau ta dekenai lau dabu.” Bible ena hereva ia henanadailaia neganai ta ese haere maorodia ia henia diba lasi. Hegeregere, hadibaia taudia ena dubu oreana lalonai ia nanadaia ia gwau, “Dirava ena ladana be daika?” neganai, idia gwau, “Dirava ena ladana be Dirava.”

To lagani 1983 lalonai ena tubuna kekenina ese Bible ia stadilaia matamaia Iehova ena Witness taudia ida. Bena hari kekeni ese Virginia ena henanadai ia haerelaia, ia gwau Dirava ena ladana be Iehova. (Salamo 83:18) Unai dainai Virginia be Iehova ena Witness taudia ida Bible ia stadilaia matamaia. Bena lagani rua murinai, June 2, 1985 ai, bapatiso ia abia, ena mauri laganidia be 108 neganai.

Ia gwau: “Unai dina lau laloa mai egu moale ida, badina unai dina dekenai lau mauri matamaia. Ena be lau buruka, to hua ta ta iboudiai lau be hora 5 eiava 6 lau haroro bona itotohi ta ena heduru amo lau raka. Inai dala amo lauegu tauanina ia goada noho.”

India

Tau ta, guna ia be kara dikadia momo ia karaia tauna, be ia gwau: “Guna lau be raskol tauna ta. Drag lau hoihoilaia hehuni, mutka (laki) lau gadaralaia, bona kuku lau ania. Bona ena be lau be dubu dekenai lau lao loulou, to kekero muramurana lau inua momo danu.” To Iehova ena Witness tauna ta be ena ruma dekenai ia vadivadi henia bena Bible ia stadilaia matamaia bona ena hereva ia badinaia neganai, ena mauri ia haidaua. (Hereva Lada-isidia 2:​1-22; 2 Timoteo 3:16) Hari inai negai, ia mai ena adavana bona edia natudia kekenidia rua ese haida idia durudia, unai bamona kara dikadia idia rakatania totona.

Belgium

Tau matamatana ta mai ena adavana ida ese Dirava idia badu henia dikadika. Badina be edia vara guna natuna, kekeni ta, be ia vara bena dina 10 murinai ia mase. Edia natuna iharuana ia vara neganai ena aena ia dika. Bona edia natuna ihatoina, ena be ena toana be namo herea, to hua 5 murinai ia mase haraga. Hahine ia abia dae diba lasi, lalokau Diravana ese idia ruaosi unai bamona do ia hahisidia, to lebulebu taudia momo edia natudia ese dika idia davaria lasi.

Nega sisina murinai, Iehova ena Witness tauna ta be ena ruma ta ruma ta haroro gaukarana lalonai iena ruma dekenai ia ginidae. Witness tauna ese Dirava ena gwauhamata namodia ia herevalaia noho neganai, hahine ia abia dae diba lasi Dirava be lalokau Tamana guba dekenai. (Salamo 37:​10, 11) To Bible gwauraia bukadia haida ia abia dae. Witness tauna ese ia vadivadi henia loulou murinai, Bible ena sivarai namona ese ena lalona ia hakerua bena Dirava ia abidadama henia. Hari inai negai ia bona ena adavana edia helaro goadana be, Iehova ese edia natuna ena aena be Paradaiso lalonai do ia hanamoa, bona ia ese edia natudia rua do ia hatoredia isi lou danu.​—Ioane 5:​28, 29; Apokalupo 21:​1-4.

Portugal

Sunday ta ena daba kahanai, hahine ta ese aniani momo sitoa amo ia mailaia lalonai, tau ta mai ena adavana ida ia hedavari henidia bena ia hereva henidia. Unai tau mai ena adavana ida be Iehova ena Witness taudia, haroro gaukara idia karaia noho. Hahine idia hanamoa, badina be ena ruma taudia ubudia dalana ia laloa namonamo dainai. To idia nanadaia, idia gwau, daika ese taunimanima iboudiai ia naridia diba? Bena edia henanadai be idia haerelaia, idia gwau Dirava ese. (Salamo 107:​8, 9; Isaia 33:24) Hahine ia henanadai, ia gwau: “Lauegu hekwakwanai do ia kokia diba a?” Witness taudia idia haere henia, idia gwau do ia kokia diba, bena ia boiridia lao ena ruma dekenai, bona unuseniai Bible stadi idia hamatamaia. Ena adavana ese ia itaia ena kara ia haidaua bona ia hanamoa, unai dainai ia danu be Bible stadi lalonai ia helai bona nega sisina murinai ia danu ese ena kara ia haidaua.

