Basileia Haroro Ripoti

Iesu Ena Mamoe be Iena Gadona Idia Kamonai

TANOBADA ibounai dekenai haroro gaukara idia karaia neganai, iena aneru amo Iehova be iena hesiai taudia ia hakaudia lao mamoe bamona taudia dekenai. Idia be Iesu ena gadona idia kamonai bona mauri hanaihanai idia laloa dainai idia hesiai henia. Iesu be Ioane 10:​27, 28 dekenai ia gwau: “Egu mamoe ese lauegu gadona idia kamonai, lau diba vadaeni idia, bona idia ese lauegu murina dekenai idia raka. Mauri hanaihanai danu lau henia idia dekenai.” Madagascar dekenai, kudou-maoro taudia be Iesu ena gadona idia kamonai henia dalana oi laloa.

Iehova ena Witness ta be Mauri Hanaihanai Paradaiso Lalonai bona Memero Kekeni​—Moale Umui Davaria Dalana bukadia ia henia iena gorere tamana ia vadivadi henia doketa tauna dekenai.

Unai doketa be Protestan tauna bona Witness taudia ia inai henia momokani, to buka ia abia bona iena Bible lalonai buka ena siridia ia duahia. Iena hahine be Katolik bona ia danu be doketa ta; Memero Kekeni bukana ia duahia loulou badina ia gwau ia totona idia torea bamona. Society be Bible ena amo 1914 ena anina badana idia gwauraia dalana dainai idia hoa bada. Unai tau be ia dekenai buka ia henia Witness tauna ia tahua. Unai Witness ese Life​—How Did It Get Here? By Evolution or by Creation? bukana ia henia, bona dala ia hegaegaelaia unai tau bona ena hahine do ia vadivadi henia edia henanadai ia haerelaidia totona. Ia vadivadi henidia neganai, wiki iboudiai Bible stadi ta ia hamamataia unai tau, hahine bona edia natudia toi dekenai. Edia diba Bible dekenai idia habadaia haraga.

Stadi ginigunana murinai, unai ruma bese ibounai be Kingdom Hall ena hebou dekenai idia mai, bona nega sisina murinai Haroro School dekenai idia vareai. Natudia edia kara ia namo ia lao haraga. Edia Bible stadi amo, idia davaria vara dinadia bona ma tomadiho holide dinadia be Keristen karadia lasi; unai dainai, idia hahelagadia lasi. Ena be Bible stadi dekenai idia do herevalaia lasi, to unai tau be varavara ta dekenai rara ia henia lasi. Nega sisina murinai, iena karate dabuana be iena dabua atoa gabuna amo ia kokia; ia siaia lao dabua turia tauna ta ese iena natudia edia dabua ia turidia totona. Gabeai gaudia perovetalaia totona hisiu edia dala stadilaia magasin bona bukadia ia araia. Hua toi sibona idia stadi hamatamaia murinai, tau bona hahine be edia dubudia amo edia ladana idia kokia bona idia gwau idia ura haroro gaukara idia karaia. Hari, idia be bapatiso idia abia vadaeni.

◻ Thailand hahine ta be hereva momokani ia tahua. Ena be ia be Buddhist hahinena ta, to iena tomadiho ia karaia goadagoada lasi badina koikoi bona mataganigani karadia momo ia itaia. Ma danu, sene karadia idauidau dainai ia badu. Unai ibounai dekenai ia hesiku.

Iena dekena hahine ta ese ia hamaoroa namona be Keristen taudia ia tahua bona Pentecostal dubuna ai ia abia lao. To, idia guriguri noho lalonai, unai taudia iboudiai be gadodia bada amo idia guriguri ena regerege bada dainai unai hahine ia ura dikadika ia rakatania bona ruma ai ia lao. Unai be nega ginigabena unai dubu dekenai ia lao.

Gabeai, Roman Katolik dubuna ia tahua. To nega sisina momo ia lao murinai, ia itaia idia danu idia koikoi bona idia mataganigani, bona pris ena mauri dalana lalonai kohu bada ia moalelaia. Ia badu bona ia rakatanidia. Unai pris ia ura ia diba dahaka dainai dubu ia rakatania. Ena badina ia diba neganai, mai hevaseha danu ia gwau: “Bema oi ura taravatu idia badinaia momokani taudia oi bamodia, Iehova ena Witness taudia dekenai oi lao.” Ia henanadai, ia gwau: “Edeseniai idia noho?” Pris tauna ia haere: “Idia be ranu naria gabuna kahirakahira ai.” Dina gabenai ia tahudia to idia ia davaria lasi. Ia lalohisihisi, to herevana, nega ibounai lalonai Iehova ena Witness taudia ia lalodia.

Dina ta ia kamonai dekena taudia rua idia herevahereva neganai, ta be ma ta dekenai mai hevaseha ia gwau: “Nega sisina murinai oi be Iehova ena Witness ta ai do oi lao!” Unai ia kamonai neganai, unai hahine be kara haraga dekena tauna dekenai ia lao bona ia nanadaia: “Iehova ena Witness taudia idia noho, a?” Ia haere: “Oibe. Haida be iniseniai do idia mai bona ruma ta ruma ta ai do idia haroro. Idia do oi diba badina edia toana be namo bona edia dabua idia karaia namonamo.” Unai hereva dainai ia lao ia tahudia totona. Ia davaridia haraga lasi, to iena ruma ai ia raka giroa neganai, ia be dabua idia karaia namonamo hahine rua ia itaia ta dekenai idia herevahereva. Ia lao bona ia nanadaidia idia be Iehova ena Witness taudia o lasi. Idia gwau idia be Witness taudia, bona unai hahine ese ia noidia, ia gwau: “Mani lauegu ruma dekenai umui mai. Lau ura umui ida lau herevahereva.”

Ia dekenai Bible stadi ta idia hamatamaia, bona ena be ruma bese taudia ese idia inai henia bona idia hevaseha henia, to unai hahine be hebou dekenai ia mai hamatamaia bona ena varavara dekenai ia haroro.

Iesu be iena mamoe ia diba momokani bona iena orea lalonai ia haboudia iena kara maoromaoro tanobada matamatana dekenai idia roho mauri totona.