Mase Taudia ida Idia Herevahereva A?

BRAZIL dekenai, soka gadaralaia tim haida ese rohe taudia edia heduru idia tahua. Idia ura idia amo sisiba do idia abia, do idia gadara henia tim do ia kwalimu garina. Niuspepa ta ia gwau, “Dala ia noho taunimanima be lauma ida idia herevahereva edia hekwakwanai hanaia daladia do idia diba totona, unai dainai taunimanima milion momo ese unai bamona heduru idia tahua.” Tano haida lalodiai, mai edia dagi bada politikol taudia, laulau torea taudia, bona bisinesi taudia ese lauma edia heduru idia tahua. Edia gorere hanamoa totona eiava moni abia dalana do idia dibaia totona, momo ese mase taudia edia heduru idia tahua, badina idia laloa edia diba be bada.

To, ta be mase tauna ida idia herevahereva toho be maoro a? Dala ia noho mase tauna ida herevahereva totona a? Unai idia karaia toho taudia ese dika idia davaria diba a? Bible ena hereva unai kara dekenai do oi hoalaia reana.

Dahaka Ia Vara Saulo Dekenai?

Guna ia vara momokani gauna ena sivarai, Bible ese ia gwauraia sivaraina, mani oi laloa: Israel ena King Saulo ese ena inai taudia, Filistia taudia unai, garidia ia gari, unai dainai rohe hahinena ta dekenai ia lao, En-doro dekenai. Ia ura hari hahine ese ia mase vadaeni peroveta tauna Samuel do ia hereva henia. Unai hahine ia boiboi bena lauma ta ia hedinarai ena toana be tau burukana mai ena dabua badana. Saulo ia gwau unai be Samuel. Ena hereva be inai: Dirava ese Israel taudia na Filistia taudia edia imadia ai do ia atodia, bena kerukeru Saulo bona ena natuna memerodia be “Samuel” ida do idia noho, anina be Filistia taudia idia tuari henidia neganai do idia mase. (1 Samuel 28:​4-19) Unai bamona ia vara vaitani a?

Lasi. Filistia taudia ese Saulo idia haberoa dikadika, to Saulo ese sibona ia gwadaia mase. (1 Samuel 31:​1-4) Lauma ia gwau Saulo ena natudia iboudiai be ia ida do idia mase hebou, to ena natuna Isiboset be ia roho mauri.

Saulo ese mase tauna ena heduru ia tahua be maoro a? Lasi. Bible ia gwau: “Saulo be ia mase, ia kara momokani lasi dainai . . . bona rohe hahinena ia noia do ia henanadai dainai.” (1 Sisiga 10:13) Saulo ia mase badina be unai kara amo Dirava ena taravatu ia utua. Taravatu be inai: “Lauma danu ia herevahereva tauna ta, o gabeai do idia vara gaudia ia gwauraidia tauna ta, eiava mase taudia ia nanadaidia tauna ta, be umui bogaraginai do ia noho lasi. Badina be unai bamona idia karaia taudia iboudiai idia dika rohoroho Iehova vairanai.” (Deuteronomi 18:​10-12) Dahaka dainai mase taudia nanadaidia karana be dika rohoroho Dirava vairanai? Unai henanadai ai do haerelaia lasi neganai, reana inai henanadai ita laloa diba:

Mase Taudia ida Ita Herevahereva Diba A?

Bible ia gwau: “Mauri taudia idia diba do idia mase; to mase taudia be gau ta idia diba lasi; . . . mase taudia edia gabu lalonai gaukara ta, lalohadai ta, lalo-parara ta, bona aonega ta be lasi.” (Kohelete 9:​5, 10) Mase taudia edia diba ese mauri taudia edia diba ia hanaia lasi, badina be edia lalohadai be lasi. Unai dainai idia ida ta ia herevahereva diba lasi. Dirava ena taravatu, mase taudia ida herevahereva toho karana dekenai, bema ita badinaia, namo do ita davaria, ta ese ita do ia koia toho lasi. To King Saulo ena sivarai ese ia hahedinaraia lauma edia gabu amo hereva ia mai diba.

Daidia Idia Hereva?

Idia gwau mase taudia ida idia herevahereva diba taudia momo idia kara koikoi. Buka badana ta, The World Book Encyclopedia ia gwau: “Haida ese idia hahedinaraia vadaeni, rohe taudia ese lauma hereva henidia heboudia dekenai idia lao taudia idia koidia. Saiens taudia ese unai hebou dekenai idia vara gaudia momo edia vara dalana idia gwauraia diba. Rohe taudia haida be idia hereva neganai sibodia edia gado regena idia negea diba, bena taunimanima idia laloa unai gado regena be idau gabu amo ia mai. Haida ese tiriki gaudia idia gaukaralaidia. Ma haida be edia siahu amo taunimanima edia darana idia biagua bena idia koidia. Lauma hereva henidia heboudia dekenai idia lao taudia momo edia ura be, edia mase lalokau tauna ta ida do idia herevahereva. Unai idia ura dikadika dainai, idia laloa rohe tauna ese ia gwauraia herevana be lauma edia gabu amo ia mai.”

To, unai sibona ita laloa be namo a? Lasi, badina Dirava ena taravatu mase taudia ida herevahereva toho karana dekenai bema ita badinaia, unai ese dala badana ma ta amo ita do ia gimaia. Hereva be lauma edia gabu amo idia mai diba, to unai hereva idia gwauraia laumadia be mai edia siahu bada bona idia ura taunimanima idia koidia. Bible ia gwau idia be “lauma dikadia”​—Satana Diabolo bona gwau-edeede anerudia, demoni unai. (Efeso 6:12) King Saulo be En-doro dekenai ia noho rohe hahinena dekenai ia lao neganai, demoni ta ese ia mase vadaeni peroveta tauna Samuel ena toana ia karaia.