Gabeai hari hahine ese Witness taudia ia hamaorodia, unai Sunday ai do ia hereva henidia lasi neganai, ia be nega rua sibona ia hamasea toho. Ia lalohisihisi bada, badina be ena adavana ese ia rakatania gwauraia. To hari, ia mai adavana bona edia natudia danu ese sivarai namona idia dibaia noho mai edia lalo-tamona ida.

Thailand

Hahine ta ena mauri lagani momo lalodiai demoni ese idia hahekwarahia. Iehova ena Witness tauna ta be haroro gaukara ia karaia noho lalonai ia davaria, bena ia ese Bible bukadia haida ia abia bona ena lalona ia hegeregere Bible stadi do idia karaia iena ruma dekenai. Hua rua lalodiai ia stadi murinai, ia lalo-parara Bible ese ia hahedinaraia namona be ena kaivakuku bona ena babalau gaudia iboudiai do ia negea. (Kara 19:19; 1 Korinto 10:21; 1 Ioane 5:21) Hari inai negai demoni ese idia hahekwarahia lasi, unai dainai ia ese ma haida ia durudia goadagoada diba, Dirava momokanina tamona, Iehova, idia diba totona.

Kenya

Raskol gunalaidia tauna ta idia hamaoroa, pulisi idia laloa ia dika rohoroho dainai, idia hegaegae do idia davaria neganai maoromaoro do idia pidia mase. Unai ia kamonai neganai ia kiri sibona. To, nega sisina murinai iena raskol oreana ena palani ta ese ena anina ia havaraia lasi. Ena bamona ese idia heautania, bena badu taudia momo ese idia gegea ahu, ena kerere davana idia henia gwauraia. Bena pulisi taudia idia ginidae, idia hamauria bona dibura dekenai idia abia lao kota do ia naria totona.

Iena loia ese ia sisiba henia dahaka dahaka do ia karaia be namo ena kerere hunia totona. To dibura dekenai ia noho neganai, ia ese Iehova ena Witness tauna ta ia laloa lou, guna ia ese ia vadivadi henia loulou. Bena kara dika amo ia helalo-kerehai bona Dirava ia guriguri henia, ia noia do ia durua. Momokani, ia guriguri neganai Iehova ena ladana ia gwauraia. (Kara 10:​1, 2 itaia.) Hari raskol ese sibona ena kerere ia gwauraia hedinarai neganai diadi ia hoa. Unai dainai ena panisi ia hamaragia; ia gwau lasi do idia hamasea, to ia gwau dibura rumana ta lalonai do idia koua ela bona lagani 10 do idia ore.

Dibura dekenai ia noho neganai, Bible bukadia ia duahia mai ena ura bada ida, bona Dirava ia guriguri henia loulou, ia noia, bema mai dalana ena nega dibura lalonai do ia hakwadogia, Iena hesiai gaukara do ia karaia diba totona. Bena idia hamaoroa iena nega do idia hakwadogia, hegeregere, lagani 5 idia ore murinai idia kahua nege, bona maoromaoro ia ese Bible na Iehova ena Witness taudia ida ia stadilaia matamaia. Nega daudau lasi murinai bapatiso ia abia, bona hari ia ese dala ia tahua noho pioneer gaukara do ia karaia totona.

Unai bamona sivarai momo herea ese idia hahedinaraia, Iehova ena Witness taudia ese Iesu ena oda hegeregerena sivarai namona idia harorolaia “tanobada ena kahana ibounai” dekenai. Unai dainai oi diba Iehova ena Witness taudia be haroro taudia momokanidia hari inai nega lalonai.