Saulo ena sivarai hegeregerena, demoni ese namo idia havaraia diba lasi, bona bema ta ia laloa heduru idia henia, unai heduru ia doko haraga. Idia be koikoi laumadia, edia lohia, Diabolo, hegeregerena. (Mareko 3:22; Ioane 8:44) Mai ladana badana tauna ta, Sir Arthur Conan Doyle, ia gwau: “Madi, lauma dikadia idia koia bada herea. Lau laloa, inai kara idia tahua taudia iboudiai idia davaria, nega ta ta unai lauma ese hereva koikoi bona hereva namodia bona momokanidia nega tamona idia gwauraidia.” (The New Revelation, rau 72) Momokani, oi ura lasi ta ese oi do ia koia, ani?

Inai mani oi laloa: Tanobada ena sivarai amo ita diba, guna taunimanima be hegui hesiai taudia ai idia halaodia bona hisihisi bada idia ania. Ta be sibona ena ura dainai hegui hesiai tauna ai do ia lao bona unai hisihisi bona hemarai do ia haheaukalaia, a? Lasi. Vadaeni, dahaka dainai dala ita kehoa ita be lauma dikadia edia hegui hesiai taudia ai ita lao totona? Idia koikoi sibona lasi, to taunimanima edia ura kwalimu idia kokia, bona dagedage bona ala-ala dekenai idia hakaudia diba. Lagani 29 tauna, ladana José, Pernambuco, Brazil dekenai, ia gwau ‘lauma ta ese ia boloa, bena ia doria ena mauri lagani tamona natuna kekenina ia alaia mase totona.’ Oibe, lauma dikadia idia nanadaidia taudia be unai lauma ese gabeai idia biagudia mai edia dagedage ida. Idia lalohisihisi hegui hesiai taudia gunadia idia ura dikadika ura kwalimu taudia ai idia lao, unai hegeregerena, namona be demoni edia hesiai taudia ai idia lao vadaeni taudia idia ura dikadika edia siahu henuna amo do idia siri bona ura kwalimu taudia ai do idia lao. Unai idia karaia totona, dala ta be rohe taudia edia heduru idia tahua lasi bona mase taudia ida herevahereva toho karana idia hadokoa.

Mase Taudia ida Herevahereva Karana be mai Anina A?

Lasi, badina be heduru be ma gabu ta amo ita abia diba. Ita be edia tamana idia abidadama henia natudia bamona; iseda Tamana guba dekenai ita noia diba ita do ia durua totona, badina ia ura kudou-namo taudia ia durudia. (Luka 11:​9-13) Dirava ena peroveta tauna Isaia, ia gwau: “Bema umui idia hamaoroa, idia gwau: ‘Lauma edia hereva idia halasia taudia bona meamea taudia, manu bamona idia boiboi bona idia hereva manokamanoka taudia umui nanadaidia’ neganai, taunimanima ese edia Dirava idia nanadaia be namo ani? Mase taudia do idia nanadaidia mauri taudia dainai a? Taravatu bona idia hamomokania vadaeni herevadia dekenai umui lao!”​—Isaia 8:​19, 20.

Oibe, bema Iehova Dirava ena ura ita karaia bona lauma dikadia ita dadaraidia vaitani, ita diba Iehova ese ita do ia durua. Keristen hahediba tauna Iakobo, ia gwau: “Dirava ena ura do umui karaia. Satani do umui tuari henia, vadaeni umui dekena amo do ia heau boio.” (Iakobo 4:7) Tau ta be lagani 28 lalodiai babalau ia karaia bena Iehova ena Witness taudia ida Bible ia stadilaia murinai, ia gwau: “Diabolo ese babalau idia rakatania taudia dekenai do ia karaia karana garina oi gari lasi, to Iehova Dirava oi abidadama henia.”

Bema iseda harana be Dirava ena Hereva momokanina amo ita hahonua bona unai hereva ita badinaia, unai ese ita do ia durua ‘Dirava ese ia henia tuari dabua ibounai do ita atoa,’ bena ‘do ita goada, Satani ena koikoi karadia do ita koua’ diba bona lauma dikadia edia siahu henunai do ita noho lasi. (Efeso 6:11) Bema dina iboudiai Iehova ita guriguri henia unai ese lauma dikadia edia siahu ita dekenai do ia koua diba.​—Hereva Lada-isidia 18:10.

Mase taudia edia noho herevadia momokanidia ese iseda lalona idia hagoadaia. Mase be mahuta mase bamona. (Ioane 11:11) Bona Iesu Keriso ia gwauhamata mase taudia be do idia toreisi lou.​—Ioane 5:​28, 29.

Rohe tauna ta mai adavana bona natuna ida be Bible amo idia dibaia, mase taudia ida herevahereva toho bona mase taudia gadona bamona hereva toho karana be anina lasi. Hari ruma bese bona ma ruma bese momo hegeregeredia, oi danu be lauma dalanai ura kwalimu tauna ta ai oi lao diba. (Ioane 8:32) Hereva momokani mase taudia dekenai bona Dirava ena ura taunimanima totona oi dibaia. Bena Iehova ena nega matamatana na mai emu moale ida do oi naria diba; unai neganai emu lalokau mase taudia do idia toreisi lou bona idia ida do umui herevahereva diba bona mauri hanaihanai na maino dekenai do oi moalelaia diba.​—Isaia 25:8.

[Picture on page 4]

King Saulo be ia mase vadaeni peroveta tauna Samuel amo hereva ia tahua neganai, daika ia haere?